Kita mga Saksi sa Gabos na Panahon
1. Ano an satong manonodan sa pagpatotoo ni Jesus sa babae sa may bubon?
1 Dakol na oras nang naglakaw si Jesus. Sia pagal asin paha. Kan an saiyang mga disipulo maghale tanganing magbakal nin kakanon, sia nagtukaw tanganing magpahingalo sa may bubon sa luwas nin sarong siudad sa Samaria. Si Jesus dai nagduman sa Samaria tanganing maghulit; sia nag-agi sana dian kan pasiring sia sa Galilea tanganing ipadagos duman an saiyang ministeryo. Minsan siring, inaprobetsaran nia an oportunidad na magpatotoo sa sarong babae na nagsasakdo. (Juan 4:5-14) Taano? Si Jesus nungkang nagpondo bilang “maimbod asin totoong saksi” ni Jehova. (Kap. 3:14) Inaarog niato si Jesus paagi sa pagigin Saksi ni Jehova sa gabos na panahon.—1 Ped. 2:21.
2. Paano kita puedeng mag-andam na magpatotoo nin impormal?
2 Magin Andam: Puede kitang magin andam na magpatotoo nin impormal paagi sa pagdara nin literatura. Dakol na parahayag an nagdadara nin mga pulyeto asin itinatao iyan sa mga tindera, nagtatrabaho sa gasolinahan, asin iba pa na nanonompongan ninda sa bilog na aldaw. (Ecl. 11:6) Sinisierto nin sarong tugang na babae na parateng nagbibiahe na pirme siang may darang sadit na Biblia asin librong Itinotokdo kan Biblia sa saiyang sadit na bag, asin nagmamaigot siang makapoon nin pakikipag-olay sa mga kataed nia sa tukawan.
3. Paano kita puedeng makapoon nin pakikipag-olay?
3 Pumoon nin Pakikipag-olay: Kun nagpapatotoo nin impormal, dai nguna niato kaipuhan na mag-introdusir nin sono sa Kasuratan na tema. Dai pinonan ni Jesus an pakikipag-olay sa babae sa may bubon paagi sa pagpamidbid na sia an Mesiyas. Naghagad sana sia nin maiinom, na pinupukaw an interes kan babae. (Juan 4:7-9) Nanompongan nin sarong tugang na babae na an kaparehong paagi nakatabang sa saiya na pumoon nin pakikipag-olay kun may naghahapot sa saiya kun baga nagseselebrar sia nin kapiestahan. Imbes na magsabing dai sia nagseselebrar huling saro sia sa Mga Saksi ni Jehova, sia nagsasabi, “Ginusto ko mismo na dai magselebrar.” An nagngangalas na tawong naghapot parateng naghahapot kun taano, kaya nakakapagpatotoo an tugang.
4. Taano ta nakakamotibar sa saimo an Mateo 28:18-20?
4 Minsan ngani natapos ni Jesus an saiyang maigot na ministeryo sa daga, sia padagos na interesadong marhay sa paghuhulit ngonyan na arog kan ginibo nia. (Mat. 28:18-20) Kun siring, arog kan satong Arogan na si Jesus, kita mga Saksi na andam na ipahayag sa publiko an satong pagtubod ano man na oras.—Heb. 10:23.