Dai nin Ontok sa Pagpahayag kan Maogmang Bareta
1 Isinaboot na marhay kan enot na mga Kristiano an saindang ministeryo. Ibinareta ni Lucas: “Aroaldaw sa templo asin sa harong-harong nagpadagos sinda na dai nin ontok sa pagtokdo asin pagpahayag kan maogmang bareta dapit ki Cristo, si Jesus.” (Gibo 5:42) Mayo lamang, dawa paglamag, na makapopogol sa sainda! (Gibo 8:4) Aroaldaw sindang nakipag-olay sa iba manongod kan katotoohan.
2 Kumusta man kita? Hapota an saindong sadiri: ‘Namamatean ko daw an pagkaapurado kan mga panahon? May tendensia daw akong padagos na ipahayag na dai nin ontok an maogmang bareta?’
3 Mga Halimbawa sa Modernong Aldaw nin Paghuhulit na Dai nin Ontok: An sarong tugang na babae, na biktima nin polyo, nasa laog kan aparato para sa paghangos. Dai sia nakaduduman sa Kingdom Hall o nakaaatender nin asamblea. Alagad, durante kan saiyang 37 taon na paghelang, natabangan nia an 17 katawo na manodan an katotoohan! Paano nia iyan ginibo? Minsan ngani dai nakapaghaharongharong, nakakua sia nin paagi kada aldaw na magpatotoo nin impormal sa mga nakikiolay sa saiya.
4 An satong mga tugang sa Bosnia kinaipuhan na atubangon an guerra asin kawaran. Alagad ta, regular sindang nagpapadagos na maghulit sa iba. Sa Sarajevo nagpopromedyo an mga parahayag nin 20 oras kada bulan sa paghuhulit, asin nagkokondukta sinda nin promedyong duwang pag-adal sa Biblia kada saro.
5 An hobenes nagpapaheling man nin kaigotan sa ministeryo. An sarong pamilyang Saksi sa Rwanda ilinaog sa sarong kuarto kun saen nag-andam an mga soldados na gadanon sinda. Naghagad nin pagtogot an pamilya na mamibi nguna. Itinao ini, asin an hoben na aking babae, si Deborah, namibi nin makosog: “Jehova, kan semanang ini kami ni Tatay nakapasakamot nin limang magasin. Paano na kami makababalik sa mga tawong ini tangani na tokdoan sinda kan katotoohan asin tabangan sinda na magkamit nin buhay?” Huli sa saiyang marigon na pagtubod asin pagkamoot sa ministeryo, an enterong pamilya nakaligtas.
6 Ngonyan, kaipuhan kitang mag-alisto sa mga oportunidad na magpatotoo asin hanapon an mga “may tamang tendensia sa buhay na daing katapusan.” (Gibo 13:48) Depende sa lokal na mga kamugtakan, iinaareglo nin mga magurang sa kongregasyon an pangrupong pagpatotoo sa mga aga, hapon, o banggi. An mga artikulo sa An Satong Ministeryo sa Kahadean, pansirkitong asamblea, asin pandistritong kombension nagtatao nin napapanahon na mga suhestion asin pagparigon sa boot na makikabtang sa manlaenlaen na paagi nin pagpatotoo sa Kahadean. Dugang pa kaini, pinapatood kan mga paraataman sa sirkito asin distrito an mga parahayag sa paghuhulit sa tinampo, ipinaheheling kun paano mahulit sa komersial na teritoryo, asin itinotokdo an iba pang paagi na makapatotoo saen man may manonompongan na mga tawo. Idinodoon kan gabos na ini an: Dai nin ontok sa pagpahayag kan maogmang bareta!
7 An mga apostol ni Jesus mapusong nagpahayag: “Dai kami puedeng mag-ontok sa pagtaram dapit sa mga bagay na samong naheling asin nadangog.” Paano sinda nagtagal sa ibong nin gabos na olang? Inarang ninda ki Jehova na tabangan sinda, asin “sinda gabos napano kan banal na espiritu asin nagtaram kan tataramon nin Dios na may kapusoan.” (Gibo 4:20, 29, 31) Kun talagang mawot niatong magpahayag kan maogmang bareta na dai nin ontok asin kun naghihingoa kitang gibohon iyan maski sa aroaldaw, tatabangan kita ni Jehova.