Magin “Malomoy an Puso”
1. Ano an kaipuhan na marhay nin mga tawo ngonyan?
1 Ngonyan, orog kisa kasuarin man, dakolon na tawo an nangangaipong marhay nin mapagmalasakit na tabang. Huli sa naggagrabeng mga kamugtakan sa kinaban, dakol an nakakamate nin kamondoan, depresyon, asin kawaran nin paglaom. Minilyon an nangangaipo nin tabang, asin bilang mga Kristiano, nasa kamugtakan kita na magpaheling nin tunay na pagmakolog sa satong mga kapwa. (Mat. 22:39; Gal. 6:10) Paano ikakapaheling an siring na pagmakolog?
2. Ano an pinakamarahay na paagi na ikakapaheling niato an pagmalasakit?
2 Pagpaheling nin Pagmalasakit: An Dios sana an gikanan nin tunay asin nagdadanay na karangahan. (2 Cor. 1:3, 4) Sinasadol kita ni Jehova na arogon sia paagi sa pagigin “malomoy an puso” o mapagmalasakit, asin pinagbotan nia kita na ipaabot sa satong kapwa an maogmang bareta kan Kahadean. (1 Ped. 3:8) An aktibong pakikikabtang sa gibohon na ini iyo an pinakamarahay na paagi na maranga niato an “nasasakitan an puso,” huling an Kahadean nin Dios an solamenteng paglaom para sa nagsasakit na katawohan. (Isa. 61:1) Huli sa pagmalasakit ni Jehova sa mga tawo, madali na siang humiro tanganing haleon an karatan asin establisaron an sarong matanos na bagong kinaban.—2 Ped. 3:13.
3. Paano niato maaarog an pagmansay ni Jesus sa mga tawo?
3 Arogon an Pagmansay ni Jesus sa mga Tawo: Dawa kan si Jesus naghuhulit sa darakulang kadaklan, dai nia sana sinda minansay bilang sarong grupo. Minansay nia sinda bilang mga indibiduwal na may espirituwal na pangangaipo. Garo sinda mga karnero na mayong pastor na magiya sa sainda. Napukaw an boot ni Jesus sa naheling nia, asin napahiro sia na mapasensiang tokdoan sinda. (Mar. 6:34) Kun aarogon niato an pagmansay ni Jesus sa mga tawo, mapapahiro kitang magpaheling nin tunay na pagmalasakit sa sainda bilang mga indibiduwal. Magigin risang-risa ini sa satong tono nin boses asin ekspresyon nin lalawgon. An paghuhulit iyo an magigin prioridad niato, asin ibabagay niato an satong mga tataramon tanganing matawan nin atension an mga kahaditan nin lambang saro.—1 Cor. 9:19-23.
4. Taano ta maninigo kitang magpaheling nin pagmalasakit?
4 Sarong dakulang kadaklan nin mga tawo hale sa gabos na nasyon an positibong naghihimate sa mensahe kan Kahadean asin sa nakakaginhawang pagmakolog na ipinapaheling sa sainda. Mantang padagos kitang nagpapaheling nin pagmalasakit, matatawan niato nin onra asin mapapaogma niato an satong mapagmalasakit na Dios, si Jehova.—Col. 3:12.