PAMUMUHAY BILANG KRISTIYANO
Kun Paano Magigin Maigot na Paraadal kan Kasuratan
Gusto mo daw magin maimbod dawa may pagbalo arog ni Daniel? Maigot na pinag-adalan ni Daniel an Tataramon nin Diyos, kaiba an harararom na propesiya kaiyan. (Da 9:2) An maigot na pag-adal sa Bibliya makakatabang para magdanay kang maimbod. Paano? Mapapakusog kaiyan an pagtubod mong mauutob an mga panuga ni Jehova. (Jos 23:14) Makakatabang iyan na lalo mo pang mamutan an Diyos, na mapahiro saimo na gibuhon an tama. (Sal 97:10) Pero paano ka mapuon? Pag-isipan an minasunod na mga suhestiyon.
Ano an mga puwede kong pag-adalan? Kaiba sa marahay na rutina nin pag-adal an pag-andam sa mga pagtiripon kan kongregasyon. Mas kapaki-pakinabang an semanal na pagbasa sa Bibliya kun matao ka nin oras para i-research an mga punto na dai mo nasasabutan. Arog nin iba, puwede mo man pag-adalan an mga propesiya sa Bibliya, an mga aspekto kan bunga kan espiritu nin Diyos, pagbiyahe ni apostol Pablo bilang misyonero, o an mga linalang ni Jehova. Kun igwa kang naisip na hapot sa Bibliya, isurat iyan asin gibuhon mo iyan na tema sa sunod mong pag-adal.
Sain ako puwedeng kumua nin mga impormasyon? Para sa mga pagpipilian, hilingon an video na Mga Research Tool sa Paghanap nin Espirituwal na mga Kayamanan. Halimbawa, i-research kun arin na mga nasyon an kaiba sa pambilog na kinaban na mga kapangyarihan na irinerepresentar kan mga hayop sa Daniel kapitulo 7.
Gurano kalawig ako dapat mag-adal? Mahalaga an regular na pag-adal para magdanay na makusog sa espirituwal. Puwedeng haralipot ngunang sesyon nin pag-adal sa puon dangan luway-luway na dagdagan an oras sa pag-adal. An pag-adal sa Tataramon nin Diyos garo pagkalot nin nakatagong kayamanan; pag mas dakul kang nakukua, mas gaganahan kang magkalot! (Tal 2:3-6) Kaya, mas mamawuton mo an Tataramon nin Diyos, asin magigin rutina mo na an pag-adal sa Bibliya.—1Pe 2:2.
ANO AN IRINEREPRESENTAR KAN MGA HAYOP SA KAPITULO 7 KAN DANIEL?
DAGDAG NA HAPOT:
Paano nautob an Daniel 7:8, 24?
PARA SA SUNOD NA PAG-ADAL:
Ano an irinerepresentar kan mabangis na mga hayop sa Kapahayagan kapitulo 13?