Maghulit na Daing Ontok
1 Kun beses, tibaad iniisip niato na an satong teritoryo paorootro asin lubos nang nahuhulitan alagad kakadikit an naghihimate. Pero, igwa nin makosog na mga dahelan na kita padagos na maghulit.—Mat. 28:19, 20.
2 Para sa Pagpatotoo: Ihinula ni Jesus na an paghuhulit kan Kahadean magigin sarong mahalagang kabtang kan may laen-laen na kabtang na tanda “kan pagtatapos kan sistema nin mga bagay” asin na iyan gigibohon “para sa pagpatotoo sa gabos na nasyon.” (Mat. 24:3, 14) Kun naheheling nin mga tawo na nakikikabtang kita sa paghuhulit kan maogmang bareta kan Kahadean, nagtatao ini nin sarong mapuersang patotoo. Pakahale niato sa lugar na hinulitan, an nagkapirang tawo tibaad pag-olayan an satong pagdalaw sa laog nin dakol na oras o aldaw, dawa kun dai sinda naghinanyog sa mensahe. Kun nasasabotan niato an mga dahelan kan satong ministeryo, matabang ini sa sato na magmaigot. Napapaogma niato si Jehova paagi sa pagkaigwa niato nin kabtang sa pag-otob sa hula sa Biblia paagi sa pagpatotoo asin pagpaabot nin nagpapatanid na mensahe.—2 Tes. 1:6-9.
3 Kaipuhan an Pagmamaigot: Huli sa kadakol na disturbo asin kadakol kan nakakaubos sa saindang panahon, kaipuhan niato an pagmamaigot kun naghihingoa kita na pataluboon an saindang interes. Sarong babae an serosemanang sinongko sa laog nin sarong taon bago ini nagdesisyon na padagoson an mga Saksi sa saiyang harong para sa pag-orolay sa Biblia. Nagustohan niang marhay an saiyang nadangog kaya inako nia an pag-adal sa Biblia, nagpoon na mag-atender sa mga pagtiripon, asin dai nahaloy nagsabi na gusto na niang magpabautismo.
4 Marikas na nagbabago an mga kamugtakan sa kinaban, asin iyo man an mga tawo. An dakol na nagsayuma sa pagdalaw niato kan nakaagi tibaad ngonyan mag-ako na kan nakakaginhawang paglaom na ipinapaabot niato. Dawa saro sanang tawo an naghimate sa mensahe kan Kahadean, bawi man an satong pagmamaigot.
5 Sa bilog na kinaban, padakol nang padakol an mga tawong “nag-aaragagha asin nag-aaragrangay huli sa gabos na makauuyam nin makuring bagay na ginigibo.” (Ezeq. 9:4) An mga bunga kan Kahadean nagpapatunay na an mga may matanos na inklinasyon naghihimate sa mensahe kan Kahadean. (Isa. 2:2, 3) Kun siring, padagos kitang maghulit na daing ontok paagi sa mamomoton na pagmamaigot na ‘magdara nin maogmang bareta dapit sa bagay na orog karahay.’—Isa. 52:7; Gibo 5:42.