Nagin Mapanggana sa Tabang kan Mahalagang Marhay na Kristiyanong Pamana

Kan 1913, nabawtismuhan an sakong ama na si John Mills sa New York City sa edad na 25. Si Brother Russell an nagtao kan pahayag sa bawtismo. Dai nahaloy pagkatapos, nagduman sa Trinidad si Papa asin nagpakasal sinda diyan ni Constance Farmer na sarong maigot na Estudyante sa Bibliya. Tinabangan ni Papa an amigo niyang si William R. Brown sa pagpahiling kan “Photo-Drama of Creation.” Padagos nindang ginibo iyan sagkod na iasignar an mag-agom na Brown sa Sulnupan na Aprika kan 1923. Si Papa saka si Mama, na parehong may langitnon na paglaom, nagpadagos sa gibuhon sa Trinidad.

MAMUMUTON NA MGA MAGURANG

Siyam kaming magturugang asin an pinakamatua samo pinangaranan kan mga magurang mi nin Rutherford, hali sa pangaran kan presidente kaidto kan Watch Tower Bible and Tract Society. Kan mamundag ako kan Disyembre 30, 1922, kinua an pangaran ko sa editor kan The Golden Age (ngunyan Awake!) na si Clayton J. Woodworth. Gabos kami pinaeskuwela kan mga magurang mi sagkod hayskul, pero idinuon nindang marhay an espirituwal na mga pasuhan. Matibayon si Mama sa paggamit nin nakakakumbinsir na mga pangangatanusan gamit an Kasuratan. Gustong-gusto ni Papa na iistorya sa samo an mga istorya sa Bibliya asin nag-aaksiyon siya tanganing magin buhay na buhay iyan.

Marahay an ibinunga kan saindang mga paghihinguwa. Tulo sa samo na limang magturugang na lalaki an nagklase sa Gilead School. Tulo sa mga tugang ming babayi an nagpayunir sa Trinidad and Tobago nin dakul na taon. Paagi kan saindang pagtutukdo asin marahay na halimbawa, itinanom kami kan mga magurang mi “sa harong ni Jehova.” An saindang pampakusog nin buot nakatabang sa samo na magdanay diyan asin magin marambong “sa mga patyo kan satuyang Diyos.”—Sal. 92:13, NW.

Sa samong harong inoorganisar an paghuhulit. Nagtitiripon diyan an mga payunir asin parating pinag-uurulayan si Brother George Young, sarong misyonero na taga Canada na nagbisita kaidto sa Trinidad. Maugmang iniistorya kan mga magurang ko an mapadapit sa dati nindang mga kapartner, an mag-agom na Brown, na nasa Sulnupan na Aprika na kan panahon na idto. Gabos iyan nakadagka sa sako na magpuon na maghulit kan ako diyes anyos.

PAGPUON SA GIBUHON

Prangkang marhay an mga magasin ta kaidto. Ibinubuyagyag kaiyan an palsong mga relihiyon, mahanab na komersiyalismo, asin maating pulitika. Huli kaiyan, kan 1936 sinutsutan kan klero an temporaryong nagseserbing gobernador kan Trinidad na ipagbawal an gabos na publikasyon kan Watch Tower. Itinago mi an mga literatura pero padagos ming ginamit iyan sagkod na maubos an gabos na suplay. Naghulit kami gamit an mga handbill asin plakard mantang nagmamartsa o sakay nin mga bisikleta. Kaiba kan sound car group hali sa banwa kan Tunapuna, naghulit kami dawa sa pinakahararayong lugar sa Trinidad. Maugmahon nanggad iyan! Huli sa espirituwal na kamugtakan na iyan, napahiro ako na magpabawtismo sa edad na 16.

Huli sa espirituwal na pamana kan samong pamilya asin sa inot na mga eksperyensiyang iyan sa paglilingkod, napukaw an pagmawot kong magin misyonero. Yaon pa sako an pagmawot na iyan kan magduman ako sa Aruba kan 1944 asin mag-iba ki Brother Edmund W. Cummings. Ugmahon kaming marhay kan may sampulong nag-atender sa Memoryal kan 1945. Kan suminunod na taon, nabilog an inot na kongregasyon sa isla.

Dai nahaloy pagkatapos, impormal akong nagpatotoo sa katrabaho kong si Oris Williams. Idinepensang marhay ni Oris an mga doktrinang itinukdo sa saiya. Pero paagi sa pag-adal sa Bibliya, nanudan niya kun ano man nanggad an sinasabi kan Tataramon nin Diyos asin nabawtismuhan siya kan Enero 5, 1947. Pag-abot nin panahon, nagkaminuutan kami asin nagpakasal. Nagpuon siyang magpayunir kan Nobyembre 1950. Kaiba si Oris, nagin mas maugma an buhay ko.

NAKAKAUGMANG MARHAY NA PAGLILINGKOD SA NIGERIA

Kan 1955, inimbitaran kaming magklase sa Gilead School. Bilang pag-andam sa pribilehiyong iyan, nag-resign kami ni Oris sa trabaho, ipinabakal an samong harong saka mga pagsadiri, asin naghali sa Aruba. Kan Hulyo 29, 1956, naggradwar kami sa ika-27 klase kan Gilead asin iinasignar sa Nigeria.

Sinabi ni Oris: “Matatabangan kan espiritu ni Jehova an sarong tawo na maka-adjust sa ano man na kamugtakan sa buhay bilang misyonero. Bakong arog ni agom, dai ko lamang naisip na magmisyonero. Mas gusto ko pang sa harong lang asin magpadakula nin mga aki. Binago ko an sakong kaisipan kan marealisar ko kun gurano kaapurado an paghulit kan maugmang bareta. Kan makatapos na kami sa Gilead, andam na akong maghulit bilang misyonero. Kan pasakay na kami sa barkong Queen Mary, nagbabay samo an kaiba ni Brother Knorr sa opisina na si Worth Thornton na sinasabi ‘Bon voyage!’ Sinabi niya na sa Bethel kami maglilingkod. Medyo namundo ako. Pero naka-adjust tulos ako saka nagustuhan ko na an Bethel, na diyan nagkaigwa ako nin lain-lain na trabaho. Pinakanagustuhan ko an pagigin receptionist. Gustong-gusto kong nakikipag-ulay sa mga tawo, asin sa trabahong ini nakakaulay ko nin personal an mga tugang sa Nigeria. Dakul an minaabot na maalpugon, pagal, paha, saka gutom. Nakakaugma na maistimar sinda nin kakanon asin maitao an iba pang pangangaipo ninda tanganing magin komportable sinda. Gabos iyan sagradong paglilingkod ki Jehova, asin iyan an nagtao sa sako nin satispaksiyon saka kaugmahan.” Iyo, nakatabang sa samo an lambang asignasyon na magin maugma.

Sa pagtiripon-tipon kan pamilya sa Trinidad kan 1961, inistorya ni Brother Brown an nagkapira sa nakakaugmang eksperyensiya niya sa Aprika. Dangan iinistorya ko an dapit sa pag-uswag kan gibuhon mi sa Nigeria. Mamumuton akong inakbayan ni Brother Brown asin sinabi niya ki Papa: “Johnny, dai ka nakaabot sa Aprika, pero si Woodworth iyo!” Nagsimbag si Papa: “Sige lang Worth! Padagos lang!” An siring na mga pampakusog nin buot hali sa mga beterano sa espirituwal nagpararom kan pagmawot kong lubos na utubon an sakong ministeryo.

Kan 1962, nagkapribilehiyo ako para sa dugang pang pagsasanay sa ika-37 klase kan Gilead, na may lawig na sampulong bulan. Si Brother Wilfred Gooch, an paraataman nin sangay kaidto sa Nigeria, nag-adal sa ika-38 klase tapos iinasignar sa Inglatera. Dangan ako na an iinasignar na paraataman nin sangay sa Nigeria. Arog ni Brother Brown, parati akong nagbibiyahe kaya namidbid ko asin namutan an mga tugang sa Nigeria. Maski ngani mayo sinda kan dakul na materyal na bagay na ordinaryo na sana sa mga tawong nakaistar sa mas mauswag na mga nasyon, malinaw na ipinahiling kan pagigin maugma asin kontento ninda na dai nakadepende sa kuwarta asin materyal na mga pagsadiri an maugmang buhay. Kun iisipon an saindang kamugtakan, kahanga-hangang mahiling na malinig sinda, maayos, asin kagalang-galang sa mga pagtiripon. Pag may mga kumbensiyon, dakul an nag-aarabot sakay nin mga trak asin bolekajaa (mga bus na ginigibo sa lugar ninda na bukas an mag-ibong na gilid). Parating may nakakapukaw nin interes na mga islogan an mga bus na ini. Saro diyan: “An saradit na tagdo nin tubig nakakabilog nin mahiwason na kadagatan.”

Totoo nanggad an sinasabi kan islogan na iyan! Mahalaga an paghihinguwa kan lambang indibidwal asin idinadagdag mi diyan an samuya. Kan 1974, an Nigeria an pinakainot na lugar sa luwas kan Estados Unidos na nakaabot sa 100,000 an parahayag. Nag-uswag nanggad an gibuhon!

Mantang nangyayari an pag-uswag na ini, nagkaigwa nin Giyera Sibil sa Nigeria puon 1967 sagkod 1970. Pirang bulan na nawaran nin kontak sa sangang opisina an mga tugang ta sa Biafra, na nasa balyo kan Salog nin Niger. Kaipuhan mi sindang darahan nin espirituwal na kakanon. Arog kan nasambit sa kapinunan, nagkapirang beses kaming nagbalyo sa salog na namimibi asin nagtitiwala ki Jehova.

Nagigirumduman ko pang marhay an delikadong mga pagbiyaheng idto pabalyo sa Niger. Nameligro an buhay mi huli sa mga suldados na dikit-dikit sana nambabadil na, sa hilang, asin iba pang peligro. Dipisil makalampas sa mapagsuspetsang mga suldados kan pederal pero lalong-lalo na sa lado kan Biafra na nababarikadahan. Sarong banggi, nagbalyo ako sa masulog na Salog nin Niger sakay nin pampasaherong bangka hali sa Asaba pa-Onitsha tanganing pakusugon an mga paraataman sa Enugu. Sa saro pang pagbiyahe, napakusog an mga elder sa Aba na nasa irarom kaidto nin mandato na dai maggamit nin ilaw pag banggi. Sa Port Harcourt, biglaan na tinapos paagi sa pamibi an samong pagtiripon huling nakalagbas na an mga hukbo kan pederal sa mga depensa kan Biafra sa luwas kan banwa.

Mahalagang marhay an mga pagtiripon na idto tanganing asiguraron an satong namumutan na mga tugang na padangat sinda ni Jehova saka nagmamakulog siya sa sainda, asin tanganing tawan sinda kan kinakaipuhan na marhay na konseho mapadapit sa neutralidad asin pagkasararo. Natagalan kan mga tugang sa Nigeria an masakiton na kamugtakan na iyan. Ipinahiling ninda an pagkamuot na kayang halion an ano man na pagkaungis sa tribo, asin napagdanay ninda an Kristiyanong pagkasararo. Sarong pribilehiyo nanggad na makaiba sinda sa panahon na idto nin pagbalo!

Kan 1969, si Brother Milton G. Henschel an tsirman kan “Peace on Earth” na Internasyonal na Asembleya sa Yankee Stadium, New York, asin dakul an nanudan ko bilang saiyang assistant. Napapanahon iyan huling isinagibo mi kan 1970 an “Men of Goodwill” na Internasyonal na Asembleya sa Lagos, Nigeria. Katatapos pa lang kan giyera sibil kaidto kaya siguradong nagin mapanggana an okasyon na iyan solamente sa tabang ni Jehova. Sarong pambihirang okasyon iyan na ginibo sa 17 lengguwahe asin 121,128 an nag-atender. Nahiling ni Brother Knorr, Brother Henschel, asin kan mga bisita na sakay kan arkiladong eroplano hali sa Estados Unidos asin Inglatera an saro sa pinakadakulang Kristiyanong pagbawtismo puon kan Pentecostes—3,775 bagong disipulo! An pagtabang sa pag-asikaso sa okasyon na idto an posibleng pinakasibot na panahon kan sakong buhay. An rikas kan pagdakul kan mga parahayag bako sanang pag-abante kundi pag-arangkada!

Sa labing 30 taon ko sa Nigeria, naglilingkod ako kun minsan bilang nagbibiyaheng paraataman asin bilang paraataman nin sona sa Sulnupan na Aprika. Naapresyar nanggad kan mga misyonero an personal na pag-asikaso asin pagtao sa sainda nin pampakusog nin buot! Sarong kaugmahan nanggad na siyertuhon sa sainda na dai sinda pinapabayaan! Nanudan ko sa trabahong ini na an pagpahiling nin personal na interes sa mga tawo mahalagang marhay tanganing matabangan sindang umuswag asin mapagdanay an kusog saka pagkasararo kan organisasyon ni Jehova.

Paagi sana sa tabang ni Jehova kaya nakayanan mi an mga problema huli sa giyera sibil asin hilang. Risang-risa pirmi an bendisyon ni Jehova. Sinabi ni Oris:

“Pirang beses kaming nagka-malaria. Sarong beses, dai nang malay si Worth kan darahon sa ospital sa Lagos. Sinabihan ako na tibaad magadan siya, pero marahay na sana ta dai! Kan magkamalay na siya, ipinakipag-ulay niya sa nars na nagbabantay sa saiya an mapadapit sa Kahadian nin Diyos. Dai nahaloy, nag-iba ako ki Worth tanganing dalawon an nars na si Mr. Nwambiwe tanganing kultibaron an interes kaini sa Bibliya. Inako niya an katotoohan asin nagin elder sa Aba pag-abot nin panahon. Nagin mapanggana man ako sa pagtabang sa dakul, dawa sa debotong mga Muslim, na magin dedikadong mga lingkod ni Jehova. Ikinaugma ming marhay na mamidbid asin mamutan an mga taga Nigeria, an saindang kultura, kaugalian, asin lengguwahe.”

Saro pang leksiyon ini: Tanganing magin mapanggana sa asignasyon mi sa ibang nasyon, kaipuhan ming mamutan an mga tugang maski ngani magkaibang marhay an samong kultura.

BAGONG MGA ASIGNASYON

Pagkatapos maglingkod sa Bethel sa Nigeria, nagkaigwa kami nin bagong asignasyon kan 1987 bilang mga misyonero sa magayon na isla nin St. Lucia sa Caribbean. Nakakaugma an asignasyon na iyan pero may mga kadipisilan man. Kun sa Aprika nag-aagom nin dakul an sarong lalaki, digdi sa St. Lucia, an problema iyo na an magkailusyon nag-iibanan na dai kasal. Pinahiro kan mapuwersang Tataramon nin Diyos an dakul sa mga tinutukduan mi sa Bibliya na gibuhon an kinakaipuhan na mga pagbabago.

Nagluluya asin nagkakaedad na kami kaya kan 2005, mamumuton kaming ibinalyo kan Namamahalang Grupo sa world headquarters sa Brooklyn, New York, U.S.A. Sagkod ngunyan, aroaldaw kong pinapasalamatan si Jehova huli ki Oris. Kan 2015, dinaog si Oris kan kaiwal na kagadanan asin dai ko maipaliwanag an pagmati na mayo na siya. Talagang marahayon siyang kaiba-iba asin sarong mamumuton na agom. Namutan ko siyang marhay sa 68 taon ming pag-ibanan. Nanudan mi na tanganing magin maugma an relasyon nin mag-agom asin an kongregasyon, kaipuhan na marhay na igalang an pagkapayo, lubos na magpatawad, magdanay na mapakumbaba, asin ipahiling an bunga kan espiritu.

Pag nadidisganar o pinangluluyahan nin buot, nananarig kami ki Jehova para sa tabang na makapagpadagos sa paglilingkod sa saiya. Mantang padagos kaming naggigibo nin kinakaipuhan na mga pagbabago, nahihiling ming padagos na nagigin marahay an mga bagay-bagay—asin mas marahay pa an mangyayari!—Isa. 60:17; 2 Cor. 13:11.

Sa Trinidad and Tobago, binendisyunan ni Jehova an paghuhulit kan sakong mga magurang asin kan iba pa. Sigun ngani sa pinakabagong report, 9,892 na diyan an nag-iba sa tunay na pagsamba. Sa Aruba, dakul an nagtabang tanganing pakusugon an orihinal kong kongregasyon. Ngunyan, igwa nang 14 mauswag na kongregasyon sa islang iyan. Sa Nigeria man, an mga parahayag uminabot na sa dakulang kabilangan na 381,398. Asin sa isla nin St. Lucia, may 783 nang nagsusuportar sa Kahadian ni Jehova.

Labi na akong 90 anyos ngunyan. Sinasabi kan Salmo 92:14 mapadapit sa mga nakatanom sa harong ni Jehova: “Dawa sinda gurang na padagos pa sindang matalubo; magdadanay sindang makusog asin presko.” (NW) Nagpapasalamat akong marhay sa nagin buhay ko sa paglilingkod ki Jehova. An inako kong mahalagang marhay na Kristiyanong pamana nakadagka sako na lubos na paglingkudan si Jehova. Huli sa maimbod na pagkamuot ni Jehova, tinabangan niya akong magin ‘marambong sa mga patyo kan sakuyang Diyos.’—Sal. 92:13, NW.