Hapot

◼ Ano an nagdedeterminar kun baga wawalatan niato nin literatura an sarong tawo?

An pinakamahalaga iyo an interes nin saro. Kun magpahiling sia nin tunay na interes, puede kitang magwalat sa saiya nin duwang magasin, sarong brosyur, sarong libro, o iba pang literatura na iinaalok niato. Totoo ini dawa kun marisa niato na sia mayo o dikit sana an kuartang ikakadonar sa pambilog na kinaban na gibohon. (Job 34:19; Kap. 22:17) Sa ibong na lado, dai niato iwawalat an satong mahalagang marhay na literatura sa mga dai nagpapahalaga kaiyan.—Mat. 7:6.

Paano nagpapahiling nin interes an sarong kagharong? Sarong marahay na senyales an pagigin andam na makipag-olay sa sato. An pagtao nia nin atension mantang kita nagtataram, pagsimbag sa mga hapot, asin pagsabi nin opinyon nagpaparisa nin partisipasyon sa pag-oolay. An pagsubaybay mantang binabasa niato an teksto sa Biblia nagpaparisa nin paggalang sa Tataramon nin Dios. Sa parate, nakakatabang kun hahapoton niato sia kun baga babasahon nia an iinaalok niatong literatura. Maninigong gumamit nin marahay na paghusgar an mga parahayag tanganing madeterminaran kun interesado an sarong indibiduwal. Halimbawa, kun nagpapatotoo sa tinampo, dai maninigo na basta na sana itao an mga magasin, brosyur, o libro sa gabos na nag-aagi. Kun dai niato kayang determinaran kun interesado an saro, mas marahay na tawan sia nin handbill o tract.

Siring man, an bilang nin literatura na kukuanon nin sarong parahayag sa literature counter maninigo na an kaipuhan sana nia tanganing magibo an saiyang ministeryo, bakong huli sa kakayahan niang magdonar. An mga donasyon bakong bayad para sa literatura kundi tanganing suportaran an gabos na aspekto kan satong pambilog na kinaban na paghuhulit. Ano man an pinansial na kakayahan niato, an pagpahalaga an magpapahiro sa sato na bukas-palad na magtao gikan sa satong kadaihan, bakong gikan sa satong kalabihan, tanganing suportaran an intereses kan Kahadean. (Mar. 12:41-44; 2 Cor. 9:7) Papahiroon man kita kaiyan na magkua nin literatura na kaipuhan sana niato, sa siring dai masasayang an teokratikong mga rekurso.

[Blurb sa pahina 2]

Maninigong gumamit nin marahay na paghusgar an mga parahayag tanganing madeterminaran kun interesado an sarong indibiduwal