Sarong Direktang Imbitasyon
1. Nuarin mapuon an kampanya sa pag-imbitar para sa kumbensiyon?
1 Kun nagpaplano kang maghanda nin sarong espesyal na pagkakan para sa pamilya o mga katuod mo, na talagang paghahandaan asin gagastusan mo, posibleng ugmahon kang mag-imbitar. Arog man kaiyan an paghahanda para sa espirituwal na bangkete sa satong nagdadangadang na kumbensiyon. Tulong semana bago kaiyan, itinatao sa sato ni Jehova an pribilehiyo na imbitaran an iba na umatender. Ano an makakatabang sato na magin maigot sa pag-imbitar?
2. Ano an mapahiro sa sato na lubos na makikabtang sa kampanya?
2 Mapapahiro kita na lubos na makikabtang sa kampanya kun huhurop-hurupon ta kun gurano kita personal na nakikinabang sa nakakaginhawang instruksiyon na itinatao ni Jehova sa kumbensiyon. (Isa. 65:13, 14) Dapat na tandaan ta man na may mga resulta an satong taunan na kampanya. (Hilingon an kahon na “Iyan Nagbubunga.”) An nagkapira sa maiimbitaran ta maatender pero an iba dai. Pero dakul man o diit an mag-atender, an maigot na paghihinguwa ta sa panahon nin kampanya matao nin kaumawan ki Jehova asin mapahiling kan pagkabukas-palad niya.—Sal. 145:3, 7; Kap. 22:17.
3. Paano ididistribwir an mga imbitasyon?
3 Maninigong determinaran kan grupo nin kamagurangan kun paano ikakadistribwir sa pinakadakul na tawo an mga imbitasyon, pati na kun baga iwawalat iyan sa harong na daing tawo o iaalok sa pagpapatotoo sa publiko sa teritoryo ninda. Pag Sabado asin Domingo maninigo na ialok man an mga magasin kun angay. Pagkatapos kan kampanya, mauugma nanggad kita huling maigot kitang nakikabtang asin nakapag-imbitar nin pinakadakul na tawo na umiba sa sato sa espirituwal na bangketeng ihinanda ni Jehova!