Tokdoan an mga Limitado an Kakayahan sa Pagbasa
1. Anong kadepisilan an tibaad maeksperyensiahan niato sa ministeryo?
1 Mantang nakikikabtang sa satong ministeryo, kun minsan naeeksperyensiahan niato an kadepisilan nin pagtotokdo kan katotoohan sa mga tawo na nasasakitan na magbasa. Ano an puede niatong gibohon?
2. Paano asin taano ta kita nagpapaheling nin paggalang sa mga limitado an kakayahan sa pagbasa?
2 Igalang Sinda: An mahalaga ki Jehova iyo an kamugtakan kan puso nin sarong tawo, bakong an sekular na edukasyon nia. (1 Sam. 16:7; Tal. 21:2) Kun siring, dai niato minemenos an mga limitado an kakayahan sa pagbasa. Mas posibleng marhay na akoon nin siring na mga tawo an satong tabang kun nagpapaheling kita nin paggalang asin pasensia. (1 Ped. 3:15) Tibaad kalabot dian an dai pagpirit sa tawong iyan na magbasa nin sarong teksto o parapo. Mantang an saro nag-ooswag sa pakanood dapit sa mahalagang marhay na mga katotoohan na nasa Biblia, tibaad mas mawoton nia na mapaoswag an saiyang kakayahan sa pagbasa tanganing maeksperyensiahan an kagayagayahan kan pagbasa sa Tataramon nin Dios “nin pahinghing aldaw asin banggi.”—Sal. 1:2, 3.
3. Anong mga paagi nin pagtotokdo an magagamit tanganing tokdoan an mga limitado an kakayahan sa pagbasa?
3 Mga Paagi nin Pagtotokdo Durante nin mga Pag-adal sa Biblia: An mga retrato sarong marahayon na pantabang sa pagtotokdo asin paggirumdom. Puede nindong hapoton an inaadalan sa Biblia kun ano an masasabi nia manongod sa sarong retrato sa publikasyon na ginagamit nindo. Dangan gumamit nin espesipikong mga hapot tanganing tabangan sia na masabotan kun ano an itinotokdo kan retrato. Gumamit nin mga teksto na nagtotokdo nin espesipikong mga punto na gusto nindong idoon sa retrato. An mga retrato puede man na gamiton tanganing repasohon an leksion. Dai magtokar nin dakolon na punto sa saro sanang pag-adal. Idoon an tema asin pangenot na mga punto kan leksion, saka likayan an pagtokar nin mga puntong mayo sa pinag-aadalan. Direktang basahon sa Biblia an mga teksto, asin gumamit nin mga hapot tanganing masierto na nasasabotan kan inaadalan sa Biblia an binasa. Tibaad makadagdag ini sa pagmawot nia na umoswag sa saiyang kakayahan sa pagbasa tanganing sia na mismo an magsiyasat nin mas dakol pang katotoohan sa Biblia.
4. Paano niato matatabangan an satong inaadalan sa Biblia na umoswag sa saiyang kakayahan sa pagbasa?
4 Mga Pantabang Tanganing Umoswag sa Pagbasa: An mga tawo na limitado an kakayahan sa pagbasa o dai nagkaigwa nin igong oportunidad na makanood na bumasa nin matibay tibaad madali nanggad na makasabot asin makatanda nin impormasyon. Puede nindong dagkahon an siring na mga tawo na gamiton an makukuang mga rekording sa audio kan satong mga publikasyon. An maingat na paghinanyog sa nagbabasa mantang sinusundan iyan sa imprentadong kopya, na inootro pa ngani an mga tataramon sa maluyang boses, makakatabang sa saro na umoswag sa saiyang kakayahan sa pagbasa. Tibaad makatabang man sa saiya an brosyur na Apply Yourself to Reading and Writing. Sa nagkapirang lugar, tibaad iareglo man kan kamagurangan na magkaigwa nin mga klase sa pagbasa sa kongregasyon. An praktikal na mga suhestion na ini tibaad makatabang sa sato sa pagtabang sa mga limitado an kakayahan sa pagbasa na masabotan “an banal na mga kasuratan,” na nakakapagpadonong sa sainda para sa kaligtasan.—2 Tim. 3:15.