Paano Sinda Makakadangog?

1. Taano ta tibaad masakit an paghuhulit, asin taano ta nagpapadagos kita sa paggibo kaiyan?

¹ Huling an aldaw ni Jehova marikas na nagdadangadang, kaipuhan na marhay na tabangan an dakol na iba pa na magkua nin tamang kaaraman dapit sa Dios asin sa saiyang katuyohan para sa katawohan. (Juan 17:3; 2 Ped. 3:9, 10) Kun beses tibaad masakit ini, huling dakol an indiperente o tibaad nag-oolog-olog sa sato huli sa paghuhulit niato. (2 Ped. 3:3, 4) Minsan siring, yaon sa sato an gabos na dahelan na maniwala na igwa pa sa satong teritoryo na maako kan maogmang bareta oras na madangog ninda iyan. Paano makakadangog an mga tawong iyan kun mayo nin mahulit?​—Roma 10:14, 15.

2. Paano nakakaparigon sa satong boot an halimbawa ni apostol Pablo?

² Pag-atubang sa Pagtumang: Sa kapakanan kan mga andam na magdangog sa mensahe kan Kahadean, dapat na dai kita madesganar. An Filipos an enot na siudad sa Europa na nakadangog ki apostol Pablo na naghuhulit kan maogmang bareta. Kan sia asin si Silas putik na pinagsahotan, sindang duwa hinampak asin ibinilanggo. (Gibo 16:16-24) Minsan siring, an makologon na eksperyensiang iyan dai nagpasibog ki Pablo huli sa takot. Kan magdalaw sia sa Tesalonica, an suminunod na siudad sa pagbiahe nia bilang misyonero, sia ‘nagpakapusoan paagi sa Dios.’ (1 Tes. 2:2) Bako daw na malinaw na ipinapaheling kan halimbawa ni Pablo an dahelan kan ‘dai niato pag-ontok’?​—Gal. 6:9.

3. Ano an puedeng makapabago sa saboot nin nagkapira dawa bakong interesado kaidto?

³ Dakol na habong maghinanyog sa laog nin dakol na taon an nagbago an saboot. An problema sa pinansial, helang, pagkagadan nin kapamilya, o mga bareta dapit sa nakakapurisaw na mga pangyayari sa kinaban puedeng magin dahelan kan pagbabagong iyan. (1 Cor. 7:31) An nagkapira na an mga magurang nagtutumang nagin nang mga adulto asin gustong maghinanyog. An padagos na paghuhulit niato nagtatao sa siring na mga tawo nin oportunidad na ‘mag-apod sa ngaran ni Jehova’ bago magin huri an gabos.​—Roma 10:13.

4. Ano an nagmomotibar sa sato na magpadagos sa ministeryo na “daing ontok”?

⁴ “Daing Ontok”: An pagkamoot niato sa Dios asin sa kapwa an mamotibar sa sato na magpadagos na “daing ontok” sa paghuhulit asin sa paggibo nin mga disipulo, arog kan ginibo kan mga apostol kan enot na siglo. (Gibo 5:42) Dakol ngonyan an “nag-aaragagha asin nag-aaragrangay huli sa gabos na bagay na makauuyam nin makuri” na nangyayari ngonyan. (Ezeq. 9:4) Kanigoan na paglaom asin kaginhawahan an inaako kan siring na mga tawo kun nadadangog ninda an maogmang bareta! Dawa kun an kadaklan na tawo habong maghinanyog, an Kasuratan naggagarantiya sa sato na si Jehova naoogmang gayo sa satong mga paghihingoa.​—Heb. 13:15, 16.