Mga Hoben na Brother, Naghihinguwa daw Kamong Umabot nin Pribilehiyo?
1. Nuarin maninigong punan na iaplikar nin sarong hoben na brother an 1 Timoteo 3:1?
1 “Kun an siisay man na lalaki naghihinguwang maabot an katungdan . . . , siya nagmamawot nin marahay na gibo.” (1 Tim. 3:1, NW) An ipinasabong na mga tataramon na iyan nagdadagka sa mga brother na maghinguwang makuwalipikar sa mga pribilehiyo nin paglilingkod. Kaipuhan daw na nasa edad na kamo para magibo iyan? An totoo, pinakamarahay na punan an paghihinguwang umabot nin mga pribilehiyo kun kamo hoben pa. Paagi kaiyan, mag-aako kamo nin pagsasanay asin ikakapahiling nindo kun baga angay kamong nombrahan bilang ministeryal na lingkod pag nasa edad na kamo. (1 Tim. 3:10) Kun ika hoben na bawtisadong brother, paano ka maghihinguwang abuton an mga pribilehiyo?
2. Paano magkakaigwa asin ikakapahiling an espiritu nin pagsakripisyo?
2 Pagsakripisyo: Tandaan na naghihinguwa kamong maabot an marahay na gibo, bakong titulo. Kaya, magkaigwa nin pagmawot na tabangan an saindong mga tugang. An sarong paagi iyo na hurop-hurupon an marahay na halimbawa ni Jesus. (Mat. 20:28; Juan 4:6, 7; 13:4, 5) Hagadon ki Jehova na tabangan kamong magin interesado sa iba. (1 Cor. 10:24) Puwede daw kamong tumabang sa mga kakongregasyon nindo na may edad na o may hilang? Nagboboluntaryo daw kamo na maghawan, mag-mop nin salog, o sa iba pang gibuhon na pagmentenar kan Kingdom Hall? Puwede daw kamong magboluntaryo bilang kasalihid kun mayo an may kabtang sa Teokratikong Paadalan sa Pagmiministro? Mahihiling nindo na an pagsakripisyo para sa iba magtatao sa saindo nin kaugmahan.—Gui. 20:35.
3. Gurano kaimportante an espirituwalidad, asin paano magkakaigwa kaiyan?
3 Espirituwalidad: Mas mahalaga nanggad para sa sarong lingkod sa kongregasyon an espirituwalidad kisa sa pambihirang mga talento o natural na abilidad. Hinihinguwang mansayon kan tawong espirituwal an mga bagay-bagay arog kan pagmansay ni Jehova asin ni Jesus. (1 Cor. 2:15, 16) Nahihiling sa saiya ‘an bunga kan espiritu.’ (Gal. 5:22, 23) Maigot siyang ebanghelisador na iniinot an intereses kan Kahadian. (Mat. 6:33) Magkakaigwa kamo nin espirituwal na mga kuwalidad paagi sa marahay na rutina nin personal na pag-adal. Kaiba digdi an pagbasa kan Bibliya aroaldaw, kan kada isyu nin An Torrengbantayan asin Awake!, asin pag-andam saka pag-atender sa mga pagtiripon. (Sal. 1:1, 2; Heb. 10:24, 25) Kan dinadagka ni Pablo an hoben na si Timoteo na umuswag sa espirituwal, isinurat niya: “Pirmi mong tawan nin atensiyon an . . . saimong pagtutukdo.” (1 Tim. 4:15, 16, NW) Kaya magmaigot na marhay sa mga kabtang nindo sa Teokratikong Paadalan sa Pagmiministro. Mag-andam asin magin regular sa ministeryo. Magkaigwa asin abuton an espirituwal na mga pasuhan, arog kan pagpapayunir, paglilingkod sa Bethel, o pag-adal sa Bible School for Single Brothers. An espirituwalidad makakatabang sa saindo na ‘dumulag sa mga hurot nin pagkabarobata.’—2 Tim. 2:22.
4. Ano an kahalagahan kan pagkamasasarigan asin kaimbudan?
4 Pagkamasasarigan Asin Kaimbudan: An mga tugang na lalaking inasignaran na magdistribwir nin pagkakan sa dukhang mga Kristiyano kan inot na siglo ‘marahay an dangog.’ Midbid sinda na masasarigan asin maimbod. Kaya dai na naghadit an mga apostol kun baga magigibo kan mga ini an saindang trabaho. Huli kaini nakapagkonsentrar an mga apostol sa ibang mahahalagang bagay. (Gui. 6:1-4) Kun siring, kun tinawan kamo nin asignasyon, gibuhon iyan sa bilog na makakaya nindo. Arugon si Noe, na maingat na sinunod an mga instruksiyon sa saiya na gumibo nin arka. (Gen. 6:22) Mahalaga ki Jehova an kaimbudan asin tanda iyan nin espirituwal na pagkamaygurang.—1 Cor. 4:2; hilingon an kahon na “Mga Pakinabang kan Pagsasanay.”
5. Taano ta maninigong maghinguwa an mga hoben na brother na umabot nin mga pribilehiyo?
5 Arog kan ihinula, pinaparikas ni Jehova an pagtipon. (Isa. 60:22) Sa average, mga 250,000 katawo an nagpapabawtismo kada taon. Kadakul na baguhan an naglalaog sa katotoohan kaya kaipuhan an kuwalipikadong espirituwal na mga lalaki para mag-asikaso sa mga paninimbagan sa kongregasyon. Ngunyan urog kisa kasuarin man, dakul an gibuhon sa paglilingkod ki Jehova. (1 Cor. 15:58) Mga hoben na brother, naghihinguwa daw kamong umabot nin mga pribilehiyo? Kun iyo, nagmamawot nanggad kamo nin marahayon na gibo!
[Blurb sa pahina 2]
Kadakul na baguhan an naglalaog sa katotoohan kaya kaipuhan an kuwalipikadong mga lalaki para mag-asikaso sa mga paninimbagan sa kongregasyon
[Kahon sa pahina 3]
Mga Pakinabang kan Pagsasanay
Nakikinabang an kuwalipikadong mga hoben na brother pag tinatawan sinda kan mga elder nin mga asignasyon asin sinasanay sinda. Kan an sarong paraataman nin sirkito nagtutukaw sa may entablado, na pinaparigon an sarong parahayag, narisa niya an sarong aking lalaki na nakatindog harani sa saiya. Hinapot niya ini kun naghahalat ining kaulayon siya. Sinabi kan aki na inasignaran siyang mag-vacuum kan entablado pagkatapos kan kada pagtiripon. Mauli na kuta an mga magurang niya, pero habo pa niyang magpuli sagkod na dai pa niya natatapos an asignasyon niya. Maugmang nagbalyo nin ibang tukawan an paraataman nin sirkito. Sinabi niya: “Alisto an mga elder na sanayon an kuwalipikadong mga hoben na brother paagi sa pagtao sa sainda nin mga asignasyon. Kaya, pirmi sindang may irinerekomendar na hoben pang brother bilang ministeryal na lingkod pag nagdadalaw ako sa kongregasyon na iyan.”