Mag-andam Para sa Memoryal na May Magaya-gayang Puso
1. An panahon nin Memoryal espesyal na oportunidad na gibuhon an ano?
1 An Memoryal sa Martes, Marso 26, magtatao nin marahayon na oportunidad na ipaggaya-gaya an paagi nin Diyos sa pagliligtas. (Isa. 61:10) Dawa bago pa umabot an selebrasyon na iyan, an pagigin magaya-gaya makakatabang sa sato na magin andam na marhay. Paano?
2. Ano an nagpapahiro sa sato na mag-andam para sa selebrasyon kan Memoryal?
2 Pag-andam Para sa Selebrasyon: An Pamanggihan kan Kagurangnan selebrasyon na hararom an kahulugan alagad simple. Minsan siring, nangangaipo iyan nin patienot na pagplano tanganing dai malingawan an importanteng mga detalye. (Tal. 21:5) Dapat na pumili nin oras asin angay na lugar. Kaipuhan na igwa nin tamang mga emblema. Dapat na linigan asin andamon an lugar na pagtitiripunan. An inasignaran na ispiker kaipuhan na mag-andam nin maingat, asin dapat na organisado an mga maserbi saka attendant. Daing duda na dati nang ginigibo an kadaklan kaini. An pagpasalamat sa nagliligtas na puwersa kan pantubos nagmomotibar sa sato na mag-andam na marhay para sa sagradong selebrasyon na ini.—1 Ped. 1:8, 9.
3. Paano ta aandamon an satong puso para sa Pamanggihan kan Kagurangnan?
3 Pag-andam kan Puso: Mahalaga man na marhay na andamon an satong puso para masabutan an lubos na kahulugan kan Memoryal. (Esd. 7:10) Para magibo iyan, maninigo kitang magtagama nin panahon na basahon an espesyal na babasahon sa Bibliya para sa Memoryal dangan hurop-hurupon an ultimong mga aldaw kan buhay ni Jesus digdi sa daga. An paghurup-hurop sa pagsakripisyo ni Jesus mamotibar sa sato na arugon siya.—Gal. 2:20.
4. Arin na pakinabang kan pantubos an nagpapagaya-gayang marhay sa saindo?
4 An kagadanan ni Cristo nagbibindikar sa soberaniya ni Jehova. Nagpapatalingkas iyan sa kasalan asin kagadanan. (1 Juan 2:2) Binubuksan kaiyan an dalan para sa matuninong na relasyon sa Diyos asin an dalan pasiring sa buhay na daing sagkod. (Col. 1:21, 22) Tinatabangan man kita kaiyan na pakusugon an determinasyon na utubon an pagdusay ki Jehova asin magdanay na marigon bilang mga disipulo ni Cristo. (Mat. 16:24) Mantang nag-aandam kamo para sa pag-atender sa maabot na Memoryal, lugod na magin mas magaya-gaya kamo!