An Satong Prioridad

1. Paano ipinaheling ni Jesus na mahalaga sa saiya an ministeryo?

¹ An ministeryo iyo an prioridad ni Jesus kaidto. Ginibo nia an saiyang lubos na makakaya, na naglalakaw nin ginatos na kilometro sa bilog na Palestina tanganing hulitan an pinakadakol na mapupuede. Pinagdanay niang simple an saiyang buhay tanganing makatao nin mas dakol na panahon asin atension sa ministeryo. (Mat. 8:20) Kan probaran kan mga kadaklan na pugolan siang humale tanganing paomayan nia an mga may helang sa sainda, sia nagsabi: “Dapat na ipahayag ko sa iba pa man na mga siudad an maogmang bareta kan kahadean nin Dios, huli ta dahel kaini ako isinugo.”—Lucas 4:43.

2. Taano ta mahalagang marhay ki Jesus an ministeryo?

² Taano ta mahalagang marhay ki Jesus an ministeryo? An pangenot na nasa isip nia iyo an pagpakangbanal kan ngaran ni Jehova. (Mat. 6:9) Namomotan nia an saiyang langitnon na Ama kaya nagmamawot sia na gibohon an boot Nia asin kuyogon an lambang togon Nia. (Juan 14:31) Dugang pa, igwa sia nin tunay na pagmakolog sa mga tawo asin gusto niang tabangan sinda.—Mat. 9:36, 37.

3. Paano niato puedeng ipaheling na nakakonsentrar kita sa ministeryo?

³ Arogon si Jesus: Puedeng magin depisil na papagdanayon an konsentrasyon arog ki Jesus huling inaagaw kan kinaban an dakol na panahon niato asin nag-aalok iyan nin dakol na pandisturbo. (Mat. 24:37-39; Luc. 21:34) Kun siring, dapat na siertohon niato an orog na mahalagang mga bagay, na nag-iiskedyul nin panahon sa pag-andam para sa paghuhulit asin regular na pakikikabtang dian. (Fil. 1:10) Hinihingoa niatong papagdanayon an simpleng pamumuhay asin linilikayan na gamiton nin lubos an kinaban.—1 Cor. 7:31.

4. Taano ta mahalagang marhay na papagdanayon an tamang prioridad ngonyan?

⁴ Kun limitado an panahon, an pinakamahalaga an tinatawan nin prioridad nin madonong na tawo. Halimbawa, kun naaraman niang may nagdadangadang na peligrosong bagyo, ipopokus nia an saiyang panahon asin kosog sa pag-andam para sa kaligtasan kan saiyang pamilya asin pagpatanid sa mga kataed nia. Puedeng maghalat an mga aktibidad na bakong gayong mahalaga. Nainaan na an panahon na natatada bago umabot an bagyo nin Armagedon. (Sof. 1:14-16; 1 Cor. 7:29) Tanganing ikaligtas an satong sadiri asin an mga naghihinanyog sa sato, dapat na pirme niatong tawan nin atension an satong sadiri asin an satong pagtotokdo, sa laog man o sa luwas kan kongregasyon. (1 Tim. 4:16) Iyo, an kaligtasan niato nakadepende sa pagpapadanay niato na prioridad an ministeryo!