PAMUMUHAY BILANG KRISTIYANO
Tinatabangan Kita ni Jehova na Matagalan an Satong mga Kasakitan
Sa huring mga aldaw na ini, nag-aagi kita nin dakul na kasakitan. Kun minsan, tibaad namamatian ta na dipisilon an mga kasakitan na inaagihan niyato asin garo baga dai ta na iyan kaya. Pero, kun padagos kitang marani ki Jehova, tatabangan niya kitang matagalan dawa an pinakadipisil na kasakitan. (Isa 43:2, 4) Paano kita magigin harani ki Jehova pag may inaagihan kitang mga kasakitan?
Pamibi. Pag sinasabi ta ki Jehova an gabos na nasa puso niyato, tinatawan niya kita nin katuninungan asin nin emosyonal na kusog tanganing makatagal.—Flp 4:6, 7; 1Te 5:17.
Mga pagtiripon. Urog kisa kasuarin man, mas kaipuhan niyato ngunyan an espirituwal na kakanon asin pakikiasosyar na itinatao ni Jehova sa panahon kan satong mga pagtiripon. (Heb 10:24, 25) Pag nag-aandam kita, nag-aatender, asin nagpapartisipar sa mga pagtiripon kan kongregasyon, lubos tang inaaprobetsaran an tabang kan espiritu ni Jehova.—Kap 2:29.
Ministeryo. Magigin mas pasil sa satuya na magpokus sa positibong mga bagay kun gigibuhon ta an satong pinakamakakaya na magdanay na aktibo sa ministeryo. Mapapakusog ta man an satong pakikipag-amigo ki Jehova saka sa satong mga kapwa trabahador.—1Co 3:5-10.
HILINGON AN VIDEO NA KUKUPKUPON KA NI JEHOVA, DANGAN SIMBAGON AN MINASUNOD NA MGA HAPOT:
Ano an nakatabang ki Malu na magdanay na harani ki Jehova kan panahon na nag-aagi siya nin mga kasakitan?
Arog ni Malu, paano kita mararanga kan mga tataramon sa Salmo 34:18 pag nag-aagi kita nin mga kasakitan?
Paano mahihiling sa eksperyensiya ni Malu na tinatawan kita ni Jehova nin “puwersa na urog kisa sa ordinaryo” pag may inaagihan kitang mga kasakitan?—2Co 4:7