Girumdumon an mga Nasa Nursing Home
1. Taano ta kaipuhan na mapaabutan kan maugmang bareta an mga nasa nursing home?
1 Dakul an nakakamati kan nakakapangluyang mga epekto nin paggurang. (Par. 12:1-7) An iba sa sainda nakaistar sa mga nursing home, kaya bako pirming posible na makaulay sinda sa pagharong-harong. Arog man kaiyan an sitwasyon dawa sa mga nasyon na napagkatudan nang paistaron an nagkakaedad nang mga magurang sa harong kan mga aki o ibang paryente. Dawa pa baga maluya na an paghiro-hiro o memorya, an mga may edad na asin an iba pang nakaistar sa mga nursing home puwede pa man giraray makanuod, makasabot, asin mamutan si Jehova. Paano niyato maipapaabot sa sainda an maugmang bareta nin paglaom?—Tito 2:13.
2. Paano kita puwedeng makagibo nin listahan kan mga nursing-care facility na bibisitahon?
2 Kun Paano Mapuon: Sa parati, puwedeng gumibo nin listahan kan mga nursing-care facility na mahahanap sa Internet o sa direktoryo nin telepono. Hilingon an “nursing homes,” “group homes,” asin “residential-care facilities.” An paraataman sa paglilingkod puwedeng mag-asignar nin kuwalipikadong mga parahayag na mabisita sa kada pasilidad. Paagi sa marahay na pagplano asin pagtitiwala ki Jehova, sa parati nakakapuon nin group Bible study.—Tal. 21:5; 1 Juan 5:14, 15.
3, 4. (a) Kiisay kita dapat maghagad nin permiso na magtukdo nin Bibliya? (b) Paano ta puwedeng sabihon an mga areglo sa pag-adal?
3 Depende sa klase nin pasilidad kun paano mahagad nin permiso na makapagtukdo nin Bibliya. Sa darakulang pasilidad na dakul nin nakaistar asin nagtatrabaho, mas marahay na dulukon an receptionist asin magpaaram na kakaulayon mo an namamahala duman. Sa saradit na group home para sa mga may edad na—harong na pipira sana an nakaistar asin may duwa o tulong caregiver—an mas marahay na puwedeng gibuhon iyo na mag-iskedyul nin panahon na makaulay mismo an kagsadiri.
4 Sa arin man diyan, ipaliwanag na nagboboluntaryo ka para tabangan an mga gustong magbasa asin makipag-ulay manungod sa Bibliya. Maghapot kun igwa duman nin tibaad gustong mag-iba sa group Bible study sa laog nin mga 30 minutos kada semana. Puwedeng gamiton an lain-lain na publikasyon, pero nahiling kan dakul na mas nagugustuhan an The Greatest Man Who Ever Lived asin An Sakuyang Libro nin mga Istorya sa Bibliya. Puwede mong ipahiling iyan sa namamahala. Ipakipag-ulay sa saiya an aldaw, oras, asin lugar na gagamiton, na sa parati ikinakaag sa listahan nin aktibidad sa nursing home. Dai mag-alangan na magpamidbid na saro kang Saksi ni Jehova. Linawon mo man na an tuyo mo bako na maggibo nin seremonya sa relihiyon, kundi magtukdo sa Bibliya.
5. Anong praktikal na mga suhestiyon an makakatabang para magin nakakaugma asin kapaki-pakinabang an pag-adal?
5 Pagkondukta nin Pag-adal: Depende sa sitwasyon asin kamugtakan kan pasilidad kun paano mo gigibuhon an pag-adal, kaya magin mapagrisa asin madaling makibagay. An makondukta kaipuhan magdara nin nagkapirang kopya kan publikasyon na pag-aadalan, na kukuanon niya giraray pagkatapos. Tibaad kaipuhan man na magdara kaidtong darakula an letra para sa iba. Puwedeng magbasa nin mga parapo, maghapot, asin magsimbag arog kan ginigibo ta. An mga parapo o mga teksto sa Bibliya puwedeng ipabasa sa mga gusto asin kayang magbasa. Sa panahon nin pag-adal, magin entusiyastiko, positibo, asin mainamigo. Kun magtugot an namamahala, puwede mong ipahiling paminsan-minsan an saro sa satong mga video na nakakapakusog nin pagtubod sa Bibliya o nagduduon nin mga leksiyon sa sarong istorya sa Bibliya. Tibaad posibleng punan asin tapuson an pag-adal sa halipot na pamibi. Ginagamit pa ngani kan ibang parahayag an mga awit na pang-Kahadian.
6. Ano an puwedeng gibuhon pag may nagkontra?
6 Paano kun may magkontra sa binabasa o sa nasambit sa pag-adal? Magin mataktika sa pagsimbag. (Col. 4:6) Tibaad puwede mong ipabasa an sarong halipot na teksto sa Bibliya na malinaw na nagsisimbag sa hapot niya. Kun bako iyan praktikal, mas marahay na pasalamatan mo siya asin sabihon na pag-uulayan nindong duwa iyan pagkatapos kan pag-adal.
7. Ano an puwede mong gibuhon kun may maghapot o interesadong marhay?
7 Kun minsan, tibaad may maghapot o magsabi na gusto niyang makanuod pa. Arog kaini an sinasabi nin sarong sister: “Magayunon na hapot iyan. Pero dahil personal mong hapot iyan, tapuson ta nguna an binabasa ta, saka tang duwa pag-ulayan iyan.” Sa parati, posible na makapagkondukta nin pag-adal sa Bibliya sa sarong interesado sa ibang panahon asin lugar.
8. Paano ire-report an mga group study asin pag-adal sa Bibliya sa indibidwal?
8 Sa parati, mas marahay kun an iyo man sanang mga parahayag an makondukta kan group study sa kada pag-adal. Puwedeng magreport nin oras an kada saro sa sainda. Pag regular na an pag-adal, puwedeng i-report iyan kan parahayag na nanginginot na sarong pagdalaw liwat sa kada pagkondukta niya asin sarong Bible study sa sarong bulan. An pag-adal sa Bibliya na napunan sa saro na nakakasabot asin nakakanuod puwedeng i-report arog kan pirmi tang ginigibo.
9, 10. Anong mga kuwalidad an kaipuhan na ipahiling kan mga parahayag na makondukta nin group study? Ipaliwanag.
9 Ipadagos Iyan: Mas marahay na magkaigwa nin permanenteng aldaw asin oras kan pag-group study. Aasahan kan mga nasa nursing home na magigin regular iyan asin mapuon saka matapos na nasa oras. (Mat. 5:37) Kaya mahalaga an pag-utob sa napag-ulayan, pagtitiyaga, asin pagigin organisado. Ipinapahiling kan mga eksperyensiya na mas marahay kun duwang kuwalipikadong parahayag an magkaibanan sa pagkondukta nin group study. (Par. 4:9, 10) Sa darakulang pasilidad, tibaad kaipuhan nin mas dakul pa.
10 Mahalaga man na magin mainamigo asin magpahiling nin personal na interes. (Fil. 2:4) Sa inot na pagdalaw, hinguwahon na makaulay an lambang nag-atender. Tandaan asin hinguwahon na tuumon an saindang pangaran bago an sunod na pag-adal. Kun magigin mapasensiya asin mapagmalasakit kita, mamamatian ninda gabos na inaako sinda asin pinapahalagahan.
11. Paano puwedeng magpahiling nin paggalang sa mga kapamilya na nagbibisita asin sa mga nagtatrabaho sa nursing home an mga nagkokondukta nin group study?
11 Mahalaga man na magpahiling nin paggalang asin kabuutan sa mga kapamilya na nagbibisita asin sa mga nagtatrabaho sa nursing home. Pag may napagkauruyunan na, dai basta pagliwaton an oras o paagi nin pag-adal; ipakipag-ulay nguna iyan sa namamahala. Paminsan-minsan, haputon man siya kun ano an masasabi niya manungod sa ginigibong group study. Pag may nagbisitang mga kapamilya sa panahon nin pag-adal, makipagmidbidan sa sainda. Ipaliwanag an katuyuhan kan pag-Bible study. Aseguraron sinda na nagmamakulog ka talaga sa kapamilya ninda. Agdahon sinda na mag-iba sa pag-adal asin magdangog.
12, 13. Magsaysay nin mga eksperyensiya na nagpapahiling kan marahay na mga resulta nin pagpapatotoo sa mga nursing home.
12 Mga Resulta: Magayon an report kan mga nagbibiyaheng paraataman asin kongregasyon sa nagin resulta kan paaging ini nin paglilingkod. Sa sarong report, mga 20 nakaistar sa nursing home an nag-iba sa inot na pag-adal. Bilang resulta, anom na indibidwal an magkasuruway na nakipag-adal sa Bibliya. Saro diyan an nabawtismuhan. Sa saro pang nursing home, napahiro an 85 anyos na babayi na makiasosyar sa kongregasyon asin nagsabing gusto niyang magpabawtismo. Kan an sarong pasilidad magdesisyon na pagsararuon an mga aktibidad kaiyan, na diyan hinali an group study na ginigibo kan mga Saksi ni Jehova, nagreklamo sa namamahala an mga nakaistar duman! Kan huri ibinalik an pag-adal, asin 25 sagkod sa 30 an nag-aatender.
13 An pagkamuot na ipinapahiling ta dakula an epekto bako sana sa mga nakaistar sa nursing home. Halimbawa, tibaad mag-iba asin magpartisipar pa ngani sa pag-adal an mga nagtatrabaho duman. An paghihinguwa ta na magpahiling nin personal na interes sa mga nasa nursing home nagtatao man nin marahay na patotoo sa komunidad. (1 Ped. 2:12) Kan maaraman an katuyuhan kan group study, sinabi nin sarong namamahala: “Taano ta ngunyan lang kamo? Nuarin kamo makakapuon?” May saro pa na nagsurat: “Udok sa puso kong irinerekomendar an group study na ini sa arin man na nursing-care facility. Libreng serbisyo ini kan Mga Saksi ni Jehova bilang parte kan misyon ninda sa komunidad.” Sa Hawaii, sarong nursing home an nagtao sa mga Saksi ni Jehova nin Volunteer Service Award, sarong sertipiko na nagsasabing an mga boluntaryo “mahalagang marhay na kayamanan” sa mga yaon sa pasilidad.
14. Taano ta gusto niyatong matabangan an mga nasa nursing home?
14 Dinadagka ni Jehova na mag-umaw sa saiya an mga may edad na. (Sal. 148:12, 13) Kaiba na diyan an mga nasa nursing home. Igwa daw nin mga nursing home sa teritoryo nindo kun sain an mga may edad na makikinabang pag nadangog an maugmang bareta? Sa tabang kan mga elder asin kan mga namamahala sa nursing home, makakapagtao kita nin marahay na patotoo sa mga yaon duman. Pag ginigirumdom ta an mga may edad na, inaarog niyato si Jehova.—Sal. 71:9, 18.