Mag-asa ki Jehova Para sa Karangahan

1. Iladawan an kamugtakan kan idinistiyerong mga Judio.

IMAHINARA kun ano an namatian kan mga Judiong puwersahan na dinara sa Babilonya. Nahiling ninda an paglaglag sa saindang dagang tinubuan. Huli sa mga kasalan ninda asin kan saindang mga apuon, kinua sinda sa saindang mga harong asin dinara sa ibang nasyon. (2 Cron. 36:15, 16, 20, 21) Totoo na kan nasa Babilonya na an mga idinistiyero, may katalingkasan sinda maski paano sa saindang pang-aroaldaw na mga aktibidad. (Jer. 29:4-7) Pero, bakong pasil an buhay diyan, asin bako nanggad iyan an buhay na gusto kuta ninda. Ano an namatian ninda sa saindang kamugtakan? Mangnuhon an sinabi kan sarong maimbod na idinistiyero: “Sa may tampi kan mga salog nin Babilonya, duman kami nagturukaw. Nagtarangis kami kan samuyang magirumduman an Sion.” (Sal. 137:1) An pinangluluyahan nin buot na mga idinistiyero nangangaipo nin karangahan, pero sain ninda iyan mahahanap?

2-3. (a) Ano an ginibo ni Jehova para sa idinistiyerong mga Judio? (b) Ano an pag-uulayan ta sa artikulong ini?

² Si Jehova “an Diyos nin gabos na karangahan.” (2 Cor. 1:3) Bilang mamumuton na Diyos, nauugma siyang rangahon an gabos na minarani sa saiya. Aram ni Jehova na aakuon kan nagkapira sa mga idinistiyero an saiyang disiplina asin mabalik sa saiya. (Isa. 59:20) Kaya labing 100 na taon bago an pagkadistiyero sa sainda, pinasabngan Niya si propeta Isaias na isurat an libro na ipinangaran sa saiya. Sa anong katuyuhan? Sinabi ni Isaias: “‘Rangahon nindo, rangahon nindo an banwaan ko,’ an sabi kan saindong Diyos.” (Isa. 40:1) Iyo, paagi sa mga isinurat kan propeta, itinao ni Jehova an karangahan na kakaipuhanon kan idinistiyerong mga Judio.

³ Arog kan idinistiyerong mga Judiong idto, kaipuhan ta man nin karangahan sa pana-panahon. Sa artikulong ini, pag-uulayan niyato an tulong paagi kun paano rinanga ni Jehova an mga idinistiyero: (1) Nanuga siyang papatawadon niya an mga nagsusulsol, (2) tinawan niya nin paglaom an saiyang banwaan, asin (3) tinabangan niya sindang dai matakot. Mantang pinag-uulayan ta an mga puntong ini, mangnuhon kun paano kita makikinabang sa nakakarangang mga tataramon ni Jehova.

SI JEHOVA MAHIHIRAKON KITANG PINAPATAWAD

4. Paano ipinahiling ni Jehova na saro siyang mahihirakon na Diyos? (Isaias 55:7)

⁴ Si Jehova “an Ama nin mamumuton na pagkahirak.” (2 Cor. 1:3) Ipinahiling niya an kuwalidad na iyan kan ipinanuga niyang papatawadon niya an mga nagsusulsol na idinistiyero. (Basahon an Isaias 55:7.) Sinabi niya: “Sa daing katapusan na maimbod na pagkamuot mahihirak ako sa saimo.” (Isa. 54:8) Paano ipapahiling ni Jehova an saiyang pagkahirak? Dawa ngani sasaparon pa man giraray kan mga Judio an konsekwensiya kan saindang mga ginibo, nanuga si Jehova na dai sinda magdadanay sa Babilonya sagkod lamang. Magdadanay sindang nakadistiyero sa laog sana nin limitadong peryodo nin panahon. (Isa. 40:2) Siguradong naranga asin naasigurar kan mga tataramon na ini an mga Judiong nagsulsol asin gustong mapaugma si Jehova!

5. Kumpara sa mga Judiong bihag, taano ta may urog pa ngani kitang dahilan na masabutan an pagkahirak ni Jehova?

⁵ Ano an manunudan niyato? Andam si Jehova na patawadon an mga lingkod niya sa bulaos na paagi. Kumpara sa mga Judiong bihag, may urog pa ngani kitang dahilan ngunyan na masabutan an katotoohan na iyan. Taano? Nasasabutan niyato an basehan kan pagpapatawad ni Jehova. Ginatos na taon pagkatapos na magpropesiya si Isaias, isinugo ni Jehova digdi sa daga an saiyang namumutan na Aki tanganing itao an pantubos para sa gabos na nagsusulsol na nagkasala. An atang na iyan nagtatao kan basehan tanganing an mga kasalan “mapara,” o biyong mawara. (Gibo 3:19; Isa. 1:18; Efe. 1:7) Mahihirakon nanggad na Diyos an pinaglilingkudan niyato!

6. Taano ta nakakarangang isip-isipon an manungod sa pagkahirak ni Jehova? (Hilingon man an ritrato.)

⁶ An ipinasabong na mga tataramon ni Jehova na nasa Isaias 55:7 makakaranga sa sato kun nakakamati kita nin grabeng pagkakonsiyensiya. An nagkapira sa sato tibaad padagos na nakakamati nin pagkakonsiyensiya sa nagibo tang sala kaidto dawa pinagsulsulan ta na iyan. Tibaad lalo nang totoo iyan kun naeeksperyensiyahan ta pa an konsekwensiya kan nagibo tang sala. Pero, kun itinuga na niyato an satong mga kasalan asin itinanos an satong dalan, makakasigurado kita na pinatawad na kita ni Jehova. Asin pag si Jehova nagpapatawad, pinipili niyang dai na girumdumon an satong kasalan. (Ikumparar an Jeremias 31:34.) Kaya kun si Jehova ngani dai na pigpaparaisip an nagibo niyatong mga sala, dapat na dai ta na man iyan pagparaisipon. An mahalaga ki Jehova iyo an ginigibo ta ngunyan, bako an mga salang nagibo ta. (Ezek. 33:14-16) Asin sa dai na mahahaloy, an satong Ama nin mamumuton na pagkahirak permanente na kitang papatalingkason sa mga konsekwensiya kan mga nagibo tang sala.

7. Ano an makakapahiro sa sato na maghagad nin tabang kun may itinatago kitang kasalan?

⁷ Ano an dapat niyatong gibuhon kun nakokonsiyensiya kita huling may itinatago kitang sarong magabat na kasalan? Dinadagka kita kan Bibliya na maghagad nin tabang sa mga elder. (Sant. 5:14, 15) Minsan siring, tibaad bakong madali para sa sato na ituga an satong pagkakasala. Pero mapapahiro kitang dumulok sa maimbod na mga lalaking iyan kun nagsusulsol kita asin kun gigirumdumon niyato na mamumuton kitang papahilingan nin pagkahirak ni Jehova asin kan mga lalaking ninombrahan niya para tabangan kita. Pag-isipan kun paano naranga kan pagkahirak ni Jehova an brother na si Arthur,a na rinibok na marhay kan saiyang konsiyensiya. “Naghiling ako nin pornograpiya sa laog nin mga sarong taon,” an sabi ni Arthur. “Pero kan madangog ko an sarong pahayag manungod sa konsiyensiya, itinuga ko ki agom asin sa mga elder an kasalan ko. Pagkatapos kaiyan, nakamati na ako nin kaginhawahan, pero namumundo pa man giraray akong marhay sa nagibo ko. Ipinagirumdom sako kan mga elder na dai ako isinikwal ni Jehova. Dinidisiplina niya kita huling namumutan niya kita. An mabuot na mga tataramon ninda nakataros sa puso ko asin nakatabang na maitanos an kaisipan ko.” Ngunyan, naglilingkod si Arthur bilang sarong payunir asin ministeryal na lingkod. Nakakaranga nanggad na maaraman na pinapahilingan kita ni Jehova nin pagkahirak kun nagsusulsol kita!

SI JEHOVA NAGTATAO NIN PAGLAOM

8. (a) Anong paglaom an itinao ni Jehova sa mga idinistiyero? (b) Uyon sa Isaias 40:29-31, ano an puwedeng magin epekto nin paglaom sa mga nagsusulsol na Judio?

⁸ Sa pagmansay nin tawo, mayo na nin paglaom an mga Judiong bihag. An Pambilog na Kinaban na Kapangyarihan nin Babilonya midbid sa dai pagpatalingkas sa mga nagigin bihag kaiyan. (Isa. 14:17) Pero, nagtao si Jehova nin paglaom sa saiyang banwaan. Nanuga siya na papatalingkason niya an saiyang banwaan, asin mayong makakapugol sa saiya. (Isa. 44:26; 55:12) Para ki Jehova, an Babilonya siring sana sa alpog. (Isa. 40:15) Sa saro sanang huyop nin duros, mayo na an alpog. Ano an puwedeng magin epekto nin paglaom sa mga idinistiyero? Mararanga sinda kaiyan. Pero urog pa an magigibo kaiyan. Isinurat ni Isaias: “An mga naglalaom ki Jehova magkakaigwa nin panibagong kusog.” (Basahon an Isaias 40:29-31.) Iyo, mapapakusog sinda nin paglaom; “maralayog sinda nin halangkaw na may mga pakpak na siring sa mga agila.”

9. Anong dahilan igwa an mga idinistiyero na magtiwala sa mga panuga ni Jehova?

⁹ Tinawan man ni Jehova an mga idinistiyero nin dahilan na magtiwala sa mga panuga niya. Ano iyan? Pag-isipan an mga propesiyang nautob na. Aram ninda na nasakop kan Asiria an norteng kahadian kan Israel asin dinarang bihag an mga nakaistar diyan. (Isa. 8:4) Nahiling nindang linaglag kan mga Babilonyo an Jerusalem asin dinarang bihag an mga nakaistar diyan. (Isa. 39:5-7) Aram ninda na si Hading Zedekias binuta asin dinara sa Babilonya. (Jer. 39:7; Ezek. 12:12, 13) Gabos na ihinula ni Jehova nagkatotoo. (Isa. 42:9; 46:10) An gabos na ini siguradong nakapakusog sa pagtubod ninda na an panuga ni Jehova na papatalingkason sinda magkakatotoo man!

10. Ano an makakatabang sa sato na magdanay na may makusog na paglaom sa huring mga aldaw na ini?

¹⁰ Ano an manunudan niyato? Pag nangluluya an satong buot, mararanga kita nin paglaom asin matatabangan kita kaiyan na magkaigwa nin panibagong kusog. Nabubuhay kita sa delikadong mga panahon asin napapaatubang sa pagkontra nin makapangyarihan na mga kaiwal. Alagad, dai pangluyahan nin buot. Tinawan kita ni Jehova nin sarong magayunon na paglaom—buhay na daing katapusan na may tunay na katuninungan asin katiwasayan. Dapat na pagdanayon niyatong malinaw sa satong isip asin puso an paglaom na iyan. Ta kun dai, an satong paglaom puwedeng magin malabog arog sa sarong magayon na tanawon na dai ta nahihiling nin malinaw huling tinatanaw ta iyan sa sarong maating bintana. Paano niyato “lilinigon an bintana,” o mapagdadanay na malinaw an satong paglaom? Regular na magtao nin panahon para imahinaron kun gurano kagayon kan magigin buhay ta sa bagong kinaban. Magbasa nin mga artikulo, maghiling nin mga video, asin magdangog nin mga kantang manungod sa satong paglaom. Asin makipag-ulay ki Jehova sa pamibi manungod sa mga panuga na hinahalat-halat na niyatong mahiling na mautob.

11. Ano an nakakatabang sa sarong sister na may dai mahali-haling mga hilang na magkaigwa nin panibagong kusog?

¹¹ Pag-isipan kun paano an paglaom nakakaranga asin nakakapakusog sa sister na an pangaran Joy, na may dai mahali-haling mga hilang. Sabi niya: “Pag pagmati ko dai ko na kaya, sinasabi ko ki Jehova an kauruirarumi kong mga namamatian ta aram kong nasasabutan niya ako. Bilang simbag, tinatawan ako ni Jehova nin ‘puwersa na urog kisa sa ordinaryo.’” (2 Cor. 4:7) Iniimahinar man ni Joy na yaon na siya sa bagong kinaban, na diyan “mayo nin residente an magsasabi: ‘May hilang ako.’” (Isa. 33:24) Kun sasabihon man niyato ki Jehova an laog kan satong puso asin mapokus sa paglaom ta, magkakaigwa kita nin panibagong kusog.

12. Anong mga dahilan an igwa kita para magtiwala sa mga panuga ni Jehova? (Hilingon man an ritrato.)

¹² Arog kan ginibo niya para sa mga idinistiyero, tinawan man kita ni Jehova nin dakul na dahilan na magtiwala sa mga panuga niya. Isip-isipa an mga propesiya na nahihiling niyatong nauutob na. Halimbawa, nahihiling ta an sarong pambilog na kinaban na kapangyarihan na igwa nin “parteng makusog asin nin parteng maluya.” (Dan. 2:42, 43) Nakakabareta man kita nin mga “linog sa manlain-lain na lugar,” saka naghuhulit kita sa mga tawo sa “gabos na nasyon.” (Mat. 24:7, 14) An mga propesiyang ini asin dakul pang iba nakakapakusog sa satong pagtubod sa nakakarangang mga panuga ni Jehova na dai pa nauutob.

SI JEHOVA TINATABANGAN KITA NA DAI MATAKOT

13. (a) Mapapaatubang sa anong mga kadipisilan an mga Judio sa panahon kan pagpatalingkas sa sainda? (b) Arog kan ilinadawan sa Isaias 41:10-13, paano rinanga ni Jehova an idinistiyerong mga Judio?

¹³ Minsan ngani rinanga ni Jehova an mga idinistiyero paagi sa sarong magayunon na paglaom, aram niya na mapapaatubang sinda sa mga kadipisilan sa panahon kan pagpatalingkas sa sainda. Ihinula ni Jehova na sa paghinanapos kan pagkadistiyero kan mga Judio, sarong kongkistador an masalakay sa kataraid na mga nasyon dangan aatakihon mismo an Babilonya. (Isa. 41:2-5) Dapat daw na matakot an mga Judio? Patiinot nang rinanga ni Jehova an saiyang banwaan, na sinasabi: “Dai ka matakot, ta kaibanan mo ako. Dai ka maghadit, ta ako an saimong Diyos.” (Basahon an Isaias 41:10-13.) Ano an buot niyang sabihon kan “ako an saimong Diyos”? Dai niya ipinapagirumdom sa mga Judio na sambahon ninda siya—aram na ninda iyan. Imbes, ipinapagirumdom niya sa sainda na siya nasa kampi pa man giraray ninda.—Sal. 118:6.

14. Sa ano pang paagi tinabangan ni Jehova an mga idinistiyero na dai matakot?

¹⁴ Tinabangan man ni Jehova an mga idinistiyero na dai matakot paagi sa pagpagirumdom sa sainda kan saiyang daing limiteng kapangyarihan asin kaaraman. Dinagka niya sinda na magtangad sa mabituon na kalangitan. Sinabi niya sa sainda na dai niya lang linalang an mga bituon kundi aram niya man an pangaran kan kada saro kaiyan. (Isa. 40:25-28) Kaya lalo nang aram ni Jehova an pangaran kan lambang saro sa mga lingkod niya! Asin kun igwa si Jehova kan kapangyarihan na lalangon an mga bituon, siguradong igwa man siya kan kapangyarihan na tabangan an saiyang banwaan. Iyo, mayong dahilan an idinistiyerong mga Judio na mahadit o matakot.

15. Paano inandam ni Jehova an idinistiyerong mga Judio para sa mangyayari sa maabot?

¹⁵ Inandam man ni Jehova an saiyang banwaan para sa mangyayari sa maabot. Sa mas nainot na parte kan libro nin Isaias, sinabi nin Diyos sa nasyon: “Lumaog ka . . . sa saimong tagong mga kuwarto, asin isara mo an saimong mga pinto. Magtago ka nin kadikit na panahon sagkod na makalihis an grabeng kaanggutan.” (Isa. 26:20) Posibleng nagkaigwa nin inot na kautuban an mga tataramon na ini kan sakupon ni Hading Ciro an Babilonya. Sinabi kan sarong suanoy na Griegong historyador na kan laugon ni Ciro an Babilonya, “ipinagbuot [niya sa saiyang mga suldados] na gadanon an gabos na mahiling nindang nasa luwas kan mga pinto.” Imahinara na sana an takot na namati kan mga nakaistar sa Babilonya! Pero posibleng marhay na nakaligtas an idinistiyerong mga Judio huling sinunod ninda an instruksiyon ni Jehova.

16. Taano ta dai kita dapat mahadit na marhay manungod sa mangyayari sa maabot? (Hilingon man an ritrato.)

¹⁶ Ano an manunudan niyato? Sa dai na mahahaloy, mapapaatubang kita sa pinakadakulang kasakitan sa kasaysayan nin tawo. Pag nagpuon na iyan, an mga tawo sa pangkagabsan magkakariribaraw asin magkakatarakot. Pero an mga lingkod ni Jehova, dai. Aram niyato na si Jehova an satong Diyos. Matindog kita nin tanos, huling aram niyato na “naghaharani na an pagliligtas sa [sato].” (Luc. 21:28) Dawa pag salakayon na kita nin sarong koalisyon nin mga nasyon, matindog kita nin marigon. Poproteksiyunan kita ni Jehova paagi sa mga anghel asin tatawan nin nagliligtas-buhay na mga instruksiyon. Paano niya itatao sa sato an mga instruksiyon na iyan? Dai ta pa aram. Pero, posibleng marhay na mareresibi ta an siring na mga instruksiyon paagi sa satong mga kongregasyon. An mga ini an posibleng magin garo “tagong mga kuwarto” niyato, na diyan magigin ligtas kita. Paano kita maandam para sa mangyayari sa maabot? Dapat na magin dayupot kita sa satong mga tugang, magin andam na magsunod sa teokratikong paggiya, asin magin kumbinsido na si Jehova an nanginginot sa satong organisasyon.—Heb. 10:24, 25; 13:17.

17. Paano mo maipapahiling na nag-aasa ka ki Jehova para sa karangahan?

¹⁷ Dawa ngani mapapaatubang sa dipisil na sitwasyon an idinistiyerong mga Judio, tinawan sinda ni Jehova kan karangahan na kakaipuhanon ninda. Arog man kaiyan an gigibuhon niya para sa sato. Kaya ano man an tibaad mangyari sa maabot, padagos na mag-asa ki Jehova para sa karangahan. Iyo, magtiwala sa saiyang dakulang pagkahirak. Pagdanayon na buhay an saimong paglaom. Tandaan, si Jehova an saimong Diyos kaya mayo kang dapat ikatakot.