Mga Hapot
◼ Sa anong praktikal na mga paagi matatabangan niato an mga payunir?
Sa bilog na kinaban durante kan 2009 taon nin paglilingkod, haros 800,000 na tugang an naglingkod bilang regular asin espesyal payunir. Isinasakripisyo kan bilog na panahon na mga lingkod na ini an enot na mga bunga kan saindang panahon, kosog, asin materyal na mga bagay tanganing ikalakop an maogmang bareta kan Kahadean. (Tal. 3:9) Siertong naoogma si Jehova sa mga paghihingoa ninda! Sa anong mga paagi puede niatong ipabanaag an pagmansay ni Jehova asin matabangan sinda na makatagal saka magin maogma sa pagpapayunir?
An piniling marhay na mga tataramon niato puede nanggad na makadagka sa sainda na magpadagos bilang payunir. (Tal. 25:11) Puede daw niatong liwaton an satong semanal na iskedyul tanganing ibanan sinda sa ministeryo? Kun kaiba niato sinda, puede niatong ialok na gamiton an satong lunadan imbes na an sa sainda. Asin kun nakikisakay kita sa sainda, puede kitang mag-ambag para sa gastos sa gasolina. (1 Cor. 13:5; Fil. 2:4) Ipinapaheling man niato an satong mamomoton na suporta paagi sa pagigin mapag-istimar asin pag-imbitar sa mga payunir kun minsan na magkakan sa satong harong.—1 Ped. 4:8, 9.
Sinisierto kan Kasuratan na itatao ni Jehova an pangangaipo kan mga naghahanap nguna kan Kahadean nia. (Sal. 37:25; Mat. 6:33) An sarong paagi na ginigibo nia ini iyo an satong mamomoton na Kristianong kasararoan nin magturugang. (1 Juan 3:16-18) Siempre, dai naglalaom an mga payunir na aasikasohon nin iba an saindang pinansial na mga paninimbagan. Asin tibaad mag-alangan sindang sabihon sa iba kun nangangaipo sinda nin tabang. Minsan siring, kun kita magigin alisto asin mapagmasid, matatabangan niato an maimbod na mga payunir asin ‘mahihipnoan an saindang kakulangan’ sa praktikal na mga paagi.—2 Cor. 8:14, 15.
Kan magbiahe pasiring sa Roma si Febe, na sarong maigot na ebanghelisador sa Kongregasyon nin Cencrea kan enot na siglo, dinagka ni Pablo an mga tugang sa Roma: “Sia akoon nindo dian sa Kagurangnan sa paagi na maninigo sa mga banal, asin . . . tabangan sia nindo sa ano man na bagay na tibaad kaipuhan nia kamo.” (Roma 16:1, 2) Igwa kita kan oportunidad na ipaheling an siring na mamomoton na suporta sa mga kakongregasyon niato na daing ontok na nagpapahayag kan maogmang bareta bilang mga regular asin espesyal payunir.—Gibo 5:42.
◼ Tama daw na mag-display nin dakulang retrato ni Jesus durante kan Memorial?
Para sa tunay na mga Kristiano, an mga drowing nin mga eksena asin karakter sa Biblia pandekorasyon sana na nakakatabang sa pag-ilustrar asin pagtokdo. Dai iyan ginagamit sa satong pagsamba ki Jehova. (2 Corinto 5:7; helingon an The Watchtower na Mayo 15, 1972, pahina 295-296.) Sa nagkapirang Kingdom Hall, may idini-display na magagayon na drowing nin mga eksena sa Biblia, asin sa parate bako man na sala iyan.
Minsan siring, kun dapit sa Pamanggihan kan Kagurangnan, bakong angay na mag-display kita nin retrato ni Jesus nangorogna para sa okasyon na iyan. An maninigong tawan niato nin pangenot na atension iyo an mga emblemang nasa lamesa asin an diskurso. Gusto man niatong konsideraron an mga bagohan na presente, na an nagkapira, huli sa nakaaging mga eksperyensia ninda sa relihion, tibaad natuod nang magtao nin sobrang atension, o relihiosong debosyon pa ngani, sa mga retrato ni Jesus. Sa Roma kapitulo 14 asin 1 Corinto kapitulo 10, ipinaheling ni apostol Pablo na kaipuhan igalang an konsensia nin iba, dawa an mga may pagkasensitibo sa nagkapirang bagay huli sa nagin mga eksperyensia ninda.