Kun Paano Magtao nin Sadol

1. Siisay an kaipuhan na magtao nin sadol, asin taano?

ANO an namamatian mo pag matao ka nin sadol? An iba maugma. An iba man nagduduwa-duwa na magtao nin konseho, o sadol, asin nakakamati nin pag-alangan pag nagtatao kaiyan. Arin man diyan, gabos kita obligado na magtao nin sadol paminsan-minsan. Taano? Huling sinabi ni Jesus na an saiyang tunay na mga parasunod mamimidbid paagi sa pagkamuot na ipinapahiling ninda sa lambang saro. (Juan 13:35) Asin an sarong paagi na ipinapahiling ta an satong pagkamuot iyo an pagtao nin sadol sa satong mga tugang pag kinakaipuhan. Sinasabi kan Tataramon nin Diyos na an “hamis kan pakikiamigo” bunga nin, o nagtatalubo huli sa, “sinserong konseho.”—Tal. 27:9.

2. Ano an kaipuhan na magibo kan mga elder, asin taano? (Hilingon man an kahon na “Pagtao nin Konseho sa Pagtiripon sa Tahaw kan Semana.”)

² An mga elder lalo nang kaipuhan na magin epektibo sa pagtao nin sadol. Inasignaran ni Jehova, paagi ki Jesus, an mga lalaking ini na pasturan an kongregasyon. (1 Ped. 5:2, 3) An saro sa mga paagi na ginigibo ninda iyan iyo an pagtao nin basado sa Bibliyang sadol sa saindang mga pahayag sa kongregasyon. Dapat man sindang magtao nin sadol sa lambang karnero, kaiba na an mga naparayo sa aripumpon. Paano an mga elder, kaiba na kita gabos, makakatao nin marahay na sadol?

3. (a) Ano an puwede tang gibuhon tanganing magin marahay kitang parakonseho? (Isaias 9:6; hilingon man an kahon na “Arugon si Jesus Pag Nagtatao nin Sadol.”) (b) Ano an pag-uulayan ta sa artikulong ini?

³ Manungod sa pagigin marahay na parakonseho, dakul kitang manunudan paagi sa pag-adal sa halimbawang ipinahiling kan mga karakter sa Bibliya, lalo na ni Jesus. An saro sa mga titulong itinao sa saiya iyo an “Makangangalas na Parakonseho.” (Basahon an Isaias 9:6.) Sa artikulong ini, pag-uulayan ta kun ano an puwede tang gibuhon pag may naghahagad sa sato nin sadol asin pag kaipuhan tang magtao nin sadol sa saro na dai man naghahagad kaiyan. Pag-uulayan ta man an kahalagahan kan pagtao nin sadol sa tamang panahon asin sa tamang paagi.

PAG MAY NAGHAHAGAD SA SATO NIN SADOL

4-5. Pag may naghahagad sa sato nin sadol, ano an dapat na ihapot niyato sa satong sadiri? Magtao nin halimbawa.

⁴ Pag may naghahagad sa sato nin sadol, ano an namamatian ta asin ano an dapat tang inot na gibuhon? Tibaad ikaugma niyato iyan asin gusto ta tulos na magtao nin tabang. Pero dapat ta ngunang haputon an satong sadiri, ‘Angay daw akong magtao nin sadol sa bagay na ini?’ Kun minsan, an pinakamarahay na paagi na matatabangan ta an indibidwal iyo na dai kita magtao nin sadol kundi itukdo ta siya sa saro na angay na magtao nin sadol sa bagay na iyan.

⁵ Pag-isipan an halimbawang ini. Ipamugtak na nagkaigwa nin malalang hilang an dayupot mong amigo. Sinabi niya sa saimo na pigre-research niya na an mga pamamaagi nin pagbulong na puwede sa saiya, dangan hinahagadan ka niya nin opinyon kun arin diyan an sa hiling mong pinakamarahay. Tibaad may naiisip kang para sa saimo iyo an pinakamarahay, pero bako ka man doktor kaya bako kang kuwalipikado saka dai ka man nag-agi sa pagsasanay manungod sa pagbulong sa hilang na iyan. Sa arog kaiyan na sitwasyon, an pinakamarahay na magigibo mo para sa saimong amigo iyo na tabangan siyang makahanap nin saro na kuwalipikadong magtabang sa saiya.

6. Taano ta tibaad marahay na maghalat nguna kita bago magtao nin sadol?

⁶ Dawa kun namamatian tang kuwalipikado o angay kitang magtao nin sadol sa sarong partikular na bagay, tibaad marahay na maghalat nguna kita nin halipot na panahon bago magsimbag sa saro na naghahagad sa sato nin sadol. Taano? Huling sinasabi kan Talinhaga 15:28 na an “matanos naghuhurop-hurop bago magsimbag.” Paano kun sa hiling niyato aram ta an simbag? Tibaad marahay na magtao pa man giraray kita nin panahon na mag-research, mamibi, asin maghurop-hurop. Dangan mas magkakaigwa kita nin kumpiyansa na an satong simbag kauyon kan sabuot ni Jehova sa bagay na iyan. Mangnuhon an halimbawa ni propeta Natan.

7. Ano an manunudan mo sa halimbawa ni propeta Natan?

⁷ Kan kaulay ni Hading David si propeta Natan, sinabi niya na gusto niyang magtugdok nin templo para ki Jehova. Nagsabi tulos si Natan ki David na gibuhon iyan. Pero dapat kutana nagtao nguna siya nin panahon na magkonsulta ki Jehova. Taano? Huling bako si David an gusto ni Jehova na magtugdok kan templo. (1 Cron. 17:1-4) Arog kan ipinapahiling kan pangyayaring ini, pag may naghahagad sa sato nin sadol, madunong na ‘dai tulos kita magtaram.’—Sant. 1:19.

8. Ano an saro pang dahilan kun taano ta dapat kitang magin maingat pag nagtatao nin sadol?

⁸ Pag-isipan an saro pang dahilan kun taano ta dapat kitang magin maingat pag nagtatao nin sadol: Puwede kitang makadamay na manimbag kun an itinao tang sadol magin dahilan na makagibo an saro nin desisyon na minaresulta sa negatibong mga konsekwensiya. Iyo, may marahay kitang dahilan na mag-isip ngunang marhay bago magtao nin sadol.

PAGTAO NIN SADOL O KONSEHO SA DAI MAN NAGHAHAGAD KAIYAN

9. Bago magtao nin konseho, ano an kaipuhan na siguraduhon kan mga elder? (Galacia 6:1)

⁹ Sa pana-panahon, dapat na mag-inisyatiba an mga elder na tawan nin konseho an sarong brother o sister na ‘napasala nin lakad.’ (Basahon an Galacia 6:1.) Sinasabi sa study note sa bersikulong ini na an arog kaiyan na tawo “pasiring sa salang direksiyon, pero posibleng dai pa man siya nakakagibo nin magabat na kasalan.” An pasuhan kan mga elder iyo na tabangan siyang magdanay sa dalan pasiring sa buhay na daing katapusan. (Sant. 5:19, 20) Alagad para magin epektibo an saindang konseho, kaipuhan nguna nindang siguraduhon na talagang napasala siya nin lakad. Gabos kita tinutugutan ni Jehova na gumibo nin mga desisyon base sa satong konsiyensiya. (Roma 14:1-4) Pero paano kun an sarong tugang talagang napasala nin lakad asin nagdesisyon an mga elder na dapat ninda siyang tawan nin konseho?

10-12. Pag nagtatao nin konseho sa saro na dai man naghahagad kaiyan, ano an dapat na gibuhon kan mga elder? Iilustrar. (Hilingon man an mga ritrato.)

¹⁰ Bakong pasil para sa mga elder na magtao nin konseho sa saro na dai man naghahagad kaiyan. Taano? Sinabi ni apostol Pablo na an sarong tawo tibaad napasala na palan nin lakad nin dai niya narerealisar. Kaya an mga elder dapat na, inot sa gabos, andamon nguna siya sa itatao nindang konseho sa saiya.

¹¹ An pagtao nin konseho sa saro na dai man naghahagad kaiyan puwedeng iagid sa pagpatubo nin tinanom sa matagas na daga. Bago magtanom, gugudakon nguna kan parauma an daga para mapalumoy iyan asin maiandam. Dangan itatanom na niya an banhi. Panghuri, babaribian niya an banhi para tumalubo iyan. Sa kaagid na paagi, bago magtao nin siring na konseho an sarong elder, marahay na andamon niya nguna an daga, sabi ngani. Halimbawa, mahalat an elder nin kumbenyenteng panahon para kaulayon an tugang tanganing asiguraron na an pinakaikakarahay kaini an iniisip niya. Kun an nagtatao nin konseho bistadong mamumuton asin mabuot, magigin mas pasil sa tinatawan nin konseho na akuon iyan.

¹² Sa saindang pag-uulay, puwedeng padagos na palumuyon kan elder an daga paagi sa pagsambit na gabos man nakakagibo nin sala asin nangangaipo nin konseho sa pana-panahon. (Roma 3:23) Sa kalmadong boses na may hararom na paggalang, malinaw na ipapahiling kan elder hali sa Kasuratan kun paano napasala nin lakad an tugang. Pag inako na kan tugang na nakagibo siya nin sala, “itatanom na kan elder an banhi” paagi sa pagpaliwanag sa saiya sa simpleng mga tataramon kun ano an kaipuhan niyang gibuhon para itanos an sitwasyon. Panghuri, “babaribian” kan elder an banhi paagi sa sinserong pagkomendar sa tugang asin pagpamibi kaiba siya.—Sant. 5:15.

13. Paano masisigurado kan mga elder na nasasabutan kan indibidwal an konsehong itinatao sa saiya?

¹³ Kun minsan, magkalain an sinasabi kan nagtatao nin konseho asin an pakasabot diyan kan tinatawan kaiyan. Ano an puwedeng gibuhon kan mga elder tanganing malikayan na mangyari iyan? Sa magalang na paagi, puwede sindang maggamit nin mataktikang mga hapot. (Ecl. 12:11) An simbag diyan kan indibidwal makakatabang sa nagtatao nin konseho na masiguradong nasasabutan niya an konsehong itinatao sa saiya.

PAGTAO NIN SADOL SA TAMANG PANAHON ASIN SA TAMANG PAAGI

14. Dapat daw kitang magtao nin sadol pag anggot kita? Ipaliwanag.

¹⁴ Gabos kita bakong perpekto, kaya makakagibo o makakasabi kita nin mga bagay na makakapaanggot sa iba. (Col. 3:13) Sinasambit man sa Tataramon nin Diyos na kun minsan tibaad makasabi o makagibo an iba nin sarong bagay na nakakapaanggot sa sato. (Efe. 4:26) Pero dapat na dai kita magtao nin sadol pag anggot kita. Taano? Huling “an kaanggutan nin sarong tawo dai minaresulta sa pagigin matanos sa paghiling nin Diyos.” (Sant. 1:20) Kun matao kita nin sadol pag anggot kita, posibleng marhay na mas mapagrabe ta an sitwasyon imbes na maparahay iyan. Dai buot sabihon kaini na dai ta na dapat ipahayag an satong mga iniisip asin namamatian sa saro na nakapaanggot sa sato. Pero magigin mas epektibo kita sa pakikipag-ulay sa saiya kun mahalat kita sagkod na kalmado na kita. Mangnuhon an marahay na halimbawa ni Elihu, an maimbod na parakonseho ni Job.

15. Ano an manunudan ta sa halimbawa ni Elihu? (Hilingon man an ritrato.)

¹⁵ Sa laog nin pirang aldaw, nagdangog si Elihu ki Job sa pagdepensa niya sa saiyang sadiri laban sa mga akusasyon kan saiyang bakong tunay na mga pararanga. Nakamati nin pagkahirak si Elihu ki Job. Pero naanggot man na marhay si Elihu huling nagtaram si Job nin bakong totoong mga bagay manungod ki Jehova saka nagparapokus siya sa saiyang sadiri. Dawa arog kaiyan, hinalat ni Elihu an pagkakataon niya na magtaram para tawan nin konseho si Job, asin ginibo niya iyan sa paaging mabuot asin may hararom na paggalang. (Job 32:2; 33:1-7) An halimbawa ni Elihu nagtutukdo sa sato nin sarong mahalagang katotoohan: An sadol pinakamarahay pag itinatao sa tamang panahon asin sa tamang paagi—nin may paggalang asin pagkamuot.—Ecl. 3:1, 7.

PADAGOS NA MAGTAO ASIN MAG-AKO NIN SADOL

16. Ano an manunudan mo sa Salmo 32:8?

¹⁶ Sinasabi kan temang teksto para sa artikulong ini na ‘tinatawan kita ni Jehova nin sadol mantang nakahiling siya sa sato.’ (Basahon an Salmo 32:8.) Ipinaparisa kaini na padagos niya kitang tinatawan nin tabang. Dai niya lang kita tinatawan nin sadol kundi tinatabangan niya man kita na iaplikar iyan. Marahay na halimbawa nanggad iyan sa sato! Pag magkaigwa kita kan pribilehiyong magtao nin sadol sa iba, lugod na arugon ta si Jehova paagi sa padagos na paghiling sa sainda, an buot sabihon, padagos na pagpahiling nin personal na interes asin pagtao nin ano man na suportang maitatao niyato tanganing tabangan sindang magin mapanggana.

17. Siring sa ano an mga elder na nagtatao nin espesipiko asin basado sa Bibliyang mga sadol? Ipaliwanag. (Isaias 32:1, 2)

¹⁷ Urog kisa kasuarin man, kaipuhan tang magtao asin mag-ako ngunyan nin marahay na sadol. (2 Tim. 3:1) An mga elder na nagtatao nin espesipiko asin basado sa Bibliyang mga sadol “siring sa mga sapa nin tubig sa dagang mayong tubig.” (Basahon an Isaias 32:1, 2.) An mga amigong dawa ngani aram kun ano an gusto tang madangog pero sinasabi pa man giraray sato kun ano an kaipuhan tang madangog garo man sana nagtatao sa sato nin regalong kasinghalaga nin “mga mansanas na bulawan na nasa mga inukit na plata.” (Tal. 25:11) Lugod na gabos kita padagos na maghinguwang magkaigwa kan kadunungan na kaipuhan niyato tanganing makatao asin mag-ako nin marahay na sadol.