Nasasabotan nin Iba

KUN kamo nagtataram, dai sana kamo mag-atubang nin impormasyon. Hingoahon na masabotan kan mga naghihinanyog an saindong sinasabi. Makatatabang ini sa saindo na epektibong makakomunikar, baga man kamo nagtataram sa kongregasyon o sa mga bakong Saksi.

Kadakol kan aspekto nin nasasabotan na pagtaram. An nagkapira kaiyan trinatar sa Leksion 26, “Lohikong Pagbilog kan Materyales.” An iba pinag-olayan sa Leksion 30, “Pagpaheling nin Interes sa Kaolay.” Sa leksion na ini, pag-oolayan niato an pira pang dagdag na punto.

Simpleng mga Tataramon, Pagigin Simple kan Estilo. An simpleng mga tataramon asin haralipot na sentence epektibong marhay na mga kasangkapan sa pagkomunikar. An Sermon sa Bukid ni Jesus matibayon na halimbawa nin pahayag na nasasabotan nin mga tawo siisay man sinda o saen man sinda nag-iistar. Tibaad bago sa sainda an mga ideya. Pero, nasasabotan ninda an sinabi ni Jesus ta an trinatar nia mga bagay na may labot sa sato gabos: kun paano magigin maogma, kun paano papakarhayon an relasyon sa iba, kun paano aatubangon an kahaditan, asin kun paano makakanompong nin kahulogan sa buhay. Asin ipinahayag nia an mga nasa isip nia sa realistikong pananaram. (Mat., kap. 5-7) Siempre, an Biblia nagtatao nin dakol na halimbawa sa laen-laen na laba asin estruktura nin mga sentence. An maninigong magin prinsipal na obheto nindo ipahayag an mga ideya sa malinaw, nasasabotan na paagi.

Dawa kun hararom an tinotokar nindo, an pagigin simple kan estilo makatatabang na iyan magin mas pasil na masabotan. Paano magigibo an pagigin simple? Dai pagabatan nin mga detalyeng dai kaipuhan an mga nagdadangog sa saindo. Organisaron an materyales nindo tangani na kompletohon kaiyan an prinsipal na mga punto nindo. Maingat na pilion an mayor na mga teksto nindo. Imbes na maghidali hale sa sarong teksto pasiring sa saro pa, basahon asin tokaron an mga ini. Dai pagtahoban nin kadakoldakol na tataramon an sarong marahay na ideya.

Kun pinamamayohan nindo an sarong pag-adal sa Biblia, iaplikar an iyo man sanang mga prinsipyong iyan. Dai pagprobaran na ieksplikar an gabos na detalye. Tabangan an inaadalan na malinaw na masabotan an prinsipal na mga ideya. Sa huri, sa personal na pag-adal asin mga pagtiripon kan kongregasyon, manonodan na nia an mga detalye.

Tangani na ikaatubang an materyales sa simpleng paagi, kaipuhan an marahay na pag-andam. Dapat na nasasabotan mismo nindo nin malinaw an saindong tema tangani na ikapasabot nindo iyan sa iba. Kun talagang nasasabotan nindo an sarong bagay, nakakatao kamo nin mga rason kun taano iyan ta siring. Ikinakapahayag man nindo iyan sa sadiri nindong tataramon.

Ieksplikar an mga Terminong Bakong Pamilyar. Kun beses an paggibo sa mga bagay na nasasabotan naghahagad na ieksplikar nindo an kahulogan nin mga termino na bakong pamilyar sa mga nagdadangog sa saindo. Dai pagpasobrahan an kalkulo sa kaaraman kan mga nagdadangog sa saindo, alagad dai magkulang sa pagkalkulo kan saindang intelihensia. Bilang resulta kan saindong pag-adal sa Biblia, tibaad may ginagamit kamong mga termino na bakong pamilyar sa ibang tawo. Kun mayo nin eksplikasyon, an mga bakong kaasosyar kan Mga Saksi ni Jehova dai makasasabot na an “natatada,” “fiel asin may diskresion na oripon,” “ibang karnero,” asin “dakulang kadaklan” ngaran nin espesipikong grupo nin mga tawo. (Roma 11:5; Mat. 24:45; Juan 10:16; Kap. 7:9) Kaagid kaiyan, kun an tawo bakong pamilyar sa organisasyon kan Mga Saksi ni Jehova, dai nia gayod masasabotan kun ano an boot sabihon kan mga termino na arog kan “parahayag,” “payunir,” “paraataman sa sirkito,” asin “Memorial.”

An nagkapirang ekspresyon sa Biblia na ginagamit dawa nin mga bakong Saksi tibaad kaipuhan na ieksplikar. Para sa dakol, an “Armagedon” nangangahulogan nin nuklear na biyong pagkatunaw. Tibaad iasosyar ninda an “Kahadean nin Dios” sa sarong kamugtakan sa boot nin sarong tawo o sa langit alagad bakong sa sarong gobyerno. An pagkasambit sa “kalag” tibaad pumukaw nin pakaisip sa espirituwal daang kabtang nin tawo na natatada pagkagadan kan hawak. Segun sa itinokdo sa minilyon na tawo, an “banal na espiritu” sarong persona, kabtang nin sarong Trinidad. Huli ta kadakol na kan nagbaya sa moral na pamantayan kan Biblia, tibaad kaipuhan pa ngani nindang tabangan na masabotan an boot sabihon kan Biblia sa pagsabi kaiyan na: “Dumulag kamo sa pakikisaro.”​—1 Cor. 6:18.

Apuera sana kun an tawo regular na nagbabasa kan Biblia, tibaad masala sinda sa pagsabot kun an sasabihon sana nindo, “Isinurat ni Pablo . . .” o “Sabi ni Lucas . . .” Tibaad may mga katood o kataed sinda na iyan an ngaran. Tibaad kaipuhan na dagdagan nindo nin nag-eeksplikar na ekspresyon tangani na ikapamidbid an saro bilang Kristianong apostol o kagsurat kan Biblia.

An mga nagdadangog sa presenteng panahon parateng nagkakaipo nin tabang na masabotan an mga teksto na may mga sokol o kostumbre kan suanoy na mga panahon. Halimbawa, an sinasabi na an dahong ni Noe 300 na sokol sa siko an laba, 50 sokol sa siko an lakbang, asin 30 sokol sa siko an langkaw tibaad kadikiton an kahulogan para sa sainda. (Gen. 6:15) Alagad kun ilaladawan nindo an mga sokol na iyan may koneksion sa sarong pamilyar na edipisyong tinatandaanan sa lugar na iyan, maiimahinar tolos kan mga nagdadangog sa saindo kun gurano kadakula an dahong.

Itao an Kinakaipuhan na Eksplikasyon. Tangani na magin malinaw sa mga nagdadangog sa saindo an sarong bagay, tibaad an kaipuhan bako sanang tamang pakahulogan sa sarong termino. Sa Jerusalem kan kaaldawan ni Esdras, an pagbasa kan Ley may kaibang eksplikasyon. Tanganing matabangan an banwaan na masabotan an kahulogan kaiyan, an mga Levita nagtao nin interpretasyon saka pag-aplikar kan Ley sa mga kamugtakan na inaatubang kan banwaan kan panahon na idto. (Neh. 8:8, 12) Sa kaagid na paagi, tawan nin panahon an pag-eksplikar asin pag-aplikar kan mga teksto na binasa nindo.

Pagkagadan asin pagkabuhay nia liwat, iineksplikar ni Jesus sa mga disipulo nia na an nangyari pa sana kaotoban kan Kasuratan. Idinoon man nia an paninimbagan ninda bilang mga saksi sa mga bagay na idto. (Luc. 24:44-48) Kun tinatabangan nindo an mga tawo na masabotan kun paano maninigong makaimpluwensia sa mismong buhay ninda an itinokdo sa sainda, mas madali nindang masasabotan kun ano talaga an kahulogan kaiyan.

Kun Paano Napapalabot an Puso. Siempre, dawa malinaw an eksplikasyon nindo, may ibang bagay na puedeng makaimpluwensia kun baga makasasabot o dai an kaolay nindo. Kun dai nag-aako an puso nin sarong tawo, kaolangan iyan sa pagsabot nia sa sinasabi. (Mat. 13:13-15) Para sa mga determinadong helingon sana an mga bagay sa pisikal na punto de vista, kamangmangan an espirituwal na mga bagay. (1 Cor. 2:14) Kun an tawo magpaheling nin siring na espiritu, tibaad madonong na taposon na sana an orolay​—kisuerra sa panahon na iyan.

Pero, sa nagkapirang kaso dai nag-aako an puso huli sa masakit na mga kamugtakan sa buhay. Kun magkaoportunidad na makadangog kan katotoohan sa Biblia sa halawig na panahon, tibaad mag-ako na an puso kan siring na tawo. Kan sabihan ni Jesus an saiyang mga apostol na sia hahampakon asin gagadanon, dai sinda nakasabot. Taano ta dai? Bako idto an inaasahan ninda asin bako nanggad idto an gusto ninda! (Luc. 18:31-34) Minsan siring, pag-abot nin panahon, 11 sa mga apostol na idto an nakasabot, asin ipinaheling ninda iyan paagi sa paggawe kaoyon kan itinokdo sa sainda ni Jesus.

Epekto nin Marahay na Halimbawa. An mga tawo natatabangan na makasabot bako sanang kan satong mga tataramon kundi pati kan satong mga gawe-gawe. Mapadapit sa enot nindang pagduman sa Kingdom Hall, dakol an nagsasabi na an nagigirumdoman ninda an pagkamoot na risang-risa, bakong an sinabi. Kaagid kaiyan, an kaogmahan na ipinaheheling niato nakatabang sa dakol na kagharong na buksan an isip ninda sa katotoohan sa Biblia. Huli sa pakaheling kan mamomoton na kabootan na ipinaheheling kan banwaan ni Jehova sa lambang saro asin kan maboot na konsiderasyon sa iba kun napapaatubang sa mga problema nagkonklusyon an nagkapira na nasa mga Saksi an tunay na relihion. Kaya mantang naghihingoa kamo na tabangan an mga tawo na masabotan an katotoohan sa Biblia, isipon an paagi nin pag-eksplikar nindo kaiyan asin an saindong halimbawa.