Itinutumba Niato an mga Bagay na Marigonon an Pagkaestablisar
1 Sa laog nin dakol na siglo, paagi sa paggamit nin falsong mga katokdoan asin pandadaya, naglaag si Satanas nin olang sa puso asin isip nin dakol na tawo. Pinapalakop nia an mga doktrinang arog baga kan Trinidad, imortalidad kan kalag, asin nagkakalayong impierno. Nagpapalakop sia nin pagduwaduwa manongod sa pag-eksister nin Kaglalang asin pagduda manongod sa pagkamasasarigan kan Biblia. An pagpalaenlaen sa rasa asin an nasyonalismo iba pang dakulaon na olang sa liwanag nin katotoohan. (2 Cor. 4:4) Paano niato mapapatumba an siring na mga paniniwalang marigonon an pagkaestablisar?—2 Cor. 10:4, 5.
2 Kalabot an Emosyon: Parateng kalabot sa haloy nang relihiosong mga paniniwala an makosogon na emosyon nin sarong tawo. An nagkapira may salang mga paniniwala poon kan sinda aki pa. Tanganing matabangan an siring na mga tawo, kaipuhan na magtaram kita sa paagi na nagpapaheling nin paggalang sa saindang punto de vista.—1 Ped. 3:15.
3 Matatawan niato nin dignidad an siring na mga indibiduwal kun totogotan niato sindang ipaliwanag kun ano an saindang pinapaniwalaan asin kun taano ta naniniwala sinda dian. (Sant. 1:19) Tibaad naniniwala sinda na an kalag imortal huli ta sinda nagadanan nin mga namomotan asin nagmamawot na maheling giraray an mga ini. O tibaad nagseselebrar sinda nin mga kapiestahan huli ta ikinaoogma ninda an pagkaigwa nin panahon na makaibanan an saindang pamilya. An paghinanyog sa saindang mga sinasabi makakatabang sa sato na marorop an saindang mga saboot asin maaraman kun ano an sasabihon niato sa epektibong paagi.—Tal. 16:23.
4 Arogon si Jesus: Nagtao si Jesus nin marahayon na halimbawa para sa sato kan sia magsimbag sa mga hapot nin sarong tawong tatao sa Ley. Dai nagtao si Jesus nin direktang mga simbag, na tibaad haboan kutana kan tawong iyan huli sa pinapahalagahan niang mga paniniwala. Imbes, sinambit ni Jesus an Kasuratan, inimbitaran nia an tawong iyan na sabihon an opinyon kaini, asin tinabangan ini na mangatanosan paagi sa sarong ilustrasyon.—Luc. 10:25-37.
5 An falsong relihiosong mga paniniwala na pinangangaptan nin marigon dai nanggad ikakapantay sa katotoohan kan Tataramon nin Dios. (Heb. 4:12) Paagi sa mapasensiang paghihingoa na aboton an puso, tibaad makatabang kita sa mga tawo na isikwal an kaputikan asin maogmang akoon an katotoohan na makakapatalingkas sa sainda.—Juan 8:32.