Hapot

◼ Tama daw para sa saro sa Mga Saksi ni Jehova na magpabolong asin magpaataman sa sarong ospital o klinika sa pag-ataman na pinamamahalaan nin sarong relihiosong organisasyon?

May manlaenlaen na relihiosong organisasyon na namamahala sa mga ospital o klinika sa pag-ataman na nagtatao nin medikal na pagbolong o panghaloyan na pag-ataman. Sa pangkagabsan, an siring na mga pasilidad dai inestablisar tanganing suportaran an intereses kan Dakulang Babilonya. (Kap. 18:​2, 4) Sa kapoonpooni, an pasilidad na iyan tibaad inestablisar nin sarong relihiosong organisasyon tanganing magganar nin kuarta. Ngonyan, may nagkapirang ospital na sa ngaran sana an pagigin konektado sa relihion, mantang an iba parsial na pinamamahalaan pa nin mga miembro kan klero.

Kun kaipuhan nin saro sa Mga Saksi ni Jehova na magpabolong sa ospital o magpaataman sa klinika, sia an dapat na magdesisyon kun baga maduman sia sa sarong pasilidad na posibleng konektado sa sarong relihiosong organisasyon. Tibaad itogot kan konsensia nin saro na gibohon nia iyan, alagad tibaad dai iyan itogot kan konsensia nin iba. (1 Tim. 1:5) May nagkapirang kamugtakan na puedeng makaimpluwensia sa desisyon nin saro, asin marahay na isip-isipon an mga ini.

Halimbawa, tibaad solamenteng an ospital o klinika sa pag-ataman na may relihiosong ngaran an harani sa saindong lugar. O kun igwa nin ibang haraning pasilidad, tibaad an pasilidad na may relihiosong ngaran an may reputasyon na mas marahay an serbisyo. Tibaad an ospital sanang iyan an may espesyal na kasangkapan sa pagtao kan kaipuhan na partikular na pagbolong, o tibaad iyan an solamenteng ospital na dian puedeng magtrabaho an saindong doktor o siruhano. Siring man, kun beses an mga ospital na konektado sa relihion tibaad may paggalang sa saindong punto de vista bilang Kristiano dapit sa paggamit nin dugo, mantang an nagkapira pang ospital na pribado o sadiri nin gobyerno tibaad mayo kan siring na paggalang. Kaya ini an nagkapirang kamugtakan na puede nindong isip-isipon kun nagdedesisyon kun saen mapabolong o mapaataman.

Kun nagdesisyon kamo na magpabolong sa ospital o magpaataman sa klinika na konektado sa relihion, puede nindong mansayon iyan na pagbayad sana sa serbisyong itinatao sa saindo. Puede nindong mansayon iyan na garo baga an relihiosong organisasyon namamahala sa sarong negosyo, asin paagi sa pagbayad sa serbisyong itinatao kan siring na negosyo dai kamo nagtatao nin direkta asin boluntaryong kontribusyon tanganing suportaran an falsong relihion. An binabayadan sana nindo iyo an produkto o serbisyo.

Siempre, bilang Kristiano, sa siring na mga kamugtakan dapat na seguradohon nanggad nindo na dai kamo nakikikabtang sa ano man na akto nin falsong pagsamba. Siring man, dai nindo gagamiton an nakatodan nang relihiosong mga titulo, arog kan “Father” o “Sister,” sa pag-apod sa mga indibiduwal na tibaad nagtatrabaho o nagdadalaw sa pasilidad. (Mat. 23:9) Kaipuhan nindong seguradohon na an solamenteng dahelan na yaon kamo dian iyo na magpabolong o magpaataman, asin mayo nang iba.

Kun maospital, puede nindong sabihon na saro kamo sa Mga Saksi ni Jehova asin na gusto nindong mag-ako nin mga pagdalaw hale sa lokal na kamagurangan. Seseguradohon kan pagdalaw na ini na mag-aako kamo nin angay na espirituwal na suporta mientras na kamo yaon dian.​—⁠1 Tes. 5:14.

An mga kapamilyang may pagtubod, an lokal na kamagurangan, asin iba pa sa kongregasyon maninigo na responsableng asikasohon an espirituwal na mga pangangaipo nin siisay man na may edad nang mga tugang na nakaistar sa mga klinika sa pag-ataman, nangorogna kun pinamamahalaan ini nin relihiosong organisasyon. An kahigosan sa bagay na ini magigin dakulang pamparigon sa boot sa siring na mga gurang asin ililikay sinda kaiyan sa dai tinutuyong pakikikabtang sa relihiosong mga seremonya, selebrasyon, o iba pang kaagid na mga aktibidad na ginigibo sa siring na mga pasilidad.

Isinasaisip an mga puntong ini, an lambang saro kaipuhan na estudyaran an gabos na kamugtakan na kalabot dangan gumibo nin sadiri niang desisyon kun saen na ospital sia mapabolong o kun saen na klinika sia mapaataman.​—⁠Gal. 6:5.