Hanapon an Siyudad na Magdadanay

1. Ano an ihinula ni Jesus na mangyayari sa inot na siglong Jerusalem?

MGA pirang aldaw bago an saiyang kagadanan, nagtao si Jesu-Cristo nin sarong detalyadong propesiya na nagkaigwa nin inot na kautuban kaidtong mga huring aldaw kan Judiong sistema nin mga bagay. Nagtao siya nin patanid na sarong aldaw, an siyudad nin Jerusalem ‘mapapalibutan nin nagkakampong mga hukbo.’ (Luc. 21:20) Sinabi ni Jesus sa saiyang mga parasunod na pag nahiling na ninda an mga hukbong iyan—na iyo an mga hukbo nin Roma—kaipuhan na nindang maghali tulos.—Luc. 21:21, 22.

2. Anong pagirumdom an itinao ni apostol Pablo sa mga Kristiyanong Hebreo sa Judea asin Jerusalem?

² Mga pirang taon pa sana bago palibutan kan mga hukbo nin Roma an Jerusalem, naggibo si apostol Pablo nin sarong mapuwersang surat na midbid ngunyan bilang an libro nin Hebreo. Sa surat na iyan, tinawan ni Pablo an mga Kristiyano sa Judea asin Jerusalem nin mahalagang marhay na sadol na makakatabang sa sainda na mag-andam para sa mangyayari sa maabot. Ano talaga an mangyayari sa maabot? An Jerusalem malalaglag. Kun gusto kan mga Kristiyanong idto na makaligtas, kaipuhan nindang magin andam na bayaan an saindang mga harong asin mga negosyo. Kaya may koneksiyon sa siyudad nin Jerusalem, isinurat ni Pablo: “Mayo kita digdi nin siyudad na nagdadanay.” Dangan sinabi niya pa: “Kundi udok niyatong hinahanap an saro na maabot.”—Heb. 13:14.

3. Ano “an siyudad na igwa nin tunay na mga pundasyon,” asin taano ta hinahanap ta iyan?

³ An mga Kristiyano na nagdesisyon na bayaan an Jerusalem asin Judea posibleng marhay na pigparatuya kan mga tawo, pero an desisyon na iyan nakapagligtas kan saindang buhay. Sa ngunyan, tinutuya-tuya kita huling bako kita sa mga tawo nagtitiwala saka dai kita naghahanap nin buhay na tiwasay asin komportable sa kinaban na ini. Kaya, taano ta ginibo niyato an desisyon na iyan? Aram niyato na an sistemang ini nin mga bagay temporaryo sana. An hinahanap ta iyo “an siyudad na igwa nin tunay na mga pundasyon,” an buot sabihon, “an saro na maabot,” an Kahadian nin Diyos.a (Heb. 11:10; Mat. 6:33) Sa artikulong ini, pag-uulayan sa kada subtema: (1) kun paano nakatabang an ipinasabong na sadol ni Pablo sa inot na siglong mga Kristiyano na padagos na hanapon “an [siyudad] na maabot,” (2) kun paano sinda iinandam ni Pablo para sa mga mangyayari sa maabot, asin (3) kun paano nakakatabang sa sato ngunyan an saiyang sadol.

MAGTIWALA SA SARO NA NUNGKA KANG BABAYAAN

4. Taano ta importante an Jerusalem para sa mga Kristiyano?

⁴ Importante an Jerusalem para sa mga Kristiyano. An Kristiyanong kongregasyon kan inot na siglo inestablisar diyan kan 33 C.E., asin an namamahalang grupo kaiyan yaon sa siyudad na iyan. Dugang pa, dakul na Kristiyano an may sadiring harong asin nagkaigwa nin dakul na pagsadiri sa siyudad na iyan. Pero, pinatanidan ni Jesus an saiyang mga parasunod na kakaipuhanon nindang maghali sa Jerusalem asin maski sa Judea.—Mat. 24:16.

5. Paano inandam ni Pablo an mga Kristiyano para sa mangyayari sa maabot?

⁵ Tanganing maiandam an mga Kristiyano para sa mangyayari sa maabot, tinabangan sinda ni Pablo na magpokus sa kun ano an pagmansay ni Jehova sa siyudad nin Jerusalem. Ipinagirumdom sa sainda ni Pablo na para ki Jehova, an templo, an pagkasaserdote, asin an mga dulot na inaatang sa Jerusalem bako nang sagrado. (Heb. 8:13) An kadaklan sa mga nakaistar sa siyudad isinikwal an Mesiyas. An templo sa Jerusalem bako na an sentro kan dalisay na pagsamba ki Jehova, asin lalaglagon iyan.—Luc. 13:34, 35.

6. Taano ta napapanahon sa mga Kristiyano kaidto an sadol ni Pablo na nasa Hebreo 13:5, 6?

⁶ Kan magsurat si Pablo sa mga Hebreo, an Jerusalem sarong mauswag na siyudad. An Jerusalem inapod kan sarong Romanong awtor kan panahon na iyan bilang “an pinakabantog na siyudad sa Sirangan.” An mga Judio hali sa dakul na kadagaan nagbibiyahe pasiring diyan nin nagkapirang beses kada taon tanganing iselebrar an mga kapiyestahan, na nakakontribwir sa pag-uswag kan ekonomiya. Daing duda na nakinabang man an nagkapirang Kristiyano sa paborableng sitwasyon na iyan sa ekonomiya. Tibaad iyan an dahilan kaya sinabi sa sainda ni Pablo: “An saindo lugod na pamumuhay dai mahilingan nin pagkamuot sa kuwarta, mantang kontento na kamo sa mga bagay na igwa kamo.” Dangan kinotar niya an sarong mapuwersang asigurasyon na nasa Kasuratan, na nagpapahayag kan personal na garantiya ni Jehova: “Dai taka nuarin man babayaan, asin dai taka nuarin man papabayaan.” (Basahon an Hebreo 13:5, 6; Deu. 31:6; Sal. 118:6) An mga Kristiyano na nakaistar sa Jerusalem asin Judea kakaipuhanon an asigurasyon na ini. Taano? Huling dai mahahaloy pakaresibi kan surat na ini, mapipiritan sindang bayaan an saindang mga harong, mga negosyo, asin an kadaklan sa saindang pagsadiri. Dangan kakaipuhanon nindang magpuon nin panibagong buhay sa ibang lugar, asin bako iyan madali.

7. Taano ta dapat ta nang pakusugon ngunyan an satong pagtitiwala ki Jehova?

⁷ Leksiyon para sa sato: Ano an mangyayari sa maabot? An katapusan kan presenteng sistemang ini nin mga bagay durante kan “dakulang kasakitan.” (Mat. 24:21) Arog kan inot na siglong mga Kristiyano, dapat kitang magdanay na mata asin magin andam. (Luc. 21:34-36) Sa panahon kan dakulang kasakitan, tibaad kaipuhanon tang bayaan an nagkapira o an gabos na pagsadiri ta, na lubos na nagtitiwala na nungkang papabayaan ni Jehova an saiyang mga lingkod. Dawa ngunyan, bago magpuon an kasakitan na iyan, igwa kita nin oportunidad na ipahiling kun sa ano kita nagtitiwala. Haputon an sadiri, ‘Ipinapahiling daw kan mga ginigibo saka kan mga pasuhan ko na nagtitiwala ako bako sa kayamanan kundi sa Diyos na nanunuga na aatamanon niya ako?’ (1 Tim. 6:17) Siyempre, dawa ngani may mga manunudan kita sa nangyari kan inot na siglo, an maabot na “dakulang kasakitan” magigin daing kaagid. Kaya paano ta maaaraman kun ano mismo an gigibuhon ta pag nagpuon na an kasakitan na iyan?

MAGSUNOD SA MGA NANGINGINOT

8. Anong instruksiyon an itinao ni Jesus sa saiyang mga disipulo?

⁸ Mga pirang taon pakaresibi kan surat ni Pablo sa mga Hebreo, nahiling kan mga Kristiyano na napapalibutan kan mga hukbo nin Roma an siyudad nin Jerusalem. Senyales iyan na panahon na para sinda magdulag; an siyudad nin Jerusalem lalaglagon. (Mat. 24:3; Luc. 21:20, 24) Pero sain sinda maduman? Ini sana an sinabi ni Jesus: “An mga nasa Judea dumulag na pasiring sa kabukidan.” (Luc. 21:21) Dakul na kabukidan sa rehiyon na iyan. Kaya sa anong direksiyon sinda madulag?

9. Taano ta tibaad naisip kan mga Kristiyano na magdulag sa nagkapirang kabukidan sa palibot ninda? (Hilingon man an mapa.)

⁹ Pag-isipan an nagkapira sa mga kabukidan na puwede kutang diyan magdulag an mga Kristiyano: an kabukidan nin Samaria, an kabukidan nin Galilea, an Bukid nin Hermon asin an kabukidan nin Lebanon, saka an kabukidan sa balyo kan Jordan. (Hilingon an mapa.) An nagkapira sa mga siyudad sa mabukid na mga lugar na iyan tibaad garo baga ligtas na mga lugar. Halimbawa, an siyudad nin Gamla yaon sa magapong ibabaw nin sarong halangkaw na bukid asin dipisilon na maabot. Para sa nagkapirang Judio, an siyudad na iyan sarong ligtas na lugar na angay na magin pailihan. Pero nangyari sa Gamla an sarong maringis na ralaban sa pag-ultanan kan mga Judio asin kan mga Romano, asin nagadan an dakul sa mga nakaistar diyan.b

10-11. (a) Sa anong paagi posibleng nagtao si Jehova nin paggiya? (Hebreo 13:7, 17) (b) Paano nakinabang an mga Kristiyano sa pagsunod sa mga nanginginot? (Hilingon man an ritrato.)

¹⁰ Minalataw na giniyahan ni Jehova an mga Kristiyano paagi sa mga nanginginot sa kongregasyon. An historyador na si Eusebius kan huri nagsurat: “An mga tawo sa kongregasyon sa Jerusalem, paagi sa paggiya nin Diyos, nag-ako nin kapahayagan na itinao sa inuyunan na mga lalaki; ipinagbuot sa sainda . . . na maghali sa siyudad bago an giyera asin mag-istar sa sarong siyudad sa Perea na an apod Pella.” An Pella sarong marahay na lugar para diyan magduman an mga Kristiyano. Harani iyan sa Jerusalem, kaya madali lang iyan madumanan. An mayoriya sa siyudad na iyan mga Hentil, asin bako iyan gayong apektado kan panatikong mga Judio na nakikipaglaban para sa saindang katalingkasan asin kan mga pakikipaglaban ninda sa mga Romano.—Hilingon an mapa.

¹¹ An mga Kristiyano na nagdulag pasiring sa mga kabukidan iinaplikar an sadol ni Pablo na “magin masinunod sa mga nanginginot” sa kongregasyon. (Basahon an Hebreo 13:7, 17.) Bilang resulta, nakaligtas an mga lingkod nin Diyos. Pinapatunayan kan kasaysayan na dai pinabayaan nin Diyos an mga ‘naghahalat sa siyudad na igwa nin tunay na mga pundasyon’—an Kahadian nin Diyos.—Heb. 11:10.

12-13. Paano giniyahan ni Jehova an saiyang banwaan sa masakiton na mga panahon?

¹² Leksiyon para sa sato: Ginagamit ni Jehova an mga nanginginot tanganing tawanan an saiyang mga lingkod nin espesipikong mga paggiya. Dakul sa Kasuratan nin mga halimbawa kun paano si Jehova nagtao nin mga pastor tanganing giyahan an saiyang banwaan sa masakiton na mga panahon. (Deu. 31:23; Sal. 77:20) Asin sa satong panahon, dakul kitang nahihiling na mga ebidensiya na padagos na ginagamit ni Jehova an mga nanginginot.

¹³ Halimbawa, kan magpuon an COVID-19 na pandemya, an “mga nanginginot” nagtao nin kinakaipuhan na paggiya. Nakaresibi an mga elder nin mga instruksiyon para maitao an espirituwal na mga pangangaipo kan mga tugang. Dai nahaloy pagkapuon kan pandemya, nagsagibo kita nin makasaysayan na kumbensiyon sa labing 500 na lengguwahe paagi sa Internet, TV, asin radyo. Dai nagpundo an bulos kan espirituwal na kakanon. Bilang resulta, nagdanay kitang may pagkasararo. Makakapagtiwala kita na ano man na mga pagbalo an tibaad mapaatubang sa sato sa maabot, padagos na tatabangan ni Jehova an mga nanginginot tanganing makagibo nin madunong na mga desisyon. Apuwera sa pagtitiwala ki Jehova asin pagigin makinuyog sa saiyang mga pagbuot, ano pang ibang mga kuwalidad an makakatabang sa sato na makapag-andam para sa dakulang kasakitan asin humirong may kadunungan durante kan masakiton na panahon na iyan?

MAGPAHILING NIN PAGKAMUOT NA SA-MAGTURUGANG ASIN MAGIN MAPAG-ISTIMAR

14. Uyon sa Hebreo 13:1-3, anong mga kuwalidad an kinaipuhan na ipahiling kan mga Kristiyano durante kan huring mga aldaw kan Judiong sistema nin bagay?

¹⁴ Pag nagpuon na an dakulang kasakitan, kakaipuhanon tang magpahiling nin pagkamuot sa lambang saro nin urog kisa kasuarin man. Para magibo iyan, kaipuhan tang sunudon an halimbawa kan mga Kristiyanong idto na nakaistar sa Jerusalem asin Judea. Kaidto pa, nagpapahiling na sinda nin pagkamuot sa lambang saro. (Heb. 10:32-34) Pero sa huring mga taon bago an katapusan kan Judiong sistema nin mga bagay, kinaipuhan kan mga Kristiyano na urog pang magpahiling nin “pagkamuot na sa-magturugang” asin “pagkamapag-istimar.”c (Basahon an Hebreo 13:1-3.) Magigin totoo man iyan sa sato mantang lalong naghaharani an katapusan kan sistemang ini nin mga bagay.

15. Taano ta kinaipuhan kan mga Kristiyanong Hebreo na magpahiling nin pagkamuot na sa-magturugang asin pagkamapag-istimar pagkatapos nindang magdulag?

¹⁵ Kan palibutan na kan mga hukbo nin Roma an Jerusalem dangan biglang mag-atras, nagdurulag an mga Kristiyano asin dikit lang an saindang dara-dara. (Mat. 24:17, 18) Kinaipuhan nindang magdepende sa lambang saro mantang nagbabaklay sinda pasiring sa mga kabukidan asin mantang nagpupuon sinda nin panibagong buhay sa sarong bagong lugar. Siguradong nagkaigwa nin dakul na “panahon na may biglaan na pangangaipo,” asin nakatao ini sa mga Kristiyano kan oportunidad na magpahiling nin tunay na pagkamuot na sa-magturugang asin pagkamapag-istimar paagi sa pagsuportar sa lambang saro asin paghiras kun ano an igwa sinda.—Tito 3:14.

16. Paano kita makakapahiling nin pagkamuot sa satong mga kapwa parasamba na nangangaipo nin tabang? (Hilingon man an ritrato.)

¹⁶ Leksiyon para sa sato: Pinapahiro kita nin pagkamuot na alalayan an satong mga kapwa parasamba pag kaipuhan ninda an satong tabang. Dakul sa mga lingkod nin Diyos an nagin andam na itao an espirituwal asin materyal na mga pangangaipo kan saindang mga tugang na nagin mga refugee huli sa dai pa sana nahahaloy na mga giyera asin mga kalamidad. Sarong sister na taga Ukraine na binayaan an saiyang harong huli sa giyera an nagsabi: “Namatian mi an kamot ni Jehova na ginigiyahan saka tinatabangan kami paagi kan mga tugang. Pinadagos ninda kami saka tinabangan kaming marhay sa Ukraine, sa Hungary, asin ngunyan digdi sa Germany.” An mga nagpapahiling nin pagkamapag-istimar sa saindang mga tugang asin itinatao an saindang mga pangangaipo garo mga kasangkapan sa mga kamot ni Jehova.—Tal. 19:17; 2 Cor. 1:3, 4.

17. Taano ta mahalagang marhay na magpahiling na kita ngunyan nin pagkamuot na sa-magturugang asin magin mapag-istimar?

¹⁷ Siguradong lalo nang kakaipuhanon niyato an siring na tabang sa maabot na panahon. (Hab. 3:16-18) Sinasanay na kita ngunyan ni Jehova na magpahiling nin pagkamuot na sa-magturugang asin magin mapag-istimar, mga kuwalidad na magigin mahalagang marhay nanggad sa panahon na iyan.

AN MANGYAYARI SA MAABOT

18. Paano niyato maaarog an mga Kristiyanong Hebreo kan inot na siglo?

¹⁸ Arog kan pinapatunayan kan kasaysayan, an mga Kristiyanong nagdurulag pasiring sa mga kabukidan nakalikay sa kapahamakan na nangyari sa Jerusalem. Binayaan ninda an siyudad, pero nungka sindang binayaan ni Jehova. Kumusta man sa panahon ta? Dai niyato aram an eksaktong mangyayari sa maabot. Pero igwa kita kan patanid ni Jesus na magin andam na humiro. (Luc. 12:40) Igwa man kita kan sadol ni Pablo na itinao niya sa saiyang surat sa mga Hebreo, sarong sadol na aplikado sa satong panahon arog kaidto kan inot na siglo. Asin tinawan mismo kita ni Jehova nin garantiya na nungka niya kitang babayaan o papabayaan. (Heb. 13:5, 6) Lugod na udok niyatong hanapon an siyudad na magdadanay—an Kahadian nin Diyos—asin ikaugma an daing sagkod na mga bendisyon na dara kaiyan.—Mat. 25:34.