Akuon an Pagkamuot ni Jehova

1. Taano ta idinusay mo ki Jehova an saimong sadiri? (Hilingon man an ritrato.)

NAGIGIRUMDUMAN mo pa daw kan idusay mo an saimong sadiri ki Jehova? Ginibo mo an desisyon na iyan huling namidbid asin namutan mo siya. Nagpromesa ka sa saiya na iinuton mo sa saimong buhay an saiyang kabutan asin na padagos mo siyang mamumutan sa bilog mong puso, kalag, isip, asin kusog. (Mar. 12:30) Puon kaidto, nagkusog asin padagos na nagkukusog an saimong pagkamuot sa saiya. Kaya ano an isisimbag mo pag may maghapot sa saimo, “Sigurado ka daw na namumutan mo si Jehova?” Daing pagduwa-duwang masimbag ka, “Namumutan ko siya nin urog kisa sa siisay man o sa ano pa man!”

2-3. Gusto ni Jehova na magin kumbinsido kita sa ano, asin ano an pag-uulayan niyato sa artikulong ini? (Jeremias 31:3)

² Pero paano kun may maghapot sa saimo, “Sigurado ka daw na namumutan ka ni Jehova?” Maduwa-duwa ka daw na magsimbag, na tibaad iniisip na bako kang maninigo sa pagkamuot ni Jehova? Sarong sister na nagdakula sa bakong mamumuton na pamilya an nagsabi: “Aram kong namumutan ko si Jehova. Sigurado ako diyan. An sa parating pinagdududahan ko iyo kun baga namumutan ako ni Jehova.” Ano man nanggad talaga an namamatian ni Jehova para sa saimo?

³ Gusto ni Jehova na magin kumbinsido kang namumutan ka niya. (Basahon an Jeremias 31:3.) An totoo iyo na irinani ka ni Jehova sa saiya. Asin kan idusay mo an saimong sadiri sa saiya dangan nagpabawtismo, nag-ako ka nin sarong bagay na tunay nanggad na mahalaga—an saiyang maimbod na pagkamuot. An pagkamuot na ini hararom asin nagdadanay. Pinapahiro siya kaiyan na mansayon an saiyang maimbod na mga parasamba—kaiba na ika—bilang saiyang “pinapahalagahan na rugaring.” (Mal. 3:17, nota sa ibaba) Manungod sa pagkamuot Niya sa saimo, gusto ni Jehova na mamatian mo an arog kan namatian ni apostol Pablo, na may kumpiyansang nagsurat: “Kumbinsido ako na maski pa an kagadanan o an buhay o an mga anghel o an mga gobyerno o an mga bagay na yaon ngunyan o an mga bagay na maabot o an mga kapangyarihan o an langkaw o an rarom o an ano pa man na ibang linalang dai makakayang isuway kita sa pagkamuot nin Diyos.” (Roma 8:38, 39) Sa artikulong ini, pag-uulayan niyato kun taano ta kaipuhan tang pakusugon an satong kumbiksiyon na namumutan kita ni Jehova asin an makakatabang sa sato na magibo iyan.

KUN TAANO TA KAIPUHAN NIYATONG AKUON AN PAGKAMUOT NI JEHOVA

4. Paano ta malalabanan an saro sa pinakatusong mga gibo ni Satanas?

⁴ Paagi sa pag-ako niyato kan pagkamuot ni Jehova, malalabanan ta an saro sa “mga tusong gibo” ni Satanas. (Efe. 6:11) Gigibuhon ni Satanas an gabos tanganing mapapundo kita sa paglilingkod ki Jehova. An saro sa pinakatusong mga gibo ni Satanas iyo an pagpaniwala sa sato sa kaputikan na dai kita namumutan ni Jehova. Nungkang paglingawan na oportunista si Satanas. Sa parati minaatake siya pag kita nangluluya, tibaad huli sa maraot tang mga nagin eksperyensiya, sa mga kadipisilan na inaagihan ta ngunyan, o sa mga bagay sa maabot na daing kasiguruhan. (Tal. 24:10) Si Satanas arog sa sarong leon na an inaatake iyo an daing kalaban-laban na biktima. Pinupurbaran niya kitang aprobetsaran sa panahon na maluya kita para papunduhon kita sa paglilingkod ki Jehova. Alagad kun padagos tang papakusugon an satong kumbiksiyon na namumutan kita ni Jehova, magigin mas andam kitang ‘manindugan laban’ ki Satanas asin sa saiyang tusong mga gibo asin pakana.—1 Ped. 5:8, 9; Sant. 4:7.

5. Taano ta kaipuhan niyatong mamatian na namumutan asin pinapahalagahan kita ni Jehova?

⁵ Paagi sa pag-ako niyato kan pagkamuot ni Jehova, urog kitang magigin harani sa saiya. Pag-isipan kun taano ta nasabi niyato iyan. Linalang kita ni Jehova na igwa kan pangangaipong mamuot asin mamutan. An natural na reaksiyon ta sa pagkamuot iyo na magpahiling man nin pagkamuot. Kaya mantang urog tang namamatian na namumutan asin pinapahalagahan kita ni Jehova, urog ta man siyang mamumutan. (1 Juan 4:19) Asin mantang urog ta siyang namumutan, urog niya man kitang mamumutan. Malinaw na sinasabi sa sato kan Bibliya: “Rumani kamo sa Diyos, asin marani siya sa saindo.” (Sant. 4:8) Pero paano ta mapapakusog an satong kumbiksiyon na namumutan kita ni Jehova?

ANO AN MAKAKATABANG SA SATO NA AKUON AN PAGKAMUOT NI JEHOVA?

6. Tanganing maakong namumutan kita ni Jehova, ano an puwede tang ipamibi?

⁶ Magin espesipiko asin matiyaga sa pagpamibi. (Luc. 18:1; Roma 12:12) Hagadon ki Jehova—nin dakul na beses kada aldaw kun kaipuhan—na tabangan kang hilingon an sadiri mo arog kan paghiling niya sa saimo. Totoo na tibaad masakit kumbinsiron an mapagkondenar na puso. Alagad tandaan na si Jehova mas urog kisa sa saimong puso. (1 Juan 3:19, 20) Mas midbid ka niya kisa sa pakamidbid mo sa sadiri mo; nahihiling niya an tibaad dai mo nahihiling sa saimo. (1 Sam. 16:7; 2 Cron. 6:30) Kaya dai mag-alangan na “sabihon” sa saiya an gabos mong namamatian, na hinahagad sa saiya na tabangan kang akuon na namumutan ka niya. (Sal. 62:8) Dangan humiro kauyon kan mga pamibi mo paagi sa pag-aplikar kan minasunod na mga suhestiyon.

7-8. Paano kita inaasigurar kan Mga Salmo na namumutan kita ni Jehova?

⁷ Maniwala sa sinasabi ni Jehova. Pinasabngan niya an mga kagsurat kan Bibliya na iladawan siya kun ano talaga siya. Pag-isipan an magayon na pagkaladawan ni salmista David ki Jehova. “Harani si Jehova sa mga nalugadan an puso; iliniligtas niya an mga nangluluya an buot.” (Sal. 34:18, nota sa ibaba) Pag pinangluluyahan ka nin buot, tibaad mamatian mong nagsosolo ka. Alagad nanunuga si Jehova na sa arog kaiyan na mga panahon, harani siya sa saimo huling nahihiling niyang diyan mo siya mas lalo nang kaipuhan. Sa saro pang salmo, isinurat ni David: “Tipunon mo an sakong mga luha sa saimong lalagan na anit.” (Sal. 56:8) Nahihiling ni Jehova pag nasasakitan ka. Nagmamalasakit siyang marhay sa saimo asin sa inaagihan mo. Garo niya man sana tinitipon an saimong mga luha asin pinapahalagahan iyan, na garo baga mahalagang marhay na tubig iyan sa lalagan na anit nin sarong parabaklay. Mababasa niyato sa Salmo 139:3: “Kabisado mo [Jehova] an gabos na dalan ko.” Nahihiling ni Jehova an gabos mong dalan, alagad nakapokus siya sa marahay na mga ginigibo mo. (Heb. 6:10) Taano? Huling pinapahalagahan niyang marhay an lambang paghihinguwa mo na mapaugma siya.a

⁸ Paagi kan siring na nakakarangang mga teksto sa saiyang ipinasabong na Tataramon, garo man sana sinasabi ni Jehova: “Gusto kong maaraman mo kun gurano taka kanamumutan asin kun gurano ako nagmamalasakit sa saimo.” Pero arog kan naaraman ta kasubago, pinapaniwala ka ni Satanas kan kaputikan na dai ka namumutan ni Jehova. Kaya kun may mga pagkakataon na nagdududa ka kun baga namumutan ka ni Jehova, magpundo nguna asin haputon an sadiri, ‘Siisay an papaniwalaan ko—“an ama kan kaputikan” o “an Diyos nin katotoohan”?’—Juan 8:44; Sal. 31:5.

9. Anong asigurasyon an itinatao ni Jehova sa mga namumuot sa saiya? (Exodo 20:5, 6)

⁹ Hurop-hurupon an namamatian ni Jehova sa mga namumuot sa saiya. Pag-isipan an sinabi ni Jehova ki Moises asin sa mga Israelita. (Basahon an Exodo 20:5, 6.) Nanunuga si Jehova na padagos siyang mapahiling nin maimbod na pagkamuot sa mga namumuot sa saiya. Inaasigurar sa sato kan mga tataramon na iyan na nungkang mangyayari na dai papahilingan nin pagkamuot kan satong maimbod na Diyos an mga parasamba niyang namumuot sa saiya. (Neh. 1:5) Kaya kun may mga pagkakataon na kaipuhan mo nin asigurasyon na namumutan ka ni Jehova, magpundo nguna asin haputon an sadiri, ‘Namumutan ko daw si Jehova?’ Dangan isip-isipon ini: Kun namumutan mo siya saka ginigibo an saimong pinakamakakaya na mapaugma siya, makakasigurado kang namumutan ka niyang marhay. (Dan. 9:4; 1 Cor. 8:3) Sa ibang pagtaram, kun dai mo pinagdududahan an pagkamuot mo sa saiya, taano ta pagdududahan mo an pagkamuot niya sa saimo? An saiyang pagkamuot asin kaimbudan dai nanggad mapagdududahan.

10-11. Ano an gusto ni Jehova na magin pagmansay mo sa pantubos? (Galacia 2:20)

¹⁰ Hurop-hurupon an pantubos. An atang na pantubos ni Jesu-Cristo iyo an pinakanangungurog na regalo ni Jehova sa katawuhan. (Juan 3:16) Pero personal na regalo niya man daw iyan sa saimo? Iyo! Pag-isipan an eksperyensiya ni apostol Pablo. Girumdumon na nakagibo siya kaidto nin magabat na mga kasalan bago nagin Kristiyano asin kinaipuhan na padagos na makipaglaban sa saiyang mga kaluyahan. (Roma 7:24, 25; 1 Tim. 1:12-14) Alagad, minansay niya an pantubos bilang personal na regalo hali ki Jehova. (Basahon an Galacia 2:20.) Tandaan na pinasabngan ni Jehova si Pablo na isurat an mga tataramon na iyan. Asin an gabos na yaon sa Bibliya isinurat para sa pagtukdo sa sato. (Roma 15:4) Ipinapahiling kan mga tataramon ni Pablo kun ano an gusto ni Jehova na magin pagmansay mo sa pantubos—na iyan sarong personal na regalo Niya sa saimo. Pag minamansay mo na nin arog kaiyan an pantubos, napapakusog mo an saimong kumbiksiyon na namumutan ka ni Jehova bilang indibidwal.

¹¹ Nagpapasalamat kita ki Jehova huling isinugo niya si Jesus digdi sa daga tanganing magadan alang-alang sa sato. Pero an saro pang dahilan kun taano ta nagdigdi sa daga si Jesus iyo na sabihon sa iba an katotoohan manungod sa Diyos. (Juan 18:37) Kaiba sa katotoohan na iyan an namamatian ni Jehova para sa saiyang mga aki.

KUN PAANO KITA TINATABANGAN NI JESUS NA AKUON AN PAGKAMUOT NI JEHOVA

12. Taano ta makakapagtiwala kita sa pagkaladawan ni Jesus ki Jehova?

¹² Kan si Jesus yaon digdi sa daga, maugma niyang ipinahayag an personalidad ni Jehova. (Luc. 10:22) Lubos nanggad kitang makakapagtiwala sa pagkaladawan ni Jesus ki Jehova. Siyempre huling bago magdigdi sa daga, nakaibanan niya na sa langit si Jehova nin halawigon nanggad na panahon. (Col. 1:15) Naeksperyensiyahan asin naobserbaran mismo ni Jesus kun gurano kanamumutan ni Jehova an Saiyang maimbod na mga aki. Paano tinatabangan ni Jesus an iba na akuon an pagkamuot nin Diyos?

13. Ano an gusto ni Jesus na magin pagmansay ta ki Jehova?

¹³ Gusto ni Jesus na mansayon ta si Jehova arog kan pagmansay niya sa Saiya. Sa Mga Ebanghelyo, inapod ni Jesus si Jehova bilang “Ama” nin labing 160 beses. Asin kan nakikipag-ulay siya sa saiyang mga parasunod, ginamit niya an mga tataramon na “saindong Ama” o “saindong Ama sa langit.” (Mat. 5:16; 6:26) Sinasabi sa study note sa Mateo 5:16: “An mas nainot na mga lingkod nin Diyos naggamit nin dakul na halangkaw na mga titulo bilang paglaladawan asin apod ki Jehova, kaiba diyan an ‘Makakamhan sa Gabos,’ ‘Kahuruhalangkawi,’ asin ‘Pinakanangungurog na Kaglalang,’ alagad an parating paggamit ni Jesus kan simple asin komun na terminong ‘Ama’ nagduduon kan haraning relasyon nin Diyos sa mga parasamba niya.” Malinaw na gusto ni Jesus na mansayon ta si Jehova arog kan pagmansay niya sa Saiya—bilang an satong mamumuton na Ama, na padabang marhay an mga aki Niya. Pag-ulayan ta an duwang halimbawa na ginamit ni Jesus an terminong “Ama.”

14. Paano ipinahiling ni Jesus na an kada saro sa sato mahalaga sa paghiling kan satong Ama sa langit? (Mateo 10:29-31) (Hilingon man an ritrato.)

¹⁴ Inot, pag-ulayan ta an mga tataramon ni Jesus na nasa Mateo 10:29-31. (Basahon.) An mga dignos saradit na gamgam na nungkang mamumuot o masamba ki Jehova. Alagad, mahalaga sa satong Ama dawa an saro sanang dignos huling aram niya ngani pag nahulog iyan sa daga. Kaya lalo nang mas pinapahalagahan asin pinagmamalasakitan niya an lambang maimbod na parasamba na naglilingkod sa saiya huli sa pagkamuot! Manungod sa mga tataramon na “maski an mga buhok sa saindong payo bilang gabos,” ini an sabi sa study note sa bersikulo 30: “An pagtaong atensiyon ni Jehova sa siring kasadit na mga detalye garantiya na interesado siyang marhay sa lambang parasunod ni Cristo.” Siguradong gusto ni Jesus na akuon niyato na an kada saro sa sato mahalagang marhay sa paghiling kan satong Ama sa langit.

15. Ano an manunudan mo manungod sa saimong Ama sa langit sa mga tataramon ni Jesus na nasa Juan 6:44?

¹⁵ Mangnuhon an saro pang halimbawa na diyan ginamit ni Jesus an terminong “Ama.” (Basahon an Juan 6:44.) An saimong Ama sa langit personal, o mamumuton, kang irinani sa katotoohan. Taano ta irinani ka niya? Huling nahiling niya na nasa tamang kamugtakan an saimong puso. (Gibo 13:48) Sinasabi sa study note sa Juan 6:44 na posibleng an nasa isip ni Jesus iyo an mga tataramon ni Jeremias na mahihiling sa satong temang teksto: “Huli kan maimbod na pagkamuot na ini kaya irinani taka sa sako [o, kaya padagos akong nagpahiling nin maimbod na pagkamuot sa saimo].” (Jer. 31:3; nota sa ibaba; ikumparar an Oseas 11:4.) Pag-isipan an buot sabihon kaiyan. An satong Ama sa langit padagos na hinihiling an marahay sa saimo na tibaad dai mo nahihiling sa sadiri mo.

16. (a) Ano an garo man sana sinasabi sa sato ni Jesus, asin taano ta dapat kitang maniwala sa saiya? (b) Paano mo mapapakusog an saimong kumbiksiyon na si Jehova an Ama na kaipuhan mo? (Hilingon an kahon na “An Ama na Kaipuhan Niyato Gabos.”)

¹⁶ Paagi sa pagladawan ki Jehova bilang satong Ama, garo man sana sinasabi sa sato ni Jesus: “Ama ko si Jehova, pero Ama mo man siya. Asin inaasigurar ko sa saimo na namumutan ka niya saka nagmamalasakit siyang marhay sa saimo bilang indibidwal.” Kaya kun may mga pagkakataon na nagdududa ka kun baga namumutan ka ni Jehova, magpundo nguna asin haputon an sadiri, ‘Bakong dapat kong pagtiwalaan an mga tataramon kan Aki na pinakanakakamidbid sa satong Ama asin pirming nagtataram kan katotoohan?’—1 Ped. 2:22.

PADAGOS NA PAKUSUGON AN SAIMONG KUMBIKSIYON

17. Taano ta kaipuhan tang padagos na pakusugon an satong kumbiksiyon na namumutan kita ni Jehova?

¹⁷ Kaipuhan tang padagos na pakusugon an satong kumbiksiyon na namumutan kita ni Jehova. Arog kan naaraman ta kasubago, dai nanggad mapundo an satong tusong kaiwal na si Satanas sa pagpurbar na papunduhon kita sa paglilingkod ki Jehova. Tanganing paluyahon an satong determinasyon, padagos na pupurbaran ni Satanas na papaniwalaon kitang dai kita namumutan nin Diyos. Dai ta nanggad pagtugutan na magin mapanggana si Satanas!—Job 27:5.

18. Paano mo mapapakusog an pagtitiwala mo na namumutan ka ni Jehova?

¹⁸ Tanganing mapakusog an saimong pagtitiwala na namumutan ka ni Jehova, padagos na mamibi na tabangan ka niyang hilingon an sadiri mo arog kan paghiling niya sa saimo. Isip-isipon kun paano ilinadawan kan ipinasabong na mga kagsurat kan Bibliya an saiyang pagkamuot sa sato. Hurop-hurupon kun paano si Jehova nagpapahiling nin pagkamuot sa mga namumuot sa saiya; nungkang mangyayari na dai niya sinda papahilingan nin pagkamuot. Hurop-hurupon man kun taano ta puwede mong ibilang na personal na regalo sa saimo an pantubos. Asin magtiwala sa asigurasyon ni Jesus na si Jehova an saimong Ama sa langit. Dangan kun may maghapot saimo: “Sigurado ka daw na namumutan ka ni Jehova?” may kumpiyansa kang masimbag: “Iyo! Asin ginigibo ko an pinakamakakaya ko kada aldaw tanganing ipahiling na namumutan ko siya!”