Nagamit Na daw Nindo an Likod na Tutob?
Kun an mga tawo minakua nin magasin, sa parate hineheling ninda an tutob asin sasalimbadan an nasa likod. An likod na tutob kan pampublikong edisyon kan An Torrengbantayan igwa nin nagkapirang interesanteng hapot asin sinasabi kaiba an numero kan pahina kun saen maheheling an impormasyon.
Puede niatong gamiton an kabtang na ini sa pag-isip nin magayon na mga ideya para sa pambukas na mga hapot tanganing makapoon nin pakikipag-olay. Kun an teritoryo parate niatong ginigibo, puede niatong barobagohon an satong presentasyon paagi sa paggamit nin manlaenlaen na hapot sa bilog na bulan. Kun sibot an kagharong, puede niatong pahalipoton an satong presentasyon paagi sa pagpaheling kan saro sa mga hapot sa likod na tutob asin pagsabing, “Kun gusto nindong maaraman an simbag, puede kong iwalat saindo an mga magasin na ini, asin puede niatong ipadagos an pag-oolay kun may panahon kamo.” Tibaad gusto nin nagkapirang parahayag na magpoon nin pakikipag-olay paagi sa pagpaheling sa kagharong kan likod na tutob asin pagpapili sa saiya nin hapot na interesante sa saiya. Dangan puede nindang itokdo kun saen manonompongan an simbag asin magbasa nin teksto na patienot nang pinili. Makakaisip gayod kamo nin iba pang mga paagi na magagamit an likod na tutob tanganing pukawon an interes sa An Torrengbantayan.