Hapot

◼ Anong mga prinsipyo sa Bibliya an aplikado sa paggamit nin cellphone mantang nasa Kristiyanong mga pagtiripon asin ministeryo?

‘Sa Gabos na Bagay Igwa nin Kapanahunan.’ (Par. 3:1): Paagi sa cellphone, nate-text o nakakaulay kan mga tawo an iba ano man na oras. Minsan siring, may mga pagkakataon na habo kan mga Kristiyano na madisturbo kan saindang cellphone. Halimbawa, an satong mga pagtiripon panahon tanganing sambahon si Jehova, mag-ako nin espirituwal na pagtutukdo, asin magparinigunan nin buot. (Deut. 31:12; Sal. 22:22; Roma 1:11, 12) Puwede ta daw i-off an satong cellphone pag-abot sa pagtiripon asin basahon na sana an mga mensahe pagkahali sa pagtiripon? Kun kinakaipuhan na naka-on an satong cellphone dahil may hinahalat kitang importanteng text o apod, maninigo na i-adjust ta iyan sa setting na dai makakadisturbo sa iba.

‘Gibuhon an Gabos na Bagay Para sa Ebanghelyo.’ (1 Cor. 9:23): Kun beses, may balidong gamit an cellphone sa ministeryo. Halimbawa, puwedeng gamiton iyan nin brother na nanginginot para giyahan an mga tugang na yaon sa ibong na parte kan teritoryo. Kun beses, ginagamit iyan kan mga parahayag para apudan an sarong interesado o tinutukduan sa Bibliya bago magdalaw, lalo na kun huruharayo an iniistaran kaini. Kun may dara kitang cellphone, dapat tang siguraduhon na dai iyan makadisturbo sa sato mantang nakikipag-ulay sa kagharong. (2 Cor. 6:3) Mantang naghahalat sa ibang parahayag, imbes na mag-apod o magparatext sa sarong katuod, bako daw na mas marahay na ipokus an atensiyon ta sa ministeryo asin sa kairiba niyato?

Magin Makonsiderasyon sa Iba. (1 Cor. 10:24; Fil. 2:4): Dai niyato nuarin man gugustuhon na baliwalaon an pagigin nasa oras sa mga pagtiripon bago maglingkod sa langtad dahil iniisip ta na maaapudan man o mate-text an mga kagrupo ta kun hain na sinda. Kun huri kita, sa parati kaipuhan na organisaron giraray an grupo. Siyempre, kun minsan may mga pangyayari na dai niyato inaasahan kaya nahuhuri kita. Minsan siring, kun pirmi kitang minaabot nin nasa oras, nagpapahiling kita nin paggalang sa areglo ni Jehova, sa tugang na nanginginot, asin sa satong mga kapwa parahayag.