Taano ta Marahay na Maghagad nin Sadol?

1. Paano kita makakagibo nin madunong na mga desisyon, asin paano ta magigibong magin mapanggana an satong mga plano? (Talinhaga 13:10; 15:22)

GABOS kita gustong makagibo nin madunong na mga desisyon. Asin gabos kita gustong magin mapanggana an satong mga plano. Sinasabi sa sato kan Tataramon nin Diyos kun paano ta parehong maisasagibo an duwang bagay na iyan.—Basahon an Talinhaga 13:10; 15:22.

2. Ano an ipinapanuga ni Jehova na gigibuhon niya para sa sato?

² Siyempre, an pinakanangungurog na Personang mahahagadan ta nin kadunungan asin sadol iyo an satong Ama, si Jehova. Nanunuga siya na tatabangan niya kita. Sinabi niya: “Tatawan taka nin sadol mantang nakahiling ako sa saimo.” (Sal. 32:8) Ipinapahiling kan mga tataramon na ini na bako lang basta pagtao nin sadol an ginigibo niya para sa sato—pinapahilingan niya kita nin personal na interes asin tinatabangan kitang iaplikar an saiyang sadol.a

3. Ano an pag-uulayan ta sa artikulong ini?

³ Sa artikulong ini, gagamiton ta an Tataramon nin Diyos para tabangan kitang masimbag an apat na hapot: (1) Anong mga kuwalidad an dapat na igwa ako tanganing makinabang sa marahay na sadol? (2) Siisay an makakatao sa sako nin marahay na sadol? (3) Paano ako magdadanay na igwa nin bukas na isip asin puso? (4) Taano ta dapat kong likayan na hagadon sa iba na sinda an magdesisyon para sa sako?

ANONG MGA KUWALIDAD AN DAPAT NA IGWA AKO?

4. Tanganing makinabang sa marahay na sadol, anong mga kuwalidad an dapat na igwa kita?

⁴ Dapat kitang magin mapakumbaba asin hababa an buot tanganing makinabang sa marahay na sadol. Kaipuhan tang akuon na tibaad mayo kita kan eksperyensiya o kaaraman para makagibo nin madunong na mga desisyon na mayo nin tabang kan iba. Kun bako kitang mapakumbaba asin bakong hababa an buot, dai kita matatabangan ni Jehova. Bilang resulta, an ano man na sadol na nakukua ta sa pagbasa niyato kan Tataramon nin Diyos tibaad magin arog sa tubig na minaagi lang sa ibabaw nin gapo. (Mik. 6:8; 1 Ped. 5:5) Alagad, kun mapakumbaba kita asin hababa an buot, susupsupon ta, an buot sabihon, aakuon ta tulos an ano man na nadadangog tang basado sa Bibliyang sadol asin iaaplikar iyan.

5. Anong mga bagay an naisagibo ni Hading David na puwede kutanang nagin dahilan na magin mapalangkaw siya?

⁵ Pag-isipan kun ano an manunudan ta sa halimbawa ni Hading David. Puwede kutanang nagin mapalangkaw siya huli sa mga naisagibo niya. Haloy pa bago siya magtukaw sa trono, midbid na siya bilang matibayon na musikero. Pinaduman pa ngani siya sa hadi tanganing magtugtog nin musika. (1 Sam. 16:18, 19) Pagkatapos na lahidan si David bilang an sunod na hadi, tinawan siya ni Jehova nin banal na espiritu kaya nakapahiling siya nin pambihirang kusog. (1 Sam. 16:11-13) Popular siya sa mga tawo huling ginadan niya an saindang mga kalaban, kaiba na an higanteng Filisteong si Goliat. (1 Sam. 17:37, 50; 18:7) Kun mapalangkaw na tawo an nakagibo nin siring kapambihirang mga bagay, tibaad isipon niyang dai na niya kaipuhan na magdangog sa sadol nin iba. Pero bakong arog kaiyan si David.

6. Paano ta naaraman na nagdadangog si David sa sadol kan iba? (Hilingon man an ritrato.)

⁶ Kan magin hadi na si David, pinili niyang magin mga amigo an mga indibidwal na makakatao sa saiya nin marahay na sadol. (1 Cron. 27:32-34) Bako ining makangangalas huling kaidto pa, nagdadangog na si David sa marahay na mga sadol sa saiya. Nagdangog siya bako lang sa mga lalaki kundi pati man sa sarong babayi na an pangaran Abigail. Agom siya ni Nabal na sarong lalaking daing galang, ingrato, asin puro sana sadiri an iniisip. Mapakumbabang sinunod ni David an marahay na suhestiyon ni Abigail asin, bilang resulta, nalikayan niyang makagibo nin magabat na pagkakasala.—1 Sam. 25:2, 3, 21-25, 32-34.

7. Ano an mga manunudan ta sa halimbawa ni David? (Eclesiastes 4:13) (Hilingon man an mga ritrato.)

⁷ Makakanuod kita nin nagkapirang leksiyon ki David. Halimbawa, tibaad maabilidad kita o may awtoridad sa iba. Dawa arog kaiyan, dapat na nungka tang isipon na aram ta an gabos asin na dai ta kaipuhan nin sadol. Asin arog ni David, dapat na magin andam kitang magdangog sa marahay na sadol, siisay man an nagtatao kaiyan. (Basahon an Eclesiastes 4:13.) Kun gigibuhon ta iyan, posibleng marhay na malilikayan tang makagibo nin seryosong mga pagkakasala na magkakawsa nin mga problema sa sato asin sa iba.

SIISAY AN MAKAKATAO SA SAKO NIN MARAHAY NA SADOL?

8. Taano ta kuwalipikado si Jonathan na magtao nin sadol ki David?

⁸ Pag-isipan an saro pang manunudan ta sa halimbawa ni David. Nagdangog siya sa sadol kan mga tawong may marahay na relasyon ki Jehova asin nakakasabot na marhay sa partikular na problemang napapaatubang sa saiya. Halimbawa, kan gusto niyang maaraman kun puwede pa niyang maibalik an marahay na relasyon ki Hading Saul, nagdangog si David sa sadol ni Jonathan na aki ni Saul. Taano ta nakatao si Jonathan nin marahay na sadol? Huling apuwera sa may marahay siyang relasyon ki Jehova, dakul man siyang eksperyensiya kun manungod sa pakikiiba-iba ki Saul. (1 Sam. 20:9-13) Paano ta puwedeng iaplikar an leksiyon na ini?

9. Kiisay kita dapat na magkonsulta pag kaipuhan ta nin sadol? Ipaliwanag. (Talinhaga 13:20)

⁹ Pag kaipuhan ta nin sadol, marahay na magkonsulta kita sa saro na may marahay na relasyon ki Jehova asin eksperyensiyado sa bagay na kaipuhan ta nin tabang.b (Basahon an Talinhaga 13:20.) Halimbawa, ipamugtak na may sarong hoben na brother na naghahanap nin angay na maaagom. Siisay an makakatao sa saiya nin marahay na sadol? An sarong daing agom na amigo tibaad makatao nin kapaki-pakinabang na sadol kun ibinabasar niya iyan sa mga prinsipyo sa Bibliya. Pero an hoben na brother posibleng marhay na makakakua nin mas espesipiko asin mas praktikal na sadol kun makonsulta siya sa sarong maygurang sa espirituwal na mag-agom na midbid siyang marhay asin na huruhalawig nang maugmang magkaibanan.

10. Ano an pag-uulayan ta ngunyan?

¹⁰ Napag-ulayan na niyato an duwang kuwalidad na dapat na igwa kita pati man kun siisay an makakatao sa sato nin marahay na sadol. Pag-ulayan ta ngunyan kun taano ta dapat kitang magdanay na may bukas na isip asin puso saka kun baga dapat tang hagadon sa iba na sinda an magdesisyon para sa sato.

PAANO AKO MAGDADANAY NA MAY BUKAS NA ISIP ASIN PUSO?

11-12. (a) Ano an tibaad gibuhon niyato kun minsan? (b) Ano an ginibo ni Hading Rehoboam kan kinaipuhan niyang gumibo nin mahalagang desisyon?

¹¹ Kun minsan, an saro garo baga naghahagad man nin sadol, pero an totoo, gusto niya lang palan na kumpirmaron sa iba an sarong desisyon na ginibo niya na. An arog kaiyan na indibidwal mayo talaga nin bukas na isip asin puso. Dapat siyang makanuod sa nangyari ki Hading Rehoboam.

¹² Si Rehoboam an nagsalida ki Hading Solomon bilang tagapamahala kan Israel. Dati nang mauswag an nasyon kan magin hadi si Rehoboam, pero pagmati kan mga tawo pinagabatan sindang marhay ni Solomon. Nagduman ki Rehoboam an mga tawo asin nakiulay na pagianon an pasan ninda. Sinabi ni Rehoboam na tawan ninda siya nin panahon na magdesisyon. Kan primero marahay an ginibo niya ta naghagad siya nin suhestiyon sa mga gurang na lalaki na nagtabang kaidto ki Solomon. (1 Ha. 12:2-7) Alagad, dai niya sinunod an isinuhestiyon kan mga gurang na lalaking ini. Taano? Nakagibo na daw nin desisyon si Rehoboam bago pa kaiyan asin gusto niya lang maghanap nin saro na mauyon sa saiya? Kun iyo, nakua niya an kumpirmasyon na iyan sa suhestiyon na itinao sa saiya kan mga hoben na amigo niya. (1 Ha. 12:8-14) An suhestiyon na iyan kan mga amigo niya an mismong sinabi ni Rehoboam sa mga tawo. Bilang resulta, nabanga an nasyon, asin puon kaidto, pirmi na sanang may kariribukan sa pamamahala ni Rehoboam.—1 Ha. 12:16-19.

13. Paano ta maaaraman kun igwa kita nin bukas na isip asin puso?

¹³ Ano an manunudan ta sa halimbawa ni Rehoboam? Pag naghahagad kita nin sadol, dapat na igwa kita nin bukas na isip asin puso. Paano ta maaaraman kun igwa kita kaiyan? Puwede tang ihapot sa satong sadiri, ‘Naghahagad daw ako nin sadol pero binabaliwala man sana iyan dahil bako iyan an gusto kong madangog?’ Pag-isipan an sarong halimbawa.

14. Pag tinatawan kita nin sadol, ano an dapat tang tandaan? Iilustrar. (Hilingon man an ritrato.)

¹⁴ Igwa ngaya nin sarong brother na inalukan nin trabahong halangkaw an suweldo. Bago iyan akuon, naghagad nguna siya nin sadol sa sarong elder. Sinambit kan brother na an trabahong iyan mangangaipong maparayo siya sa saiyang pamilya nin medyo huruhalawig na panahon. Ipinagirumdom sa saiya kan elder an prinsipyo sa Bibliya na an panginot niyang paninimbagan iyo na itao an espirituwal na mga pangangaipo kan saiyang pamilya. (Efe. 6:4; 1 Tim. 5:8) Ipamugtak na dai uyon an brother sa sinabi sa saiya kan elder kaya naghapot siya sa iba pang mga brother manungod sa bagay na iyan sagkod na may saro na nagsabi sa saiya kan gusto niyang madangog. Naghahanap daw talaga nin sadol an brother, o may desisyon na siya bago pa kaiyan asin naghahanap na lang siya nin saro na mauyon sa saiya? Dapat tang tandaan na an satong puso mapandaya. (Jer. 17:9) Kun minsan, an sadol na pinakakaipuhan ta iyo man an pinakahabo tang madangog.

DAPAT KO DAW NA HAGADON SA IBA NA SINDA AN MAGDESISYON PARA SA SAKO?

15. Ano an dapat niyatong likayan, asin taano?

¹⁵ An lambang saro sa sato igwa kan paninimbagan na gumibo nin sadiri niyatong mga desisyon. (Gal. 6:4, 5) Arog kan napag-ulayan ta, an sarong madunong na tawo mahagad nin sadol hali sa Tataramon nin Diyos asin sa maygurang na mga Kristiyano bago gumibo nin desisyon. Alagad, dapat niyatong likayan na hagadon sa iba na sinda an magdesisyon para sa sato. An nagkapira tibaad direktang ginigibo iyan paagi sa paghapot sa sarong pinagtitiwalaan ninda, “Kun ika an nasa sitwasyon ko, ano an gigibuhon mo?” An iba man tibaad ginigibo iyan nin daing gayo risa paagi sa pag-arog na lang sa ginigibo kan iba asin dai na mismo ninda pinag-iisipan na marhay an manungod diyan.

16. Nagkaigwa nin anong sitwasyon sa Corinto may koneksiyon sa karneng idinulot sa mga idolo, asin siisay an may paninimbagan na magdesisyon kun baga an saro makakan o dai kan siring na karne? (1 Corinto 8:7; 10:25, 26)

¹⁶ Pag-isipan an sarong desisyon na kinaipuhan na gibuhon kan inot na siglong kongregasyon sa Corinto manungod sa karne na posibleng idinulot sa mga idolo. Nagsurat si Pablo para sa mga Kristiyanong idto: “Aram niyato na an sarong idolo mayo lamang nin kuwenta asin na mayo nang ibang Diyos apuwera sa saro.” (1 Cor. 8:4) Isinasaisip an katotoohan na iyan, nagdesisyon an nagkapira sa kongregasyon na puwede sindang magkakan nin karne na posibleng idinulot sa sarong idolo asin na kan huri ipinabakal sa karnehan. An iba nagdesisyon na dai kaya kan konsiyensiya ninda na magkakan kan siring na karne. (Basahon an 1 Corinto 8:7; 10:25, 26.) Personal na desisyon iyan. Nungkang nagsadol si Pablo sa mga taga Corinto na sinda an magdesisyon para sa iba o na arugon ninda an ginibo kan iba. “An lambang saro sa [sainda] maninimbag sa Diyos para sa saiyang sadiri.”—Roma 14:10-12.

17. Ano an puwedeng mangyari kun aarugon ta na lang an desisyon kan iba? Magtao nin halimbawa. (Hilingon man an mga ritrato.)

¹⁷ Paano puwedeng mangyari ngunyan an kaagid na sitwasyon? Pag-isipan an manungod sa mga fraction nin dugo. An lambang Kristiyano dapat na magdesisyon para sa sadiri niya kun baga aakuon niya o dai an mga fraction na ini.c Tibaad dipisil sa sato na lubos na masabutan an bagay na ini, pero an arog kaining mga pagdedesisyon parte kan pasan na dapat na pasanon kan lambang saro sa sato. (Roma 14:4) Kun aarugon ta na lang an desisyon kan iba, mapapaluya ta an satong konsiyensiya. Masasanay asin mapapakusog ta an satong konsiyensiya paagi sana sa paggamit kaiyan. (Heb. 5:14) Kaya nuarin kita dapat maghagad nin sadol sa sarong maygurang na Kristiyano? Pag nakapag-research na kita pero nangangaipo pa man giraray nin tabang na masabutan kun paano konektado sa satong sitwasyon an mga prinsipyo sa Bibliya.

PADAGOS NA MAGHAGAD NIN SADOL

18. Ano an mga ginibo ni Jehova para sa sato?

¹⁸ Nagpahiling sa sato si Jehova nin dakulang pagtitiwala paagi sa pagtugot sa sato na gumibo nin sadiri niyatong mga desisyon. Itinao niya sa sato an saiyang Tataramon, an Bibliya. Asin tinatawan niya kita nin madunong na mga amigo, na makakatabang sa sato kun paano iaaplikar an mga prinsipyo sa Bibliya. Inuutob niya an responsabilidad niya sa sato bilang satong Ama. (Tal. 3:21-23) Paano ta maipapahiling an satong pasasalamat sa saiya?

19. Paano ta padagos na mapapaugma si Jehova?

¹⁹ Pag-isipan ini: Nauugma an mga magurang na mahiling an saindang mga aki na nagdadakula bilang mapagmalasakit, madunong, asin matinabang na mga lingkod ni Jehova. Sa kaagid na paagi, nauugma si Jehova pag nahihiling niya kitang padagos na nagigin maygurang sa espirituwal, naghahagad nin sadol, asin naggigibo nin mga desisyon na nagtataong onra sa saiya.