Nanumpungan Ko an Tunay na Seguridad Paagi sa Pagtitiwala ki Jehova

AN KAPINUNAN KAN PAGTITIWALA KO KI JEHOVA

Namundag ako kan 1948 sa sarong sadit na baryo sa timog-sulnupan kan Nigeria. Kan panahon na iyan, si Tiyo Moustapha, an nguhod na tugang ni Papa, pati si Kuya Wahabi, an pinakamatua kong tugang na lalaki, nabawtismuhan bilang mga Saksi ni Jehova. Kan nuwebe anyos ako, nagadan an sakong ama. Munduon akong marhay. Sinabi sako ni Kuya Wahabi na puwede ming mahiling giraray si Papa sa pagkabuhay liwat. An nakakarangang mga tataramon na ini nakapahiro sako na magpa-Bible study. Kan taon 1963 ako nabawtismuhan. Asin an tulo ko pang tugang na lalaki mga bawtisado man.

Kan 1965, nag-iba ako ki Kuya Wilson sa Lagos. Maugma kong nakaibanan duman an ibang mga regular payunir sa kongregasyon nin Igbobi. Napakusog ako kan saindang kaugmahan saka kaigutan, asin kan Enero 1968, nagpayunir na man ako.

Sarong brother na naglilingkod sa Bethel, si Albert Olugbebi, an nag-organisar nin sarong espesyal miting para sa samong mga hoben tanganing ipakipag-ulay an manungod sa pangangaipo para sa mga espesyal payunir sa norteng parte kan Nigeria. Tanda ko pa an pakiulay ni Brother Olugbebi. Ganado niyang sinabi: “Mga hoben pa kamo, asin puwede nindong gamiton an saindong panahon saka kusog para ki Jehova. Dakul na gibuhon an naghahalat sa saindo!” Gustong-gusto kong arugon an pagigin andam ni propeta Isaias na magboluntaryo, kaya nagpasa ako nin aplikasyon.​—Isa. 6:8.

Kan Mayo 1968, inasignaran ako bilang espesyal payunir sa siyudad nin Kano, sa norteng parte nin Nigeria. Nangyari ini kaidtong Biafran War (1967-1970), na nandestroso sa rehiyon asin nakaabot iyan sa sirangan na parte kan Nigeria. Sarong brother na may marahay man na intensiyon an pigpurbaran na kumbinsiron ako na dai na magduman. Pero sinabi ko saiya: “Salamat po sa pagmalasakit nindo. Pero, kun gusto ni Jehova na maglingkod ako saiya sa asignasyon na ini, sigurado akong tatabangan niya ako.”

PAGTITIWALA KI JEHOVA SA LUGAR NA NADESTROSO KAN GIYERA

Nakakamundong marhay an sitwasyon sa Kano. Grabeng destroso an sinapo kan dakulang siyudad na iyan huli sa giyera sibil. Mantang nagmiministeryo, minsan nakakahiling kami nin mga bangkay kan mga minasaker kan panahon kan giyera. Dawa ngani may nagkapirang kongregasyon sa Kano, kadaklan sa mga tugang nagdurulag na. Mayo pang 15 parahayag an natada, asin tarakot sinda saka pinangluluyahan nin buot. Naugmang marhay an mga tugang na idto kan mag-abot kaming anom na espesyal payunir. Pinakusog mi sinda asin talagang naranga sinda. Tinabangan mi sindang makabalik sa saindang espirituwal na mga aktibidad asin makapadara giraray nin report sa paglilingkod saka mga order nin literatura sa sangang opisina.

Nagpuon kaming mga espesyal payunir na mag-adal kan lengguwaheng Hausa. Kan madangog kan mga taga duman an mensahe kan Kahadian sa sadiri nindang lengguwahe, dakul an nagdangog samo. Kaso, dai uyon sa samong paghuhulit an mga miyembro kan prominenteng relihiyon duman, kaya kaipuhan ming mag-ingat na marhay. Sarong beses, linapag kami kan kapartner ko nin sarong lalaki na may darang kutsilyo. Marahay na sana ta mas makaskas kaming magdalagan kisa saiya kaya dai niya kami naabutan! Sa ibong nin mga peligro, ‘pinaistar kami ni Jehova sa katiwasayan’ asin nagpuon na magdakul an bilang kan mga parahayag. (Sal. 4:8) Sa ngunyan, labi nang 500 na parahayag an naglilingkod sa 11 kongregasyon sa Kano.

PAG-ATUBANG SA PAGKONTRA SA NIGER

Paghaloy-haloy kan Agosto 1968, pakalihis nin pirang bulan sa Kano, ipinadara ako sa Niamey, an kabisera kan Republika nin Niger, kaiba an duwa pang espesyal payunir. Dai nahaloy, naeksperyensiyahan mi mismo na an Niger, sa West Africa, yaon sa saro sa pinakamainit na mga rehiyon sa daga. Apuwera sa pakanuod na matagalan an init, kinaipuhan mi man na manudan an opisyal na lengguwahe, an French. Sa ibong kan mga kadipisilan na ini, nagtiwala kami ki Jehova asin nagpuon na maghulit sa kabisera kaiba an nagkapirang mga parahayag na taga duman. Sa laog nin halipot na panahon, haros gabos na tawong nakakabasa sa Niamey natawan kan librong ginagamit sa pag-Bible study na An Katotoohan na Minagiya Pasiring sa Buhay na Daing Sagkod. Hinahanap pa ngani kami kan mga tawo para makakua sinda kan kopya kaiyan!

Dai nahaloy, narisa mi na an mga nasa awtoridad habo sa mga Saksi ni Jehova. Kan Hulyo 1969, ginibo mi an pinakainot na pansirkitong asembleya sa nasyon, na mga 20 an nag-atender. Inaabangan mi an pagbawtismo sa duwang bagong parahayag. Kaso, sa inot na aldaw kan asembleya, may nag-arabot na mga pulis asin pinapundo an programa. Dinara ninda sa istasyon nin pulis kaming mga espesyal payunir asin an paraataman nin sirkito. Pagkatapos kaming usisaon, pinagbutan ninda kami na magbalik kinaagahan. Nahiling mi na delikado an kamugtakan kaya inareglar ming gibuhon sa sarong harong an pahayag sa bawtismo dangan pasekreto ming binawtismuhan sa sarong salog an mga kandidato sa bawtismo.

Pakalihis nin pirang semana, an Ministry of the Interior pinagbutan ako saka an lima pang espesyal payunir na humali na sa nasyon. Tinawan ninda kami nin 48 oras asin kami na an bahalang gumibo nin paagi para makahali. Nagsunod kami asin nagdiretso kami sa sangang opisina sa Nigeria, kun sain nakaresibi kami nin bagong mga asignasyon.

Iinasignar ako sa sarong baryo sa Nigeria, an Orisunbare, na diyan nagkaigwa ako nin mabungang ministeryo kaiba an sadit na grupo nin mga parahayag na nakaistar duman. Pero pakalihis nin anom na bulan, sinabihan ako kan sangang opisina na bumalik sa Niger na ako sana. Kan primero nabigla ako saka medyo nagduwa-duwa. Pero dai lang nahaloy, gustong-gusto ko nang mahiling giraray an mga tugang sa Niger!

Nagbalik ako sa Niamey. Kan suminunod na aldaw pag-abot ko, sarong negosyanteng taga Nigeria an nakabisto sako na saro akong Saksi tapos nagparahapot siya manungod sa Bibliya. Nagpa-Bible study siya sako, asin kan maipundo na niya an pagsigarilyo saka grabeng pag-inom, nabawtismuhan siya. Dangan sa paglihis nin panahon, naugma akong makikabtang sa padikit-dikit pero dagos-dagos na pag-uswag kan gibuhon sa nagkapirang rehiyon sa Niger. Kan primerong pag-abot ko, 31 an mga Saksi sa nasyon; kan maghali ako, 69 na an parahayag diyan.

“DIKIT SANA AN ARAM MI MANUNGOD SA PAGHUHULIT SA GUINEA”

Kan Disyembre 1977, nagbalik ako sa Nigeria para mag-ako nin pagsasanay. Sa pagtatapos kan tulong semanang pagsasanay, ipinabasa sako kan koordineytor kan Komite kan Sangay, si Malcolm Vigo, an sarong surat hali sa sangang opisina sa Sierra Leone. Naghahanap sinda nin sarong solterong brother na payunir na may marahay na salud asin nagtataram nin Ingles saka French para magin paraataman nin sirkito sa Guinea. Sinabi sako ni Brother Vigo na pigsanay ako para sa asignasyon na iyan. Idinuon niya na bakong madali an asignasyon. “Pag-isipan mo ngunang marhay bago mo akuon,” an sadol niya sako. Tulos man akong nagsimbag, “Dahil si Jehova an nagsusugo sako, maduman ako.”

Nag-eroplano ako pa-Sierra Leone asin nagduman sa mga brother sa sangang opisina. Sarong miyembro kan Komite kan Sangay an nagsabi sako, “Dikit sana an aram mi manungod sa paghuhulit sa Guinea.” Maski ngani an sangay an nag-aasikaso sa gibuhon na paghuhulit sa kataid na nasyon na Guinea, mayo sindang komunikasyon sa mga parahayag duman huli sa problema sa pulitika duman. Asin dawa ngani nagkapirang beses na sindang nagpurbar na magpadara nin brother para magbisita sa mga tugang sa Guinea, mayong representante na nakakalaog sa nasyon na iyan. Kaya, pinakiulayan ako na magbiyahe pasiring sa kabisera kan Guinea, an Conakry, para mag-aplay na magin residente kan nasyon.

Pag-abot ko sa Conakry, nagduman ako sa embahada kan Nigeria asin nakipag-ulay sa embahador. Sinabi ko saiya na gusto kong maghulit sa Guinea. Sinabihan niya ako na dai mag-istar duman ta puwede akong arestaron o tibaad mas malala pa an puwedeng mangyari. “Bumalik ka na sa Nigeria, duman ka maghulit,” an sabi niya. Sabi ko man, “Gusto ko po talagang mag-istar digdi.” Kaya nagpadara siya nin surat sa Guinean Minister of the Interior para tabangan ako, asin mabuot ako kaining tinabangan.

Dai nahaloy pagkatapos kaiyan, nagbalik ako sa sangang opisina sa Sierra Leone asin ipinaaram ko sainda an desisyon kan minister. Kan maaraman nindang binendisyunan ni Jehova an lakaw ko, napakurahaw sinda sa kaugmahan. Tinugutan ako kan gobyerno na mag-istar sa Guinea!

Puon 1978 sagkod 1989, naglingkod ako bilang paraataman nin sirkito sa Guinea saka sa Sierra Leone, asin bilang kasalihid na paraataman nin sirkito sa Liberia. Kan primero, parati akong nagkakahilang. Nangyayari ini minsan pag naglilingkod ako sa mga puwerang teritoryo. Pero ginigibo kan mga brother an pinakamakakaya ninda para madara ako sa ospital.

Sarong beses, nagkaigwa ako nin malalang malaria, na sinabayan pa nin bulati sa bituka. Kan maumayan na ako, naaraman ko na pinag-ulayan na daa kan mga tugang kun sain ako ilulubong! Pero sa ibong kan masakiton na mga sitwasyon na idto, dai ko lamang naisip na bayaan an asignasyon ko. Asin kumbinsido ako na an makakatao nin tunay saka nagdadanay na seguridad iyo an Diyos na kayang magbuhay nin mga gadan.

PAGTITIWALA KI JEHOVA BILANG MAG-AGOM

Kan 1988, nabisto ko si Dorcas, sarong payunir na sister na mapakumbabang marhay saka tawong espirituwal. Nagpakasal kami, asin magkaibanan na naglingkod sa pansirkitong gibuhon. Si Dorcas talagang nagin sarong mamumuton asin mapagsakripisyong agom. Magkaibanan ming piglalakaw an sagkod sa 25 kilometros na tinampo pasiring sa mga kongregasyon dara an samong mga bagahe. Sa mas hararayong kongregasyon, nagsasakay kami sa ano man na transportasyon na makukua mi para magbiyahe sa malaboy saka lubak-lubak na mga dalan.

Makusugon man an buot ni Dorcas. Halimbawa, kaipuhan mi kun minsan na magbalyo sa mga salog na dakul nin buwaya. Sarong beses, sa limang aldaw na biyahe mi, raot su mga tulay na gibo sa kahoy sa sarong salog kaya kaipuhan ming magbangka. Kan magbuhat si Dorcas para magbaba sa bangka, nahulog siya sa hararom. Pareho kaming dai tataong maglangoy, tapos may mga buwaya pa sa salog. Marahay na sana ta pigtabangan siya saka ilinigtas nin nagkapirang hoben na lalaki duman. Medyo nahaloy-haloy man pating pigbangungot kami dahil sa pangyayaring idto, pero nagpadagos pa man giraray kami sa asignasyon mi.

Sa pagpupuon kan 1992, nasurpresa kami ni Dorcas kan maaraman ming bados siya. Ini na daw an katapusan kan bilog na panahon na paglilingkod mi? Naisip mi, “Tinawan kita ni Jehova nin sarong regalo!” Kaya, Jahgift an ipinangaran mi sa aki ming babayi. Apat na taon pakapangaki ki Jahgift, ipinangaki man an tugang niyang si Eric. An samong duwang aki talagang parehong nagin mga regalo hali ki Jehova. May panahon na nakapaglingkod si Jahgift sa remote translation office sa Conakry, tapos si Eric man sarong ministeryal na lingkod.

Dawa ngani nag-abot an panahon na kaipuhan na pumundo ni Dorcas sa pagigin espesyal payunir, nagpadagos pa man giraray siya bilang regular payunir, dawa kan pinapadakula mi an mga aki mi. Sa tabang ni Jehova, nakapagpadagos ako sa espesyal na bilog na panahon na paglilingkod. Kan magdarakula na an mga aki mi, nakapag-espesyal payunir giraray si Dorcas. Sa ngunyan, pareho kaming naglilingkod bilang mga misyonero sa Conakry.

AN GIKANAN NIN TUNAY NA SEGURIDAD

Pirmi akong nagduduman sain man ako darahon ni Jehova. Parati ming namamatian ni agom an proteksiyon saka bendisyon Niya. Huli sa pagtitiwala mi ki Jehova, nalikayan mi an dakul na kahaditan na sinasapar kan mga nagtitiwala sa materyal na mga bagay. Nanudan mi ni Dorcas na an Gikanan kan tunay na seguridad iyo an “Diyos nin [satong] kaligtasan,” si Jehova. (1 Cron. 16:35) May kumpiyansa ako na an buhay kan gabos na nagtitiwala sa saiya “ilalaog ni Jehova na [satuyang] Diyos sa bag nin buhay.”​—1 Sam. 25:29.