Hapot
◼ Maninigo daw na ipalakop kan mga Saksi ni Jehova an mga rekording o isinurat na mga kopya nin mga pahayag?
Kita napapakosog asin napaparigon kan mga pahayag sa Biblia. (Gibo 15:32) Kun siring, natural sana na gusto niatong ihiras sa mga bakong presente an siring na nakakaparigon sa boot na impormasyon. Huli sa naimbentong laen-laen na aparatong pangrekord, madalion na sanang irekord asin idistribwir sa iba an sarong pahayag. An nagkapira igwa nin koleksion kan irinekord na mga pahayag, kaiba an mga pahayag na itinao dakol na taon na an nakaagi, asin marahay man an intension na ipinapasubli ninda an mga pahayag na ini o rinereprodusir ini para sa mga katood. An iba naggibo nin mga Web site asin ilinaag dian an mga pahayag na puedeng i-download nin siisay man.
Siempre, mayo man nin sala kun marekord kita nin mga pahayag para sa sato o para sa mga miembro kan satong pamilya. Dugang pa, puedeng iareglo kan kamagurangan na iparekord an mga pahayag para sa may helang na mga miembro kan kongregasyon na dai makaatender sa mga pagtiripon. Minsan siring, may marahay na mga dahelan na dai niato ipalakop an siring na mga isinurat na kopya o rekording nin mga pahayag.
Huling an mga pahayag parateng itinatao na nasa isip an lokal na mga pangangaipo, madali sanang masala kita sa pag-interpretar sa mga punto hale sa ipinalakop na rekording, dahel sa dai niato aram an kamugtakan kan itao an pahayag. Apuera dian, magigin depisil na siertohon kun siisay an nagtao kan pahayag asin kun kasuarin iyan itinao, kaya dai kita magkakaigwa nin kompiansa na pinakabago asin eksakto an impormasyon na iprinesentar. (Luc. 1:1-4) Dugang pa, an pagpalakop nin mga isinurat na kopya o rekording nin mga pahayag tibaad makatentar sa nagkapira na magtao o mag-ako nin sobrang atension asin onra.—1 Cor. 3:5-7.
An maimbod asin mapagmansay na oripon nagmamaigot na marhay na magtao nin “igong” espirituwal na kakanon sa “tamang panahon.” (Luc. 12:42) Kaiba digdi an areglo na pagtao nin mga pahayag sa lokal na mga kongregasyon kan Mga Saksi ni Jehova asin mga rekording sa audio na puedeng i-download sa opisyal na Web site na jw.org. Makakasarig kita na itatao kan maimbod asin mapagmansay na oripon saka kan Namamahalang Grupo kaiyan an kaipuhan niato tanganing maparigon sa pagtubod.—Gibo 16:4, 5.