Papagdanayon na Simple an Saindong Mata
1. Ano an kahulogan kan pagkaigwa nin simpleng mata, asin taano ta importante ini?
1 Sa saiyang Sermon sa Bukid, dinara ni Jesus an atension sa puedeng magin dakulaon na impluwensia kan piguratibo o espirituwal na mata sa satong bilog na pamumuhay. Sia nagsabi: “Kun siring, kun an saimong mata simple, an saimong bilog na hawak magigin maliwanag; alagad kun an saimong mata maraot, an saimong bilog na hawak magigin madiklom.” (Mat. 6:22, 23) An simpleng mata nakapokus sa saro sanang katuyohan—an paggibo kan kabotan nin Dios—na dai nadidisturbo nin dai maninigong kahaditan sa materyal na mga bagay. (Mat. 6:19-21, 24-33) Ano an makakatabang sa sato na mapagdanay an simpleng mata?
2. Anong pagmansay sa materyal na mga bagay an ineenkaminar kan Tataramon nin Dios?
2 Pagkultibar nin Pagkakontento: Sono sa Kasuratan na obligasyon an pagsustento nin igo sa mga pangangaipo kan pamilya. (1 Tim. 5:8) Alagad dai ini nagkakaipo nin daing katapusan na pagparahanap niato kan pinakamarahay asin pinakabagong mga bagay. (Tal. 27:20; 30:8, 9) Imbes, sinasadol kita kan Kasuratan na makontento na sa “kakanon asin gubing,” an mga pangangaipo sa buhay. (1 Tim. 6:8; Heb. 13:5, 6) An paghimate sa hatol na ini makakatabang sa sato na papagdanayon an satong mata na nasa tamang pokus.
3. Ano an makakatabang sa sato na malikayan an mga pagabat na kagigibohan ta man sana?
3 Madonong na likayan niato na pagabatan an satong sadiri nin dai kaipuhan na utang asin nin mga rogaring o okupasyon na nagkakaipo nin dakol na panahon asin atension. (1 Tim. 6:9, 10) Paano daw niato magigibo ini? Kun may pinaplano kamong gibohon, mapagngayongayong turotimbangon an bagay na iyan asin sadiosan na siyasaton kun baga makakaolang iyan sa espirituwal na mga aktibidad. Magin determinado na papagdanayon na enot sa saindong buhay an espirituwal na mga bagay.—Fil. 1:10; 4:6, 7.
4. Taano ta maninigo kitang humanap nin mga paagi na gibohon na simple an satong estilo nin pamumuhay?
4 Gibohon na Simple an Saindong Estilo nin Pamumuhay: An saro pang tabang tangani na mapaglabanan an pagkaakit sa materyalismo iyo an paghanap nin mga paagi na gibohon na simple an saindong estilo nin pamumuhay. An sarong tugang na lalaki, na nanompongan na mahihimong mabuhay kan saiyang pamilya dawa mayo nin sobrang materyal na mga bagay, nagsabi: “Mas dakol na akong magigibo ngonyan sa kongregasyon tangani na mapaglingkodan an sakong mga tugang. Kombensido ako na binebendisyonan ni Jehova an gabos niang lingkod kun ineenot ninda an tunay na pagsamba kisa personal na intereses.” Puede daw kamong magkamit nin mas dakula pang mga bendisyon paagi sa paggibong simple kan saindong estilo nin pamumuhay?
5. Taano ta kaipuhan an dayaday na paghihingoa sa pagpadanay na simple kan satong mata?
5 Kaipuhan an dayaday na paghihingoa tangani na mapaglabanan an impluwensia ni Satanas, an saiyang materyalistikong kinaban, asin an sato mismong bakong sangkap na laman. Imbes na togotan na maglagawlagaw an satong mga mata, ipokus niato iyan sa paggibo kan kabotan nin Dios asin sa satong mahalagang marhay na paglaom na buhay na daing katapusan.—Tal. 4:25; 2 Cor. 4:18.