Mahalagang Marhay an Personal Asin Pampamilyang Pag-adal sa Biblia!
1. Sa ano nangorognang nagmamakolog an Namamahalang Grupo sa panahon na ini, asin taano?
1 Arog kan enot na siglo, an Namamahalang Grupo igwa nin hararom na pagmakolog sa kapakanan kan banwaan ni Jehova. (Gibo 15:6, 28) Mantang nagdadangadang an dakulang kahorasaan, mahalagang marhay na an lambang parahayag kan Kahadean magkaigwa nin makosog na relasyon ki Jehova. Paano nindo gagamiton an panahon na itinagama nindo kaidto sa Pag-adal sa Libro kan Kongregasyon? An gabos dinadagka na gamiton an panahon na ini para sa pampamilyang pagsamba. Paagi sa madonong na paggamit sa panahon na ini, mapag-aadalan niato nin mas hararom an ipinasabong na Tataramon nin Dios asin makikinabang kita sa mga katokdoan kaiyan.—Sal. 1:1-3; Roma 11:33, 34.
2. Paano niato puedeng iareglo an banggi nin personal asin pampamilyang pagsamba?
2 Banggi nin Pampamilyang Pagsamba: Dinadagka an mga payo nin pamilya na isaabaga an saindang paninimbagan sa atubangan ni Jehova tanganing masierto na nasusunod ninda an makahulogan asin regular na programa nin pampamilyang pag-adal sa Biblia. (Deut. 6:6, 7) An mga tugang na daing agom asin mayo nin paninimbagan sa pamilya magagamit an panahon na ini para sa personal na pag-adal asin pagsiyasat sa Biblia. Mahalagang marhay para sa sato gabos na ‘tuboson an angay na panahon’ para sa pag-adal asin paghorophorop tanganing mapagdanay an kinakaipuhan na espirituwal na kosog sa ibong nin ‘maraot na mga aldaw.’—Efe. 5:15, 16.
3, 4. Anong mga suhestion an itinao kun dapit sa reperensia na puede niatong gamiton, asin anong katuyohan an maninigong isaisip niato?
3 Kun Ano an Pag-aadalan: An Watch Tower Publications Index o Watchtower Library sa CD-ROM makakatabang sa saindo na makakua nin impormasyon na mapangyaring magin nakakaogma an saindong mga pag-adal sa Biblia. Puedeng pag-adalan nin mga pamilya an mga artikulo sa An Torrengbantayan, arog kan regular na mga tampok na “Mga Paagi Para sa Kaogmahan nin Pamilya,” “Tokdoan an Saindong mga Aki,” asin “Para sa mga Hoben.” Siring man, an Awake! igwa kan seryeng “Young People Ask” asin interesanteng gayo na mga artikulo manongod sa mga ngangalasan sa mga linalang.
4 Paagi sa dai hinihidaling pagbasa kan Biblia, ikakatadom sa isip asin puso kan gabos na miembro kan pamilya an diosnon na mga prinsipyo asin mga leksion. (Heb. 4:12) Sa ibang panahon, puede nindong helingon asin pag-olayan an saro sa mga video na ginibo kan organisasyon. Puede kamong magin mapag-imbento sa pagpili kun ano an pag-aadalan asin kun paano iyan pag-aadalan. Taano ta dai hapoton an mga miembro kan saindong pamilya kun ano an magugustohan ninda?
5. Taano ta mahalagang marhay sa satong buhay ngonyan an personal asin pampamilyang pag-adal sa Biblia?
5 Kun Taano ta Mahalaga Ngonyan: An pagpakosog sa satong espirituwalidad mag-aandam sa sato na ‘tumindog nin marigon asin helingon an pagliligtas ni Jehova.’ (Ex. 14:13) Kaipuhan nin mga magurang an paggiya nin Dios sa pagpadakula sa mga aki “sa tahaw nin biko asin biribid na kapag-arakian.” (Fil. 2:15) Kaipuhan nin mga aki an tabang tanganing maatubang an nagrururong moral sa mga eskuelahan ngonyan. (Tal. 22:3, 6) Maninigong pakosogon nin mga mag-agom an saindang ‘tinolotolo na lubid’ na kaiba si Jehova. (Ecl. 4:12) Kun siring, madonong niatong gamiton an panahon na natatada tanganing pakosogon an satong sadiri sa satong “kabanalbanaleng pagtubod”!—Jud. 20.