Kun Paano Gagamiton an mga Audio Rekording
1. Apuwera sa imprentadong mga publikasyon, ano pang kapaki-pakinabang na probisyon an igwa kita?
1 Ginagamit kan dakul an jw.org para magbasa nin marahayon asin tamang mga tataramon nin katotoohan. (Par. 12:10) Pero, nagamit na daw nindo an mga audio rekording diyan? Paagi kaiyan, madadangog ta an kadakul na impormasyon na yaon sa satong website. Paano kita puwedeng makinabang sa mga audio rekording?
2. Paano ta magagamit an mga audio rekording sa satong personal o pampamilyang pag-adal?
2 Para sa Personal o Pampamilyang Pag-adal: An pagdangog sa mga audio rekording kan pagbasa sa Bibliya, mga magasin, o sarong publikasyon mantang nagbibiyahe o ano man an ginigibo ta, makakatabang na magamit ta nin mas marahay an satong panahon. (Efe. 5:15, 16) Sa satong pampamilyang pagsamba, puwede kitang magdangog nin audio rekording mantang sinusundan iyan sa satong kopya. Sa satong personal na pag-adal, makakatabang man iyan lalo na kun gusto tang mapauswag an satong pagbasa o kun nag-aadal kita nin ibang lengguwahe.
3. Sa satong teritoryo, siisay an puwedeng makinabang sa mga audio rekording?
3 Para sa Ministeryo: An mga tawo sa satong teritoryo na nagsasabing dai na sindang panahon para magbasa puwedeng magustuhan na magdangog nin mga audio rekording. O tibaad may makaulay kita na iba an lengguwahe asin posibleng magkainteres kun madangog ninda an mensahe kan Kahadian sa “sadiri [nindang] tataramon.” (Gui. 2:6-8) Mahalagang marhay sa kultura kan ibang lugar an paghinanyog. Halimbawa, napagkatudan na kan mga Hmong na berbal na ipasa sa mas hoben na henerasyon an saindang kasaysayan asin mahusay sinda sa pagtanda kaiyan. Sa dakul na kultura sa Aprika, nakakanuod man an mga tawo paagi sa pag-istorya.
4. Ano an mga puwede tang ihapot sa satong sadiri manungod sa pagtabang sa mga tawo sa satong teritoryo?
4 Sa teritoryo, makakatabang daw kun mag-play kita nin sarong audio rekording sa lengguwahe kan kagharong? May makikinabang daw sa ipapadara ta sa e-mail na audio nin sarong publikasyon? Puwede ta daw i-download sa CD an audio nin sarong publikasyon asin itao iyan sa sarong interesado, na tibaad kaiba an imprentadong kopya kaiyan? An kada kumpletong audio rekording nin sarong libro, brosyur, magasin, o tract na naitao ta sa ministeryo puwedeng iiba sa satong report nin paglilingkod. Dinisenyo an mga audio rekording para magamit ta sa satong personal na pag-adal asin sa pagsabwag nin banhi nin katotoohan dapit sa Kahadian.—1 Cor. 3:6.