Dalawon Liwat an Gabos na Nagpapaheling nin Dawa Kadikit na Interes
1 Dakol sa sato an nasa katotoohan ngonyan huli ta may nakariparo kan satong paborableng reaksion sa mensahe kan Kahadean asin mapasensiang nagdalaw liwat—tibaad nin dakol na beses—tangani na kultibaron an interes na iyan. Kaagid kaiyan, maninigo man niatong dalawon liwat sa maatom na paagi an gabos na nagpapaheling nin dawa kadikit na interes. An totoo, an mga pagdalaw liwat kaiba sa sugo sa sato na ‘gumibo nin mga disipulo.’—Mat. 28:19, 20.
2 Batidon an Interes: Dawa kun dai nag-aako nin babasahon an sarong tawo, an saiyang panlauog, tono nin boses, o mga tataramon puedeng maghayag nin dawa kadikit na interes sa mensahe kan Kahadean. Basado dian, puede na kitang dumalaw liwat. An sarong tugang na lalaki nagdalaw liwat sa sarong tawo sa laog nin limang sunod-sunod na semana na dai nakapasakamot nin babasahon. Sa ikaanom na pagdalaw liwat, nag-ako nin babasahon an tawong iyan, asin pag-abot nin panahon naponan nin pag-adal sa Biblia.
3 Kun may marisa kamong interes, tolos-tolos na dumalaw liwat, tibaad pakalihis nin pirang aldaw. Dai nindo tawan nin oportunidad “an marigsok” na saro na agawon an ikinatanom na sa puso kan tawo. (Mat. 13:19) Seguradohon na otobon an panuga nindo kun iinareglo nindo na dumalaw liwat sa sarong espesipikong panahon.—Mat. 5:37.
4 Sa Paghuhulit sa Tinampo: Naghihingoa daw kamong kultibaron an interes nin tawo na nanompongan nindo mantang naghuhulit sa tinampo o kun impormal na nagpapatotoo? Sa pagtatapos kan pag-oolay nindo, puede nindong sabihon: “Naogma ako sa pag-oolay niato. Saen taka puedeng makontak tanganing magkaolay giraray kita?” Kun angay, tibaad gustohon nin nagkapirang parahayag na itao sa interesado an saindang numero nin telepono o hagadon man an numero nin telepono kan interesado. Kun naheheling kamo nin mga tawo na regular na naghuhulit sa tinampo sa iyo man sanang lugar, tibaad dai sinda magduwaduwa na itao sa saindo an saindang numero nin telepono o adres. Dawa kun habo nindang sabihon sa saindo kun paano sinda makokontak, puede pa man giraray nindong pagmaigotan na dugangan an interes ninda sa sunod na manompongan nindo sinda sa tinampo.
5 Kun naheheling niato na matubang an mga tinanom na binaribi asin kinultibar niato, nagtatao iyan sa sato nin kagayagayahan. Kaagid kaiyan, magkakaigwa kita nin dakulang kagayagayahan paagi sa mga pagdalaw liwat asin pagtabang sa mga tawo na umoswag sa espirituwal. (1 Cor. 3:6) Gibohon nindong pasohan na dalawon liwat an gabos na nagpapaheling nin dawa kadikit na interes.