Kaipuhan an Tabang Mo
1 “Salamat sa gabos nindong ginigibo para sa samo gabos. Talagang dakula an epekto kaiyan samuya.” An pananaram na iyan nagpapahayag nanggad kan pasasalamat na namamatean niato para sa satong kamagurangan asin ministeryal na mga lingkod. Mantang padagos na nagdadakula an organisasyon nin Dios, nagpapadagos man an pangangaipo para sa maygurang na mga lalaki na maglilingkod sa haros 100,000 na kongregasyon sa bilog na kinaban. Kun ika sarong bautisadong tugang na lalaki, kaipuhan an tabang mo.
2 “Naghihingoang Maabot”: Paano ka makapaghihingoa na maabot an dagdag na pribilehio nin paglilingkod? (1 Tim. 3:1) Sa pundamental, paagi sa pagtao nin marahay na halimbawa sa gabos na aspekto kan saimong buhay. (1 Tim. 4:12; Tito 2:6-8; 1 Ped. 5:3) Magkaigwa nin lubos na pakikikabtang sa paghuhulit, asin tabangan an iba na gibohon man iyan. (2 Tim. 4:5) Magkaigwa nin sinserong interes sa ikakarahay kan mga kapagtubod. (Roma 12:13) Magin mahigos na estudyante kan Tataramon nin Dios, asin paoswagon an “teknika sa pagtotokdo.” (Tito 1:9; 1 Tim. 4:13) Mahigos na asikasohon an mga asignasyon na ipinagkatiwala sa saimo kan kamagurangan. (1 Tim. 3:10) Kun ika sarong payo nin pamilya, ‘mangenot sa saimong kasararo sa harong sa marahay na paagi.’—1 Tim. 3:4, 5, 12.
3 Kalabot sa paglilingkod sa nombradong katongdan an kahigosan asin nagkakaipo iyan nin espiritu nin pagsasakripisyo. (1 Tim. 5:17) Kun siring, kun naghihingoang maabot iyan, magkonsentrar sa mapakumbabang paglilingkod sa iba. (Mat. 20:25-28; Juan 13:3-5, 12-17) Horophoropon an disposisyon ni Timoteo, asin hingoahon na arogon iyan. (Fil. 2:20-22) Siring saiya, togoti an saimong marahay na paggawe na iyo an magrekomendar saimo. (Gibo 16:1, 2) Mantang kinukultibar mo an espirituwal na mga kualidad na kaipuhan sa pag-asikaso nin dagdag na pribilehio asin iinaaplikar mo an ano man na hatol para sa pag-oswag na itinatao saimo, ‘an saimong pag-oswag mahahayag sa gabos.’—1 Tim. 4:15.
4 Mga Magurang, Sanayon an mga Aki na Tumabang: An mga aki puedeng magpoon na makanood na tumabang poon sa amay pang edad. Sanayon sinda na mag-atento sa mga pagtiripon, maghulit, asin magin arogan sa paggawe sa Kingdom Hall asin sa eskuelahan. Tokdoan sinda na magpartisipar sa paglilingkod sa iba, arog kan pagtabang sa paglinig sa Kingdom Hall, pagtabang sa mga may edad na, asin iba pa. Ipaeksperyensia sa sainda an kaogmahan na minagikan sa pagtatao. (Gibo 20:35) An siring na pagsasanay makakatabang sa sainda na magin mga payunir, ministeryal na lingkod, asin magurang sa kongregasyon sa ngapit.