Simple daw an Saindong Mata?

1. Ano an kahulogan kan pagkaigwa nin ‘simpleng mata’?

¹ Nakakaimpluwensia sa satong mga gibo kun saen nakapokus an satong mga mata. Angay nanggad an mga tataramon ni Jesus: “Kun siring, kun an saimong mata simple, an saimong bilog na hawak magigin maliwanag”! (Mat. 6:22) Kun an satong mata “simple” sa espirituwal na paagi, iyan nakapokus sa saro sanang katuyohan—an paggibo kan kabotan nin Dios. Ineenot niato an Kahadean asin dai kita nadidisturbo kan dai kaipuhan na materyal na mga bagay o mga aktibidad na nakakaolang sa ministeryo.

2. Ano an puedeng makabiribid sa satong pagmansay, alagad ano an makakatabang sa sato?

² Kaipuhan an Pagsiyasat sa Sadiri: An satong pagmansay puedeng mabiribid huli sa sinasabi sa sato kan mga anunsio sa media kun ano an kaipuhan niato o huli sa mga bagay na igwa an iba. Bago niato pagmaigotan na gibohon o bakalon an sarong bagay na mangangaipo nin dakol na panahon, kuarta, o kosog, marahay na ‘kuentahon an gastos’ paagi sa paghapot sa satong sadiri, ‘Mapapaoswag daw kaini an sakong paglilingkod ki Jehova o makakaolang iyan?’ (Luc. 14:28; Fil. 1:9-11) Madonong man na isip-isipon sa panapanahon kun paano niato mapapasimple pa an satong buhay tanganing orog pa an magibo niato sa ministeryo.—2 Cor. 13:5; Efe. 5:10.

3. Ano an manonodan niato sa sarong tugang na babae na naggibo nin mga pagliliwat tanganing pasimplehon an saiyang buhay?

³ Kan magpoon na magregular payunir an sarong tugang na babae, pinili niang magdanay sa saiyang bilog na panahon na trabaho minsan ngani an por ora sanang trabaho makakatao na nin supisyenteng kuarta para sa saiyang mga pangangaipo. Kan huri, sia nagkongklusyon: “Mayo nin siisay man na makakapaglingkod sa duwang kagurangnan. Kaipuhan kong isakripisyo an sakong mga gusto tanganing maasikaso an sakong mga pangangaipo. Narealisar ko na an materyal na mga bagay naluluma sana asin papagalon ko nin sobra an sakong sadiri sa pagmamaigot na makua iyan.” Itinogot kan saiyang mga kamugtakan na makagibo sia nin mga pagliliwat tanganing pasimplehon an saiyang buhay asin makakua nin ibang trabaho, na nagtotogot sa saiya na makapagpadagos sa pagpapayunir.

4. Taano ta importanteng papagdanayon niato ngonyan an simpleng mata?

⁴ Huli sa pagkaapurado kan satong panahon, orog pa nganing importante na papagdanayon niato an simpleng mata. Sa kada aldaw na minalihis, kita nagigin mas harani nin sarong aldaw sa katapusan kan sistemang ini nin mga bagay asin sa pagpopoon kan bagong kinaban nin Dios. (1 Cor. 7:29, 31) Paagi sa pagpokus sa paghuhulit, ikakaligtas niato an satong sadiri sagkod an mga naghihinanyog sa sato.—1 Tim. 4:16.