Kun Paano Tatabangan an mga Nadidipisilan Magbasa
1. Taano ta bakong madali na magtukdo nin Bibliya sa mga nadidipisilan magbasa?
1 An mga nakakaulay ta sa pagharong-harong na nadidipisilan magbasa posibleng interesado sa espirituwal na mga bagay, pero tibaad nag-aalangan sinda sa Bibliya asin sa iba pang libro. Kun gagamiton an librong Itinotokdo kan Biblia, dawa sa primero pa sana, tibaad daing gayo sinda magdangog. Paano ta sinda puwedeng tabangan sa espirituwal? Naghapot kami sa eksperyensiyadong mga parahayag hali sa labing 20 nasyon kun ano an ginigibo ninda. Mababasa digdi an mga suhestiyon ninda.
2. Anong mga pantabang sa pagtutukdo an epektibong gamiton para sa nadidipisilan magbasa?
2 Kun an tinutukduan mo sa Bibliya dai tatao o daing gayo tataong magbasa, puwede kang magpuon gamit an brosyur na Listen to God o kaya Magdangog sa Dios Asin Mabuhay nin Daing Katapusan. An ginigibo kan sarong payunir sa Estados Unidos, ipinapahiling sa kagharong an duwang brosyur dangan pinapapili kun arin an mas gusto niya. Sinabi sa report kan sangang opisina sa Kenya na an mga pantabang na ini epektibong marhay duman sa sainda huli ta sa Aprika, an pagtutukdo kaidto pa sa mga tawo ginigibo paagi sa pag-uruistorya bako sa hapot-simbagan. Kun edukado an sarong tawo, tibaad magtugot tulos siya na magbasa saka magsimbag, pero para sa daing gayo nakapag-eskuwela tibaad makaalangan iyan. Kun medyo tataong magbasa, gusto kan dakul na parahayag na magpuon sa brosyur na Maogmang Bareta Hale sa Dios! o Puede Kang Magin Katood nin Dios!, o kaya sa An Sakuyang Libro nin mga Istorya sa Bibliya.
3. Tanganing magin epektibo sa pagtutukdo sa mga dai tataong magbasa, ano an kaipuhan tang masabutan manungod sa sainda?
3 Komendaran: Idtong mga dai nakanuod magbasa tibaad nasusupog, asin an dakul sa sainda hababa an paghiling sa sadiri. Sa parati, an pinakainot tang magigibo para maitukdo sa sainda an katotoohan iyo na tabangan sinda na magin pamugtak an buot. An kadaklan sa mga dai tataong magbasa alisto an isip saka nakakanuod. Pahilingan sinda nin angay na paggalang asin trataron nin may dignidad. (1 Ped. 3:15) Kun nahihiling ninda na may serbi an saindang paghihinguwa asin na nag-uuswag sinda sa espirituwal, mapapahiro sinda na magpadagos sa pag-adal. Kaya dai mag-alangan na komendaran sinda.
Idtong mga dai nakanuod magbasa tibaad nasusupog, asin an dakul sa sainda hababa an paghiling sa sadiri. Sa parati, an pinakainot tang magigibo para maitukdo sa sainda an katotoohan iyo na tabangan sinda na magin pamugtak an buot
4. Paano ta madadagka na maghanda sa pag-adal an mga daing gayo tataong magbasa?
4 Dawa pa baga daing gayo tataong magbasa an tinutukduan mo, dagkahon siya na maghanda sa pag-adal nindo. Sa Aprika del Sur, dinadagka kan ibang parahayag an mga tinutukduan ninda na magpatabang sa kapamilya o amigo na marahay magbasa. Tanganing madagka kan sarong parahayag sa Britania an mga tinutukduan niya na maghanda sa pag-adal ninda, ipinapasubli niya nguna an saiyang libro sagkod sa pirang parapo pag nag-aadal sinda tanganing mahiling ninda na mas madaling mahanap an mga simbag pag may kurit. Dinadagka man kan sarong brother sa India an mga tinutukduan niya na hilingon an mga ritrato na yaon sa sunod na pag-aadalan ninda asin hurop-hurupon na iyan.
5. Paano ta maipapahiling an pagpapasensiya pag nagtutukdo nin Bibliya?
5 Magin Mapasensiya: Ano man an ginagamit mong publikasyon, magkonsentrar sa panginot na mga punto, asin tabangan an tinutukduan mo na masabutan ining marhay. Sa primero, mas marahay na makipag-ulay sana nin mga 10 sagkod 15 minutos. Dai magtukar nin kadakul na impormasyon, tibaad tama na an pira sanang parapo kada pag-adal nindo. Magin mapasensiya kun luway-luway siyang magbasa. Posibleng marhay na mapahiro siyang pakarhayon pa an pagbasa mantang mas naaapresyar niya si Jehova. Para matabangan siyang magibo iyan, marahay kun sa puon pa sana agdahon na siyang mag-atender sa mga pagtiripon.
6. Paano ta puwedeng tabangan an saro na makanuod magbasa?
6 Pag nakanuod magbasa an tinutukduan sa Bibliya, madali sindang mauswag sa espirituwal. (Sal. 1:1-3) Natabangan nin dakul an mga tinutukduan ninda paagi sa paggamit kan publikasyon na Apply Yourself to Reading and Writing sa laog nin pirang minuto sa katapusan kan kada pag-adal ninda. Kun pangluyahan nin buot an tinutukduan mo, mapapakusog mo siya kun iduduon mo an mga bagay na nakaya niyang gibuhon. Aseguraron siya na bebendisyunan ni Jehova an paghihinguwa niya, asin dagkahon siya na mamibi para sa tabang. (Tal. 16:3; 1 Juan 5:14, 15) Dinadagka kan ibang parahayag sa Britania an mga tinutukduan ninda na magkaigwa nin rasonable pero progresibong mga pasuhan—puwedeng pagtuom nguna kan alpabeto, dangan paghanap nin mga teksto saka pagbasa kaiyan, tapos pagbasa kan mga publikasyon ta sa pinasimpleng edisyon. Sa pagtabang sa iba na makanuod magbasa, sa parati kaipuhan na mapahiro sinda na magkaigwa nin pagmawot na gibuhon iyan, bako sanang itukdo kun paano.
7. Taano ta dai kita dapat mag-alangan na ipaabot man an katotoohan sa mga nadidipisilan magbasa?
7 Dai minemenos ni Jehova an mga daing gayo nakapag-eskuwela. (Job 34:19) An pighihiling ni Jehova iyo an puso. (1 Cron. 28:9) Kaya dai mag-alangan na ipaabot man an katotoohan sa mga nadidipisilan magbasa. Kadakul nin magagayon na pantabang sa pagtutukdo an magagamit mo. Pag-abot nin panahon, puwede mo nang ibalyo sa librong Itinotokdo kan Biblia asin tabangan siyang magkaigwa nin mas mahiwas na pakasabot sa Kasuratan.