An Video na Jehovah’s Witnesses—Faith in Action, Part 1: Out of Darkness

Sa Biblia, an liwanag iinaasosyar sa katotoohan, mantang an kadikloman iinaasosyar sa kaputikan. (Sal. 43:3; Isa. 5:20) Pinonan ni Satanas an kadikloman sa kinaban kan dayaon nia si Eva, asin pag-abot nin panahon, ibinugtak nia an katawohan sa grabeng kadikloman. (Kap. 12:9) An video na Jehovah’s Witnesses​—Faith in Action, Part 1: Out of Darkness nagsasaysay kun paano nagpoon na sumirang an espirituwal na liwanag hale sa kadikloman. (Isa. 60:​1, 2) Pagkatapos na madalan o maheling an video, masisimbag daw nindo an mga hapot na ini?

(1) Paano luminakop an grabeng kadikloman pagkagadan kan mga apostol? (2) Sa kapinonan kan mga taon nin 1100, anong mga pangyayari an nakatabang sa mga tawo na marisang dai itinotokdo kan simbahan an katotoohan? (3) Siisay si Henry Grew asin George Storrs? (4) Anong mga pangyayari sa buhay ni Charles Russell an nagkaigwa nin hararom na epekto sa saiya? (5) Paano ginibo ni Tugang na Russell, kan ama nia, asin kan pirang kamidbid nia an saindang klase sa pag-adal sa Biblia, asin ano an nagin mga kongklusyon ninda na sono sa Kasuratan? (6) Taano an grupong iyan nin pag-adal sa Biblia ta uminayon sa grupo ni Nelson Barbour, alagad taano ta huminale dian si Tugang na Russell? (7) Ano an nangyari kan Hulyo 1879 na nagin kapinonan nin bagong kapanahonan nin espirituwal na liwanag? (8) Pagkatapos kaiyan, ano an ginibo kan nagdadakol na mga Estudyante sa Biblia tanganing ikapalakop an maogmang bareta? (9) Dakol na taon antes pa, ano an inaasahan kan mga Estudyante sa Biblia na mangyayari pag-abot nin 1914? (10) Anong mga angat an napaatubang sa mga Estudyante sa Biblia pagkagadan ni Tugang na Russell? (11) Ano an ginibo kan mga Estudyante sa Biblia pagkaluwas sa bilanggoan ni Tugang na Rutherford asin kan mga kairiba nia? (12) Paano an pagheling sa videong ini nakapararom kan saimong apresasyon sa organisasyon ni Jehova? (13) Paano pinakosog kan videong ini an saimong determinasyon na padagos asin maigot na maghulit sa ibong nin mga olang? (14) Paano ta magagamit an videong ini tanganing matabangan an satong mga paryente, mga tinotokdoan sa Biblia, asin iba pa?

Mahalagang marhay nanggad na espirituwal na pamana an iwinalat sa sato kan enot na mga Estudyante sa Biblia! Sa kinaban na yaon sa espirituwal na kadikloman, sinda makosog an boot asin maigot na mga paradara nin liwanag. Logod na arogon niato an halimbawa ninda asin ‘maglakaw kita siring sa mga aki nin liwanag.’​—Efe. 5:8.