An Video na Jehovah’s Witnesses—Faith in Action, Part 2: Let the Light Shine

Pakatapos na paluwason sa presohan si Tugang na Rutherford asin an saiyang mga kairiba kan 1919, dakulaon na gibohon an naghahalat sa Mga Estudyante sa Biblia. Arog kan ipinahiling sa video na Jehovah’s Witnesses—Faith in Action, Part 2: Let the Light Shine, an Mga Estudyante sa Biblia magkakaigwa nin dakol na paratumang, an pakasabot ninda sa Kasuratan padagos na maoswag, asin an pagtubod ninda dadalisayon. (Tal. 4:18; Mal. 3:1-3; Juan 15:20) Pagkatapos na madalan o mahiling an video, masisimbag daw nindo an mga hapot na ini?

(1) Anong mga paagi an ginamit kan Mga Estudyante sa Biblia tanganing ikapalakop an maogmang bareta? (2) Ano an nangyari sa espesyal na kombension kan 1931 asin 1935? (3) Anong mahalagang impormasyon an yaon sa isyu kan The Watchtower na Nobyembre 1, 1939? (4) Iladawan kun ano an nangyari sa Madison Square Garden durante kan pahayag ni Tugang na Rutherford na may temang “Government and Peace.” (5) Ano an mahalagang mangnohon sa pahayag ni Tugang na Knorr na may temang “Peace—Can It Last?” (6) Kan 1942, anong mga plano an ginibo kan Mga Saksi ni Jehova tanganing pahiwason an saindang paghuhulit? (7) Ipaliwanag an nagkapira sa legal na mga pakikipaglaban sa Estados Unidos, Canada, asin Grecia. (8) Ano an nagin epekto kan Gilead sa paghiwas kan gibohon na paghuhulit? (9) Anong importanteng gibohon an pinonan kan 1946, asin taano? (10) Anong mga lakdang an ginibo kan Mga Saksi ni Jehova tanganing siertohon na an paggawe ninda kaoyon kan mga pamantayan na yaon sa Biblia? (11) Ipaliwanag an nagkapirang pagliliwat na ginibo kan dekada nin 1970 tanganing orog na masunod kan organisasyon an arogan na nasa Biblia. (12) Paano pinararom kan videong ini an apresasyon mo na si Jehova an may lubos na kontrol asin na ini an saiyang organisasyon? (13) Paano pinakosog kan videong ini an determinasyon mo na padagos na maghulit nin may kaigotan sa ibong nin mga olang? (14) Paano niato magagamit an videong ini tanganing matabangan an satong mga paryente, tinotokdoan sa Biblia, asin iba pa?

An kada aldaw na minalihis, bagong kapitulo sa kasaysayan kan Mga Saksi ni Jehova. Ano an masasabi kan rekord manongod sa satong mga paghihingoa sa ministeryo? Arog kan ginibo kan mga tugang niato kan nakaagi, logod na magpadagos kita na may kaigotan sa ‘pagpasirang kan liwanag’!—2 Cor. 4:6.