Bagong Programa sa Pansirkitong Asamblea

Paano kita posibleng makapanindogan nin marigon laban sa mga maringis na nagtutumang sa tunay na pagsamba? Paano niato madadaog an mga puersa na daing ontok na nagmamaigot na butongon kita pabalik sa bakong diosnon na kinaban? Sisimbagon kan programa sa pansirkitong asamblea para sa 2009 an mahahalagang marhay na hapot na ini. An tema kaiyan iyo an “Padagos na Daogon nin Karahayan an Karatan.” (Roma 12:21) Estudyare an kaiba sa programa.

Ipapahayag kan paraataman sa distrito an mga temang “Pinapakosog Tanganing Daogon nin Karahayan an Karatan,” “Magmaan sa Sobrang Kompiansa sa Sadiri!,” “Madali Nang Matapos an Gabos na Karatan!,” asin “Pagpakosog sa Satong Pagtubod Tanganing Daogon an Kinaban.” Ipapahayag sa sato kan paraataman sa sirkito an mga temang “Ngonyan Na an Panahon na Magpuka!,” basado sa Roma 13:11-13, asin “Dai Manluya an Saimong Boot sa Aldaw nin Kasakitan,” basado sa Talinhaga 24:10. Inaantisipar man niato an kabtang kan paraataman sa sirkito na “Pagtao nin Atension sa mga Pangangaipo kan Sirkito.” An saro pang nakakapukaw sa boot na kabtang iyo an temang “Puede daw Nindong ‘Gibohon an Ministeryong Ini’​—Paagi sa Pagpapayunir?” An enot sa duwang simposium may titulong “Marigon na Manindogan Tumang sa mga Katusohan kan Diablo.” Tatabangan kita kaiyan na maaraman asin isikwal an tusong mga pakana kan Diablo sa mga langtad nin teknolohiya, pag-aling-aling, asin edukasyon. Ipapaheling sa sato kan simposium na “Magkaigwa nin Kosog na Labanan si Satanas sa Marigsok na Panahon na Ini” kun paano ikakaaplikar nin mas lubos an ipinasabong na hatol na yaon sa Efeso 6:10-18.

An pagdaog sa mismong ginigikanan nin karatan direktang konektado sa paghuhulit kan mensahe kan Kahadean. (Kap. 12:17) Bakong makangangalas na daing ontok na sinasalakay ni Satanas an mga Saksi ni Jehova! (Isa. 43:10, 12) Alagad masusudya nanggad an Diablo huling determinado kitang “padagos na daogon nin karahayan an karatan.” Gumibo nin espesipikong mga areglo tanganing lubos na makinabang sa gabos na apat na sesyon kan pansirkitong asambleang ini.