Siisay an Magigin Interesado Digdi?
1. Kun binabasa ta an satong kopya nin Torrengbantayan o Awake! ano an dapat tang pag-isipan, asin taano?
1 An Torrengbantayan asin Awake! ginigibo para sa dakul na tawo sa bilog na kinaban. Kaya lain-lain an tema kan mga artikulo. Kun binabasa ta an kada artikulo sa satong personal na kopya, dapat tang pag-isipan kun sairisay partikularmente an tibaad magin interesado diyan, dangan hinguwahon na ialok iyan sa sainda.
2. Anong mga tema sa satong mga magasin an puwedeng magin interesante sa iba?
2 An bagong isyu daw kan Torrengbantayan nagtutukar nin sarong tema sa Bibliya na napag-ulayan na nindo kan katrabaho mo? Igwa daw nin artikulo dapit sa buhay pampamilya na makakatabang sa paryente mo? May kamidbid ka daw na nagpaplanong magbiyahe sa sarong nasyon na itinampok sa Awake!? An saro daw sa mga magasin magigin interesante sa sarong establisimiyento nin negosyo o ahensiya nin gobyerno sa teritoryo nindo? Halimbawa, an magasin na nagtatampok nin mga kadipisilan na inaatubang nin mga may edad na puwedeng magin interesante sa mga nursing home. An mga pulis puwedeng magin interesado sa magasin na may tema dapit sa krimen.
3. Magsaysay nin eksperyensiya na nagpapahiling kan kahalagahan nin pag-alok nin espesipikong isyu nin magasin sa mga tawo na sa hiling niyato magigin interesado sa mga laog kaiyan.
3 Mga Resulta: Pakaresibi kan Awake! na Oktubre 2011 na may temang “How to Raise Responsible Children,” inapudan kan mag-agom na taga South Africa an 25 eskuwelahan sa teritoryo kan kongregasyon ninda. Igwa nin 22 na nag-ako nin mga kopya asin idinistribwir iyan sa mga estudyante ninda. Iyan man an naisip kan saro pang mag-agom sa nasyon na iyan, na nakapasakamot nin mga kopya sa mga eskuwelahan sa teritoryo ninda. An mga maestra sa saro sa mga eskuwelahan nagdesisyon na gamiton an magasin sa saindang orientation asin programa sa pagbasa kada semana. Iinistorya ini kan mag-agom sa sarong paraataman nin sirkito. Dangan dinagka kaini an mga kongregasyon sa sirkito niya na maghulit sa mga eskuwelahan sa teritoryo ninda. Kadakul na request an nag-abot sa sangang opisina para sa dugang pang magasin kaya kinaipuhan na ipaimprenta giraray iyan!
4. Taano ta gusto niyatong ialok an mga magasin sa pinakadakul na tawo?
4 Tinutukar kan satong mga magasin an tunay na kahulugan kan presenteng mga pangyayari asin itinutukdo kaiyan an Bibliya saka an Kahadian nin Diyos. Iyan sana an mga magasin sa kinaban na ‘nagbabalangibog nin kaligtasan.’ (Isa. 52:7) Kun siring, gusto niyatong ialok iyan sa pinakadakul na tawo. An sarong marahay na paagi para magibo iyan iyo na haputon an sadiri, ‘Siisay daw an magigin interesado digdi?’