Magtokdo sa Simpleng Paagi
1. Ano an sarong importanteng aspekto nin malinaw asin epektibong pagtotokdo?
1 An pagigin simple iyo an pangenot na kaipuhan sa epektibong pagtotokdo. An pag-estudyar sa paagi nin pagtotokdo kan Dakulang Paratokdo, si Jesus, makakatabang sa sato na mapaoswag an satong “abilidad sa pagtotokdo.”—2 Tim. 4:2; Juan 13:13.
2. Ano an kalabot kun nagtotokdo sa simpleng paagi, asin ano an mga epekto nin siring na pagtotokdo?
2 Magtaram sa Simpleng Paagi: An Sermon sa Bukid igwa kan nagkapira sa pinakahararom na mga katotoohan na itinaram nin tawo kasuarin man, na gabos ipinahayag sa simpleng paagi. (Mat., kap. 5-7) An mga kadaklan na naghihinanyog ki Jesus “nagngalas nin labi-labi sa saiyang paagi nin pagtotokdo.” An mga opisyal na sinugo tanganing arestaron sia napahiro na magsabi: “Mayo pa nin ibang tawo na nagtaram nin arog kaini.” (Mat. 7:28, 29; Juan 7:46) Dai niato kaipuhan na maggamit nin harararom na tataramon, komplikadong mga frase, o detalyadong mga ilustrasyon tanganing an katotoohan magin lubos na nakakakombensir sa iba. An katotoohan malinaw na ikakatokdo paagi sa paggamit nin pamilyar na mga termino.
3. Taano ta an nagkapira may tendensiang paoranan nin impormasyon an mga nagdadangog sa sainda, asin paano ini malilikayan?
3 Determinaran Kun Gurano Kadakol na Impormasyon an Itatao: Kinonsiderar ni Jesus an mga nagdadangog sa saiya sa pagdeterminar kun gurano kadakol na impormasyon an itatao nia sa sainda sa sarong panahon. (Juan 16:12) Dapat kitang magin mapagmasid asin madaling makibagay sa mga nakakaolay niato, lalo na kun nagpapatotoo sa mga paryente, bagong mga interesado, o mga aki. Maninigo kitang mag-ingat na dai sinda paoranan nin impormasyon dawa kun sinda garo baga atentong naghihinanyog. An mga sadiosan an puso padagos na magkukua nin kaaraman dapit sa tunay na Dios, si Jehova.—Juan 17:3; 1 Cor. 3:6.
4. Taano ta kapakipakinabang na magkonsentrar sa pangenot na mga punto imbes na sa mga detalye?
4 Magkonsentrar sa Pangenot na mga Punto: Dai ni Jesus ginibong komplikado an saiyang katokdoan paagi sa pagsambit nin dakolon na detalye. Kan sabihon nia: “An gabos na nasa mga lolobngan na girumdoman . . . maruluwas,” bako idtong panahon na ipaliwanag nia an dapit sa duwang kaaabtan kan mga binuhay liwat. (Juan 5:28, 29) Kun nagkokondukta nin mga pag-adal sa Biblia, maninigo kitang magkonsentrar sa pangenot na mga punto asin pugolan niato an tendensia na sambiton sa pag-orolay an dai kinakaipuhan na mga detalye.
5. Anong bendisyon an makakamtan niato kun nagtotokdo kita sa simpleng paagi?
5 Nagpapasalamat nanggad kita na itinotokdo ni Jehova sa simpleng paagi an gabos na kaipuhan niatong maaraman! (Mat. 11:25) Logod na magtokdo kita sa simpleng paagi asin maeksperyensiahan niato an mga kagayagayahan sa pagkaigwa nin mabungang ministeryo.