Tolong Suhestion Tanganing Mapaoswag an Saindong Paagi nin Pagtotokdo
1. Taano ta maninigo niatong hingoahon na mapaoswag an satong paagi nin pagtotokdo?
1 An gabos na Kristianong ministro mga paratokdo. Baga man kita naggigibo nin enot na pagdalaw, nagdadalaw liwat tanganing kultibaron an interes, o nagkokondukta nin pag-adal sa Biblia, kita nagtatao nin impormasyon. Asin an itinotokdo tang impormasyon bakong ordinaryo. Ipinapaliwanag niato an ‘banal na mga kasuratan,’ na nagpapangyari sa mga tawo na magin ‘madonong para sa kaligtasan.’ (2 Tim. 3:15) Pambihirang pribilehio nanggad! Uni an tolong suhestion tanganing mapaoswag an satong paagi nin pagtotokdo.
2. Paano kita makakapagtokdo sa simpleng paagi?
2 Pagigin Simple: Kun aram tang marhay an sarong tema, madali sanang malingawan kun gurano iyan kakomplikado para sa saro na dai gayong aram iyan. Kaya kun nagkokondukta nin pag-adal sa Biblia, dai maggamit sa pagtotokdo mo nin kadakol na detalyeng dai man kaipuhan. Imbes, itampok an pangenot na mga punto. An paggamit nin kadakol na tataramon dai man pirmeng nangangahulogan nin mas marahay na pagtotokdo. (Tal. 10:19) Sa pangkagabsan, pinakamarahay na an pangenot na mga teksto sana an basahon. Pakabasa nin sarong teksto, magkonsentrar sana sa kabtang kaiyan na konektado sa pinag-oolayan. An Sermon sa Bukid, na nakarekord sa Mateo kapitulo 5 sagkod 7, igwa nin hararomon na mga katotoohan, alagad ta si Jesus nagtokdo sa simpleng paagi na dikit sanang tataramon an ginamit.
3. Ano an kahalagahan nin mga ilustrasyon, asin ano an parateng pinakaepektibo?
3 Mga Ilustrasyon: An mga ilustrasyon nakakapukaw nin isip, nakakapahiro nin emosyon, asin nakakatabang sa memorya. Dai pag-isipon na kaipuhan mong magin paraestorya tangani na makatao nin epektibong mga ilustrasyon. Si Jesus parateng naggagamit nin halipot asin bakong komplikadong mga ilustrasyon. (Mat. 7:3-5; 18:2-4) Puede man na magin kapakipakinabang na marhay an simpleng mga drowing sa kapidasong papel. Paagi sa dikit na pagplano antes pa, makakaisip ka nin epektibong mga ilustrasyon.
4. Paano niato epektibong magagamit an mga hapot?
4 Mga Hapot: An mga hapot naghahagad sa mga tinotokdoan mo na mag-isip. Kun siring, magin mapasensia pagkatapos mong maghapot. Kun itatao mo tolos an simbag, dai mo talaga maaaraman kun ano an nasasabotan kan saimong tinotokdoan. Imbes na ikorehir sana sia kun sala an simbag nia, mas marahay na giyahan sia sa tamang kongklusyon paagi sa pagbangon nin dagdag na mga hapot. (Mat. 17:24-27) Siempre, mayo sa sato nin perpektong paratokdo. Huli kaiyan, dinadagka kita kan Biblia na pirmeng tawan nin atension an satong pagtotokdo. An paggibo niato kaiyan matao nin daing katapusan na pakinabang sa sato asin sa mga naghihinanyog sa sato.—1 Tim. 4:16