Kun Paano Aabuton an Puso kan mga Tinutukduan Ta
1. Ano an nagin epekto kan pagtutukdo ni Jesus sa puso kan mga nagdadangog sa saiya?
1 Naabot ni Jesu-Cristo an puso kan mga nagdadangog sa saiya. May pagkakataon na “naglaad” an puso kan mga disipulo kan malinaw niyang ipinaliwanag sa sainda an Kasuratan. (Luc. 24:32) Huling dapat na hali sa puso an pagkuyog sa Diyos, paano niyato aabuton an puso kan mga tinutukduan ta tanganing mapahiro sinda na gumibo nin mga pagbabago sa saindang buhay?—Roma 6:17.
2. Sa pag-abot kan puso nin sarong tawo, taano ta importante an pagigin mataktika asin mapagsabot?
2 Magin Mataktika Asin Mapagsabot: Dai mo basta-basta mapapabago an dakul na tawo pag sinabi mo sana sainda kun ano an tama asin sala. Sa katunayan, kun papauranan mo sinda nin mga teksto para atakihon an paniniwala ninda, tibaad ngani dai na sinda magdangog. Para mamotibar an sarong tawo, dapat na masabutan ta nguna an mga dahilan kun taano ta arog kaiyan an paniniwala o ginigibo niya. An mataktika asin pinag-isipan na marhay na mga hapot mapahiro sa saiya na masabi an talagang nasa buot niya. (Tal. 20:5) Huli kaiyan, makakapili kita nin mga impormasyon sa Bibliya na puwedeng makapahiro sa puso niya. Kaya, magpahiling kita nin personal na interes asin magin mapasensiya. (Tal. 25:15) Tandaan na iba-iba an rikas kan pag-uswag sa espirituwal kan kada indibidwal. Kaya, kaipuhan tang magin mapasensiya asin maghalat kun nuarin sinda pahiruon kan banal na espiritu ni Jehova.—Mar. 4:26-29.
3. Paano niyato tatabangan an satong mga tinutukduan na magkaigwa nin positibong mga kuwalidad?
3 Tabangan Sindang Magkaigwa nin Positibong mga Kuwalidad: An mga teksto sa Bibliya na nagpapahiling kan karahayan asin pagkamuot ni Jehova makakatabang sa mga tinutukduan na magkaigwa nin positibong mga kuwalidad. Puwede tang ipabasa an Salmo 139:1-4 o Lucas 12:6, 7 para maaraman ninda kun gurano kainteresado an Diyos sa lambang saro sa sato. Pag lubos na nindang naaapresyar an dai na kutana maninigong kabuutan ni Jehova, lalong makusog an pagkamuot asin debosyon ninda sa saiya. (Roma 5:6-8; 1 Juan 4:19) Asin pag naaraman ninda na may epekto palan ki Jehova an ginigibo ninda, mapapahiro sindang gumawi sa paagi na nakakapaugma asin nagtatao nin onra sa saiya.—Sal. 78:40, 41; Tal. 23:15.
4. Pag nagtutukdo sa mga tawo sa ministeryo, paano ta ipapahiling na iginagalang ta an deretso nin saro na gumibo nin sadiring desisyon?
4 Dai pinipirit ni Jehova an siisay man na kuyugon an mga tugon niya. Imbes, tinatabangan niya an mga tawo na mahiling an kadunungan kan pagsunod sa mga sadol niya. (Isa. 48:17, 18) Inaarog ta si Jehova pag nagtutukdo kita sa paagi na matabang sa sainda na makagibo nin sadiring desisyon. Pag kumbinsido an mga tawo na talagang kaipuhan nindang gumibo nin pagbabago sa buhay ninda, mas makikinabang sinda sagkod lamang. (Roma 12:2) Mas mapaparani man sinda ki Jehova, “an parasiyasat nin mga puso.”—Tal. 17:3, NW.