Padagos na Maglakaw Sigun sa Pagtubod

1. Taano ta kontentong marhay si apostol Pablo kan inisip-isip niya kun paano niya ginamit an saiyang buhay?

ARAM ni apostol Pablo na madali na siyang gadanon, pero kan inisip-isip niya kun paano niya ginamit an saiyang buhay, kontento siyang marhay. Sinabi niya: “Natapos ko na an sakuyang pagdalagan, nasunod ko an pagtubod.” (2 Tim. 4:6-8) Naggibo kaidto si Pablo nin madunong na mga desisyon sa saiyang Kristiyanong ministeryo, asin sigurado siyang naugma sa saiya si Jehova. Gusto man niyato na gumibo nin madunong na mga desisyon asin makamtan an pag-uyon nin Diyos. Paano ta iyan magigibo?

2. Ano an buot sabihon kan paglakaw sigun sa pagtubod?

² Sinabi ni Pablo manungod sa saiyang sadiri asin sa iba pang maimbod na mga Kristiyano: “Naglalakaw kita sigun sa pagtubod, asin bakong sigun sa nahihiling.” (2 Cor. 5:7) Ano an buot sabihon ni Pablo? Sa Bibliya, an ‘paglakaw’ kun minsan nanunungod sa kun paano ginagamit nin saro an saiyang buhay. Pag an sarong tawo dai naglalakaw sigun sa pagtubod, naggigibo siya nin mga desisyon base sana sa saiyang nahihiling, nadadangog, asin namamatian. Sa ibong na lado, pag an sarong tawo naglalakaw sigun sa pagtubod, naggigibo siya nin mga desisyon basado sa pagtitiwala niya sa Diyos na Jehova. Mahihiling sa saiyang mga ginigibo na kumbinsido siya na babalusan siya nin Diyos asin na makikinabang siya sa pagsunod sa mga sadol ni Jehova na yaon sa Saiyang Tataramon.—Sal. 119:66; Heb. 11:6.

3. Ano an mga pakinabang kan paglakaw sigun sa pagtubod? (2 Corinto 4:18)

³ Siyempre, gabos kita may mga desisyon na ibinabasar ta sa kun ano an satong nahihiling, nadadangog, asin namamatian. Pero posibleng marhay na magkakaproblema kita kun an ikinokonsiderar ta sana iyo an nahihiling o nadadangog ta pag naggigibo kita nin mga desisyon manungod sa importanteng mga bagay. Taano? Huling puwede kitang madaya kan satong mga nahihiling asin nadadangog. Asin maski kun dai man, kun malakaw lang kita sigun sa satong nahihiling, puwede tang mabaliwala an kabutan o mga sadol nin Diyos. (Ecl. 11:9; Mat. 24:37-39) Alagad, kun malakaw kita sigun sa pagtubod, posibleng marhay na makakagibo kita nin mga desisyon na “akseptable sa Kagurangnan.” (Efe. 5:10) An pagsunod sa sadol nin Diyos makakatao sa sato nin panglaog na katuninungan asin nin tunay na kaugmahan. (Sal. 16:8, 9; Isa. 48:17, 18) Asin kun padagos kitang malakaw sigun sa pagtubod, magkakamit kita nin buhay na daing katapusan.—Basahon an 2 Corinto 4:18.

4. Paano maaaraman nin saro kun baga naglalakaw siya sigun sa pagtubod o sigun sa nahihiling?

⁴ Paano niyato maaaraman kun baga naglalakaw kita sigun sa pagtubod o sigun sa nahihiling? Puwede niyatong haputon an satong sadiri: Sa ano ako nagpapagiya pag nagdedesisyon? Nagpapagiya sana daw ako sa mga bagay na nahihiling ko? O nagpapagiya daw ako sa mga sadol ni Jehova asin nagtitiwala sa saiya? Pag-ulayan ta kun paano kita padagos na makakalakaw sigun sa pagtubod sa tulong importanteng aspekto: pag nagpipili nin trabaho, pag nagpipili nin magigin agom, asin pag nakakaresibi nin teokratikong paggiya. Sa kada saro kaiyan, pag-uulayan ta an mga dapat tang ikonsiderar tanganing makagibo nin marahay na mga desisyon.

PAG NAGPIPILI NIN TRABAHO

5. Ano an dapat niyatong ikonsiderar pag nagpipili nin trabaho?

⁵ Gabos kita gustong masustentuhan an satong sadiri saka an satong pamilya. (Ecl. 7:12; 1 Tim. 5:8) May mga trabaho na dakula an suweldo na puwedeng makatao sa saro nin igong kuwarta para sa pang-aroaldaw na gastuson asin makatipon pa ngani. An ibang trabaho tibaad bakong arog kaiyan kadakula an suweldo—igo lang para sa panginot na mga pangangaipo kan saiyang pamilya. Pag nagdedesisyon kun baga aakuon an sarong trabaho, siyempre ikokonsiderar ta kun gurano kadakula an suweldo. Pero kun iyan sana an ikokonsiderar nin saro, tibaad naglalakaw siya panginot na sigun sa nahihiling.

6. Paano kita makakalakaw sigun sa pagtubod pag nagpipili nin trabaho? (Hebreo 13:5)

⁶ Kun naglalakaw kita sigun sa pagtubod, ikokonsiderar ta man kun ano an puwedeng magin epekto kan trabahong iyan sa satong pakikiamigo ki Jehova. Puwede tang haputon an satong sadiri: ‘Hahagadon daw kan trabahong iyan na makikabtang ako sa mga gibong ikinakaungis ni Jehova?’ (Tal. 6:16-19) ‘Makakaulang daw iyan sa sakong pagsamba asin magigin dahilan na maparayo ako sa sakong pamilya nin haloy na panahon?’ (Fil. 1:10) Kun iyo an simbag mo sa arin man diyan, sarong kadunungan na dai mo akuon an trabahong iyan, dawa pa kun masakit maghanap nin trabaho. Huling naglalakaw kita sigun sa pagtubod, naggigibo kita nin mga desisyon na nagpapahiling kan satong kumbiksiyon na sa paano man itatao ni Jehova an satong mga pangangaipo.—Mat. 6:33; basahon an Hebreo 13:5.

7-8. Paano naglakaw sigun sa pagtubod an sarong brother sa Timog Amerika? (Hilingon man an ritrato.)

⁷ Mangnuhon kun paano nahiling ni Javier,a sarong brother sa Timog Amerika, kun gurano kahalaga an paglakaw sigun sa pagtubod. Sinabi niya: “Nag-aplay ako para sa sarong mas halangkaw na posisyon na doble an suweldo asin gustong-gusto ko.” Alagad, gustong-gusto man ni Javier na magpayunir. Sinabi pa niya: “Irinekomendar ako para interbiyuhon kan national manager. Bago an interbiyu, namibi ako para sa tabang huling kumbinsido ako na aram ni Jehova kun ano an pinakamarahay para sa sako. Gusto kong umuswag sa propesyon ko, pero habo ko kan trabahong ini kun dai ini makakatabang sako na maabot an sakong espirituwal na mga pasuhan.”

⁸ Inistorya ni Javier: “Kan pig-iinterbiyu na ako kan manager, sinabi niya sako na kakaipuhanon kong parating mag-overtime. Mabuot kong ipinaliwanag na dai ko magigibo iyan huli sa sakong ministeryo.” Iyo, sinayumahan ni Javier an alok. Pakalihis nin duwang semana, nagpuon siyang magpayunir. Asin kan taon man sanang idto, nakahanap siya nin part-time na trabaho. Sinabi niya: “Dinangog ni Jehova an mga pamibi ko asin tinawan ako nin trabaho na sakto sa iskedyul ko sa pagpapayunir. Maugma talaga ako na magkaigwa nin trabaho na nakakatabang na makatao ako nin urog na panahon sa paglilingkod ki Jehova saka sa mga tugang.”

9. Ano an nanudan mo sa eksperyensiya ni Trésor?

⁹ Paano kun marealisar niyato na an trabaho ta ngunyan nakakaulang sato na maglakaw sigun sa pagtubod? Pag-isipan an eksperyensiya ni Trésor na taga Congo. Inistorya niya: “Nagkaigwa ako kaidto nin trabaho na minsan lang mag-abot sa buhay. An suweldo ko triple kan sa dati kong trabaho, saka iginagalang akong marhay.” Pero, parating dai nakakaatender sa mga pagtiripon si Trésor huli sa pag-overtime. Pigpi-pressure man siyang magputik para itago an bakong onestong mga gibo sa trabaho niya. Gusto ni Trésor na mag-resign, pero nahadit siyang mawaran nin trabaho. Ano an nakatabang saiya? Sinabi niya: “Nakatabang sako an Habakuk 3:17-19 na masabutan na dawa kun mawaran man ako nin trabaho, aatamanon ako ni Jehova sa paano man. Kaya nag-resign ako.” Sinabi niya pa: “Iniisip kan dakul na employer na para sa sarong trabaho na halangkaw an suweldo, isasakripisyo nin saro maski ano, kaiba na an panahon para sa pamilya asin sa espirituwal na mga aktibidad. Maugma ako na naingatan ko an relasyon ko ki Jehova saka sa sakong mga kapamilya. Pakalihis nin sarong taon, tinabangan ako ni Jehova na makahanap nin estableng trabaho na nakakatabang sako na mamuhay nin simple asin magkaigwa nin urog na panahon para sa Kristiyanong mga aktibidad. Pag iniinot ta si Jehova, tibaad may panahon na masakitan kita sa pinansiyal, pero dai niya kita papabayaan.” Iyo, kun magtitiwala kita sa mga sadol asin sa mga panuga ni Jehova, padagos kitang maglalakaw sigun sa pagtubod asin bebendisyunan niya kita.

PAG NAGPIPILI NIN MAGIGIN AGOM

10. Ano an puwedeng magin dahilan na an saro maglakaw sigun sa nahihiling pag nagpipili nin magigin agom?

¹⁰ An pag-aguman regalo hali ki Jehova, asin normal sana na mawuton nin saro na mag-agom. Pag an sarong sister may kinokonsiderar na sarong brother bilang potensiyal na magigin agom, tibaad hinihiling niya an personalidad kaini, itsura, reputasyon, pinansiyal na kamugtakan, mga paninimbagan sa pamilya, pati man kun baga napapaugma siya kaini.b Mahalaga an mga bagay na ini. Pero kun iyan sana an ikinokonsiderar niya, posibleng naglalakaw siya sigun sa nahihiling niya.

11. Paano kita makakalakaw sigun sa pagtubod pag nagpipili nin magigin agom? (1 Corinto 7:39)

¹¹ Siguradong proud na marhay si Jehova sa satong mga tugang na nagsusunod sa saiyang sadol pag nagpipili nin magigin agom! Halimbawa, isinasapuso ninda an sadol na maghalat sagkod na lampas na sinda sa “pagbukad nin pagkahoben” bago makipag-ilusyunan. (1 Cor. 7:36) Pag may kinokonsiderar sinda na sarong potensiyal na magigin agom, nagbabasar sinda panginot na sa sinasabi ni Jehova na mga kuwalidad nin saro na magigin marahay na agom na lalaki o marahay na agom na babayi. (Tal. 31:10-13, 26-28; Efe. 5:33; 1 Tim. 5:8) Kun may nagpapahiling sa sainda nin romantikong interes pero bakong Saksi, sinusunod ninda an sadol na mag-agom “basta sa parasunod kan Kagurangnan sana,” arog kan mahihiling sa 1 Corinto 7:39. (Basahon.) Padagos sindang naglalakaw sigun sa pagtubod, na nagtitiwala na mas kaya ni Jehova kisa sa kiisay man na itao an saindang emosyonal na mga pangangaipo.—Sal. 55:22.

12. Ano an nanudan mo sa halimbawa ni Rosa?

¹² Pag-isipan an eksperyensiya ni Rosa, sarong payunir sa Colombia. Dahil sa trabaho niya, parati sindang nagkakaulay kan sarong bakong Saksing lalaki na nagpuon na magkagusto sa saiya, asin si Rosa nagkakagusto na man sa saiya. Sinabi ni Rosa: “Kun hihilingon, marahayon man siyang tawo. Nagboboluntaryo siya sa komunidad asin mayo siyang bisyo. Gusto ko kun paano niya ako tinatrato. Yaon sa saiya an mga hinahanap ko sa sarong magigin agom kaso bako siyang Saksi.” Sinabi pa niya: “Dipisil para sako na magsayuma saiya na magin magkailusyon kami ta sarong bagay iyan na gusto ko man. Kan panahon na iyan, medyo nakakamati akong nagsosolo saka gusto ko nang mag-agom, pero dai ako makahanap nin saro na gusto ko asin nasa katotoohan.” Dawa arog kaiyan, dai nagpokus si Rosa sa kun ano lang an nahihiling niya. Hinurop-hurop niya kun paano makakaapekto an desisyon na ini sa pakikiamigo niya ki Jehova. Kaya, biyo niyang ipinundo an pakikikomunikar sa lalaki asin nagin sibot sa teokratikong mga aktibidad. Dai nahaloy pagkatapos kaiyan, inimbitaran siya na magklase sa School for Kingdom Evangelizers, asin ngunyan naglilingkod siya bilang sarong espesyal payunir. Sinabi ni Rosa: “Pinano ni Jehova an puso ko nin grabeng kaugmahan.” Dawa ngani tibaad bakong pasil na maglakaw sigun sa pagtubod kun manungod sa mga bagay na kalabot an satong emosyon asin puso, pirming sulit an paggibo kaiyan.

PAG NAKAKARESIBI NIN TEOKRATIKONG PAGGIYA

13. Ano an puwedeng magin dahilan na maglakaw kita sigun sa nahihiling pag nakaresibi kita nin teokratikong paggiya?

¹³ Parati kitang nakakaresibi nin teokratikong paggiya—hali sa mga elder sa kongregasyon, paraataman nin sirkito, sangang opisina, o sa Namamahalang Grupo—na nakakatabang sa sato sa pagsamba niyato. Pero paano kun may pagkakataon na dai ta masabutan an dahilan kan itinao sa satong paggiya? Tibaad an nahihiling ta sana iyo an posibleng magin negatibong mga epekto kaiyan sa sato. Tibaad magpuon na ngani kitang magpokus sa mga kaluyahan kan mga brother na nagtao kan paggiya.

14. Ano an makakatabang sa sato na maglakaw sigun sa pagtubod pag nakakaresibi nin teokratikong paggiya? (Hebreo 13:17)

¹⁴ Pag naglalakaw kita sigun sa pagtubod, nagtitiwala kita na kontrolado ni Jehova an mga bagay-bagay asin na aram niya an satong mga kamugtakan. Bilang resulta, nagsusunod tulos kita, asin ginigibo ta iyan nin may positibong sabuot. (Basahon an Hebreo 13:17.) Nasasabutan niyato na an satong pagkamakinuyog nakakakontribwir sa pagkasararo kan satong kongregasyon. (Efe. 4:2, 3) Nagtitiwala kita na dawa ngani bakong perpekto an mga brother na nanginginot, bebendisyunan ni Jehova an satong pagkamakinuyog. (1 Sam. 15:22) Sa tamang panahon, itatanos niya an ano man na talagang kaipuhan itanos.—Mik. 7:7.

15-16. Ano an nakatabang sa sarong brother na maglakaw sigun sa pagtubod dawa ngani nagkaigwa siya kaidto nin mga pagduda manungod sa sarong paggiya? (Hilingon man an ritrato.)

¹⁵ Pag-isipan an sarong eksperyensiya na nagduduon kan pakinabang kan paglakaw sigun sa pagtubod. Sa Peru, dawa ngani Spanish an lengguwaheng itinataram kan kadaklan, dakul man an nagtataram nin katutubong mga lengguwahe. An saro sa mga ini iyo an Quechua. Sa laog nin nagkapirang taon, hinanap kan mga tugang na nagtataram nin Quechua an mga tawong nagtataram kaiyan sa saindang teritoryo. Pero, tanganing makasunod sa mga regulasyon kan gobyerno, may ginibong mga pagliliwat sa pamamaagi kun paano pinapaabutan an mga tawo. (Roma 13:1) Huli kaiyan, may mga nag-isip kun baga makakaapektar iyan sa gibuhon sa teritoryo. Sinunod kan mga tugang an mga pagliliwat na iyan kaya binendisyunan ni Jehova an saindang mga paghihinguwa na makahanap nin dakul na tawong nagtataram nin Quechua.

¹⁶ Si Kevin, elder sa sarong kongregasyon na Quechua an lengguwahe, saro sa mga tugang na nahadit. Sinabi niya: “Naisip ko kaidto, ‘Paano mi na mahahanap an mga tawo na nagtataram nin Quechua?’” Ano an ginibo ni Kevin? Sinabi niya: “Nagirumduman ko an Talinhaga 3:5. Asin naisip ko si Moises. Siya an magiya sa mga Israelita paluwas sa Ehipto pasiring sa sarong lugar na diyan garo baga makokorner na sinda kan mga Ehipsiyo na naglalapag sa sainda. Dawa arog kaiyan, nagkuyog siya, asin binendisyunan ni Jehova sa kahanga-hangang paagi an pagkamakinuyog niya.” (Exo. 14:1, 2, 9-11, 21, 22) Andam si Kevin na i-adjust an saiyang ministeryo. Ano an nagin resulta? Sinabi niya: “Nagngalas ako sa kun paano kami binendisyunan ni Jehova. Dati, kaipuhan ming magparalakaw sa ministeryo asin kun minsan saro o duwa lang na nagtataram nin Quechua an nanunumpungan mi. Ngunyan nagpopokus kami sa mga teritoryo na diyan dakul nin nagtataram nin Quechua. Bilang resulta, mas dakul kaming nakakaulay, nadadalaw liwat, asin nagigin Bible study. Nagdakul man an nag-aatender sa mga pagtiripon.” Iyo, pag naglalakaw kita sigun sa pagtubod, pirmi kitang babalusan ni Jehova.

17. Ano an nanudan mo sa artikulong ini?

¹⁷ Pinag-ulayan ta kun paano kita padagos na makakalakaw sigun sa pagtubod sa tulong importanteng aspekto. Alagad dapat kitang padagos na maglakaw sigun sa pagtubod sa gabos na aspekto kan satong buhay— halimbawa, sa pagpili nin libangan asin sa pagdedesisyon manungod sa edukasyon o pagpadakula nin aki. Ano man na desisyon an kaipuhan tang gibuhon, dapat na ikonsiderar ta bako sana an nahihiling ta kundi pati man an satong relasyon ki Jehova, an saiyang mga sadol, asin an saiyang panuga na aatamanon niya kita. Kun gigibuhon ta iyan, ‘makakalakaw kita sa ngaran ni Jehova na satuyang Diyos sagkod nuarin pa man.’—Mik. 4:5.