An Pagkamuot nin Diyos Nagdadanay

1-2. Anong kadipisilan an napapaatubang sa dakul na Kristiyano?

IMAHINARA an sarong bangka na nasa kasagsagan nin makusugon na bagyo. Pigsusurusalya iyan nin makusugon na mga alon. Mapapaduman an bangka kun sain iyan darahon kan mga alon, apuwera na sana kun may saro na magbaba nin angkla. Paagi sa angkla, dai madudurudara kan mga alon an bangka asin dai iyan maiaanod parayo kan makusugon na bagyo.

² Pag may tinatagalan kang arog-bagyong pagbalo, tibaad mamatian mong arog ka kan bangkang iyan. Puwedeng magin paburubago-bago an emosyon mo. Ngunyan na aldaw sigurado kang namumutan saka tinatabangan ka ni Jehova, dangan sa sunod na aldaw nagdududa ka na kun baga nahihiling man lamang ni Jehova an inaagihan mo. (Sal. 10:1; 13:1) Tibaad rangahon ka nin sarong amigo asin temporaryong maggian an pagmati mo. (Tal. 17:17; 25:11) Pero minabalik man sana an mga pagduda mo. Tibaad isipon mo pa ngani kun baga tinalikdan ka na ni Jehova. Paano mo ibababa an angkla, sabi ngani, mantang inaatubang mo an sarong pagbalo? Sa ibang pagtaram, paano ka makakasigurado—asin magdadanay na sigurado—na namumutan asin tinatabangan ka ni Jehova?

3. Ano an kahulugan kan “maimbod na pagkamuot,” arog kan sinambit sa Salmo 31:7 asin 136:1, asin taano ta masasabi niyatong si Jehova an pinakanangungurog na halimbawa kaiyan? (Hilingon man an ritrato.)

³ An sarong paagi tanganing magin nakaangkla ka sa panahon nin pagbalo iyo an paggirumdom sa maimbod na pagkamuot ni Jehova. (Basahon an Salmo 31:7; 136:1.) An terminong “maimbod na pagkamuot” nagtatao kan ideya na an saro igwa nin hararom asin nagdadanay na kadayuputan sa pinapahilingan niya kaiyan. Si Jehova an pinakanangungurog na halimbawa nin maimbod na pagkamuot. Sa katunayan, ilinaladawan siya kan Bibliya bilang “abunda sa maimbod na pagkamuot.” (Exo. 34:6, 7) Sinasabi pa kan Bibliya manungod ki Jehova: “Abunda ka sa maimbod na pagkamuot para sa gabos na nag-aapod sa saimo.” (Sal. 86:5) Isip-isipa an kahulugan kaiyan: Nungka nanggad na binabayaan ni Jehova an saiyang maimbod na mga lingkod! An paggirumdom na maimbod si Jehova makakatabang na magin nakaangkla ka mantang inaatubang mo an sarong arog-bagyong pagbalo.—Sal. 23:4.

MANSAYON AN PAGKAMUOT NI JEHOVA BILANG SARONG PANGINOT NA KATUKDUAN SA BIBLIYA

4. Magtao nin mga halimbawa nin panginot na mga katukduan sa Bibliya, asin ipaliwanag kun taano ta dai kita basta-basta madadara nin siisay man na pumundo sa pagtubod diyan.

⁴ An saro pang paagi tanganing magin nakaangkla ka sa panahon nin pagbalo iyo na mansayon mo an pagkamuot ni Jehova bilang sarong panginot na katukduan sa Bibliya. Para sa saimo, ano an kahulugan kan fraseng “panginot na katukduan sa Bibliya”? Tibaad an naiisip mo iyo an mga katukduan na nanudan mo sa Tataramon nin Diyos. Halimbawa, nanudan mo na Jehova an pangaran nin Diyos, na si Jesus an bugtong na Aki nin Diyos, na an mga gadan dai na nin pag-aram, asin na magigin paraiso an daga kun sain maistar an mga tawo sagkod lamang. (Sal. 83:18; Ecl. 9:5; Juan 3:16; Kap. 21:3, 4) Kan akuon mo na an mga katukduan na iyan, dai ka na basta-basta madadara nin siisay man na pumundo sa pagtubod diyan. Taano? Huling nasabutan mo nang nakabasar iyan sa mga katotoohan. Aramon ta kun paano an pagsaisip na an pagkamuot ni Jehova sarong panginot na katukduan sa Bibliya makakatabang sa saimo na mahali an kaisipan na mayong pakiaram si Jehova sa inaagihan mo o na dai niya iyan naririsa.

5. Ipaliwanag kun paano niyato pinapabagsak an palsong mga katukduan.

⁵ Kan magpuon ka nang mag-adal nin Bibliya, ano an nakatabang sa saimo na talikdan an palsong mga katukduan? Posibleng marhay na nakatabang sa saimo an pagkumparar sa mga itinukdo sa saimo kan dati mong relihiyon asin sa kun ano an mga itinutukdo kan Kasuratan. Pag-isipan an sarong halimbawa: Ipamugtak na an paniniwala mo kaidto iyo na si Jesus an Diyos na Makakamhan sa Gabos. Pero mantang pinag-aadalan mo an Bibliya, hinapot mo an sadiri mo, ‘Totoo daw talaga an katukduan na iyan?’ Pagkatapos mong siyasaton an mga ebidensiya sa Kasuratan, napatunayan mong an simbag diyan bako. Dangan rinibayan mo an palsong katukduan na iyan kan katotoohan na ini sa Kasuratan: Si Jesus an “panganay sa gabos na linalang” asin an “bugtong na Aki nin Diyos.” (Col. 1:15; Juan 3:18) Siyempre, an palsong mga katukduan puwedeng “matibay an pagkaestablisar” kaya dipisil iyan pabagsakon. (2 Cor. 10:4, 5) Alagad kan magibo mo na iyan, dai mo na binalikan an mga doktrinang tinalikdan mo na.—Fil. 3:13.

6. Taano ta makakapagtiwala kang “nagdadanay sagkod lamang an maimbod na pagkamuot” ni Jehova?

⁶ Arog man kaiyan an puwede mong gibuhon kun dapit sa itinutukdo kan Bibliya manungod sa pagkamuot ni Jehova. Kun napapaatubang ka sa pagbalo asin nagpupuon ka nang magduda sa pagkamuot ni Jehova, haputon an sadiri, ‘Tama daw an kaisipan ko?’ Ikumparar sa mga tataramon na nasa Salmo 136:1—an temang teksto kan artikulong ini—an namamatian mong mga pagduda manungod sa pagkamuot ni Jehova. Taano ta ilinaladawan ni Jehova an saiyang pagkamuot bilang “maimbod”? Taano ta inutro nin 26 na beses sa salmong iyan an fraseng “nagdadanay sagkod lamang an maimbod na pagkamuot niya”? Arog kan napag-ulayan ta, an maimbod na pagkamuot ni Jehova para sa saiyang mga lingkod sarong pundamental na katukduan sa Bibliya, arog nanggad kan iba pang mga doktrina na inako mo tulos hali sa Tataramon nin Diyos. An kaisipan na para ki Jehova dai kang halaga o dai angay mamutan sarong kaputikan. Isikwal an kaisipan na iyan, arog kan gigibuhon mo sa ano man na iba pang palsong katukduan!

7. Magtao nin nagkapirang teksto na nag-aasigurar sa sato na namumutan kita ni Jehova.

⁷ Sa Bibliya, igwa nin dakul pang asigurasyon na namumutan kita ni Jehova. Halimbawa, sinabi ni Jesus sa saiyang mga parasunod: “Mas mahalaga kamo kisa sa dakul na dignos.” (Mat. 10:31) Sinabi mismo ni Jehova sa saiyang banwaan: “Papakusugon taka, iyo, tatabangan taka, talagang kakaputan taka kan sakong tuong kamot nin katanusan.” (Isa. 41:10) Mangnuhon kun gurano kaklarado asin kasigurado kan mga tataramon sa duwang tekstong iyan. An pagkasabi ni Jesus bakong ‘Posibleng mas mahalaga kamo,’ saka an pagkasabi ni Jehova bakong ‘Puwede takang tabangan.’ Imbes, an sinabi ninda: “Mas mahalaga kamo” asin “Tatabangan taka.” Kun mangyari man na magduda ka sa pagkamuot ni Jehova mantang napapaatubang sa pagbalo, an siring na mga teksto dai lang makakatabang na maggian an pagmati mo, kundi makakatabang man iyan na maaraman mo, o na makumbinsir ka, na namumutan ka ni Jehova. Nakabasar iyan sa mga katotoohan. An may pagpamibing paghurop-hurop diyan makakapahiro sa saimo na masabi man an mga tataramon na nasa 1 Juan 4:16: “Naaraman niyato na namumutan kita nin Diyos asin kumbinsido kita kaiyan.”a

8. Ano an puwede mong gibuhon kun may mga pagkakataon na nagdududa ka kun baga namumutan ka ni Jehova?

⁸ Pero, paano kun may mga pagkakataon na nagdududa ka pa man giraray sa pagkamuot ni Jehova? Ikumparar kun ano an namamatian mo sa kun ano an naaaraman mo. An mga namamatian puwedeng magbago pero an mga katotoohan dai, kaya mas makakapagtiwala kita sa mga katotoohan. Asin an pagkamuot ni Jehova, arog kan itinutukdo kan Kasuratan, sarong katotoohan. Kaya kun dai ka maniniwala diyan, binabaliwala mo an pinakamahalagang aspekto kan personalidad ni Jehova—an saiyang pagkamuot.—1 Juan 4:8.

HUROP-HURUPON AN ‘PAGKAMUOT NI JEHOVA SA SAIMO’

9-10. Ano an konteksto kan mga tataramon ni Jesus na “An Ama mismo namumutan kamo,” na mababasa sa Juan 16:26, 27? (Hilingon man an ritrato.)

⁹ May manunudan pa kita manungod sa pagkamuot ni Jehova paagi sa pag-isip-isip sa sinabi ni Jesus sa saiyang mga parasunod: “An Ama mismo namumutan kamo.” (Basahon an Juan 16:26, 27.) Dai sinabi ni Jesus an mga tataramon na ini tangani sanang maggian an pagmati kan saiyang mga disipulo. Sa katunayan, ipinapahiling kan konteksto na bakong an namamatian ninda sa puntong iyan an pinapanungdan ni Jesus kundi ibang bagay—an pagpamibi.

¹⁰ Kakasabi pa sana ni Jesus sa saiyang mga disipulo na dapat na mamibi sinda paagi sa saiya bako sa saiya. (Juan 16:23, 24) Mahalaga na maaraman ninda iyan huling kan buhayon na liwat si Jesus, tibaad nagkaigwa sinda kan tendensiyang mamibi sa saiya. Tutal, nagin dayupot nindang amigo si Jesus. Tibaad inisip ninda na, dahil namumutan sinda ni Jesus, dadangugon niya an saindang mga pamibi asin iaatubang niya sa saiyang Ama an saindang mga pakiulay. Alagad sinabi ni Jesus na dai sinda dapat mag-isip nin arog kaiyan. Taano? Huling sinabi niya sa sainda: “An Ama mismo namumutan kamo.” An katotoohan na iyan kabtang kan panginot na katukduan sa Bibliya manungod sa pamibi. Isip-isipa kun ano an kahulugan kaiyan para sa saimo: Paagi sa pag-adal mo kan Bibliya, namidbid asin namutan mo si Jesus asin nagin disipulo ka niya. (Juan 14:21) Pero arog kan mga disipulo kan inot na siglo, makakapamibi ka nin may kumpiyansa sa Diyos huling aram mong siya “mismo namumutan” ka. Sa kada namimibi ka ki Jehova, ipinapahiling mo na kumbinsido ka sa mga tataramon na iyan.—1 Juan 5:14.

ARAMON AN MGA DAHILAN KAN SAIMONG MGA PAGDUDA

11. Taano ta mauugma si Satanas kun pagdududahan ta an pagkamuot ni Jehova?

¹¹ Sain hali an mga pagduda manungod sa pagkamuot ni Jehova? Tibaad isimbag mo na ki Satanas, asin totoo man iyan. An Diyablo ‘hinihinguwang sibaon’ kita, asin buot niyang pagdudahan ta an pagkamuot ni Jehova. (1 Ped. 5:8, nota sa ibaba) Kaya gusto niyang mamatian tang grabe kita kamakasalan asin sa siring bakong maninigo sa pantubos—sarong bagay na itinao ni Jehova huli sa pagkamuot Niya sa sato. (Heb. 2:9) Pero siisay an mauugma kun pagdududahan ta an pagkamuot ni Jehova? Si Satanas. Asin kiisay na katuyuhan an mangyayari kun mapundo kita sa paglilingkod ki Jehova huli sa mga kasakitan? Ki Satanas. Isip-isipa na sana an manungod sa paghihinguwa ni Satanas na pagdudahan ta an pagkamuot ni Jehova. Si Satanas talaga an dai na namumutan ni Jehova. Alagad, paagi sa saro sa saiyang ‘pinakatusong mga gibo,’ hinihinguwa niyang ipamati sato na kita an dai namumutan ni Jehova asin na kita an kinokondenar Niya. (Efe. 6:11) Kun aram niyato kun ano an hinihinguwang gibuhon kan satong kaiwal, magigin mas determinado kitang “labanan . . . an Diyablo.”—Sant. 4:7.

12-13. Paano an satong minanang makasalan na kamugtakan puwedeng magin dahilan na pagdudahan ta an pagkamuot ni Jehova?

¹² May saro pang puwedeng magin dahilan kan satong mga pagduda manungod sa pagkamuot ni Jehova. Ano daw kaya iyan? An satong minanang makasalan na kamugtakan. (Sal. 51:5; Roma 5:12) Huli sa kasalan, an katawuhan nagin siblag sa saindang Kaglalang. Naapektaran man kaiyan an satuyang isip, puso, asin hawak.

¹³ An kasalan nagigin dahilan na makamati kita nin negatibong mga emosyon arog kan pagkakonsiyensiya, pagkapurisaw, hababang paghiling sa sadiri, asin pagkasupog. Puwede tang mamatian an mga iyan pag nakagibo kita nin kasalan. Alagad, dawa dai kita nakagibo nin kasalan puwede ta pa man giraray iyan na mamatian dahil sa satong pagigin makasalan—sarong kamugtakan na bako nanggad kauyon kan pagkalalang sa sato. (Roma 8:20, 21) Kun paanong an sarong lunadan na kupos an ruweda dai episiyenteng makakadalagan nin sanggatos porsiyento, bilang bakong perpektong mga tawo dai ta man maaabot an satong bilog na potensiyal arog kan orihinal na pagkadisenyo sa sato. Kaya bakong makangangalas na may mga pagkakataon na nakakamati kita nin pagduda sa pagkamuot ni Jehova. Kun mangyari iyan, dapat niyatong girumdumon na si Jehova “an Diyos na makapangyarihan asin kahanga-hanga, [na] nagpapahiling nin maimbod na pagkamuot sa mga namumuot sa saiya asin nag-uutob kan saiyang mga tugon.”—Neh. 1:5.

14. Paano an paghurop-hurop sa pantubos makakatabang sa sato na mahali an ideya na nungka kitang mamumutan ni Jehova? (Roma 5:8) (Hilingon man an kahon na “Ingatan an Sadiri Laban sa ‘Mapandayang Kapangyarihan nin Kasalan.’”)

¹⁴ Totoo na may mga pagkakataon na tibaad mamatian tang bako kitang maninigo sa pagkamuot ni Jehova. Asin bako man talaga kuta kitang maninigo diyan—iyan an dahilan kaya espesyal na marhay an pagkamuot ni Jehova. Kun kita sana, mayo kitang ano man na magigibo tanganing makamtan an pagkamuot niya. Dawa arog kaiyan, paagi sa pantubos natatahuban an satong mga kasalan, asin pinagin posible ni Jehova an probisyon na iyan huling namumutan niya kita. (1 Juan 4:10) Girumdumon man na nag-abot si Jesus tanganing iligtas an mga tawong makasalan, bako an mga tawong perpekto. (Basahon an Roma 5:8.) Mayo nin siisay man sa sato an kayang gibuhon nin perpekto an mga bagay-bagay, asin dai man iyan sa sato inaasahan ni Jehova. Kun nasasabutan tang an satong makasalan na kamugtakan puwedeng magin dahilan na pagdudahan ta an pagkamuot ni Jehova, puwede kitang magin urog pa nganing determinado na labanan an impluwensiya kaiyan sa satong kaisipan.—Roma 7:24, 25.

MAGDESISYON NA MAGDANAY NA MAIMBOD

15-16. Kun magdadanay kitang maimbod ki Jehova, sa ano kita makakasigurado, asin taano? (2 Samuel 22:26)

¹⁵ Gusto ni Jehova na gibuhon ta an tamang desisyon “paagi sa pagdanay na maimbod sa saiya.” (Deu. 30:19, 20) Kun gigibuhon ta iyan, makakasigurado kita na magdadanay siyang maimbod sa sato. (Basahon an 2 Samuel 22:26.) Sagkod na nagdadanay kitang maimbod ki Jehova, makakaasa kita na tatabangan niya kitang makayanan an ano man na sitwasyon na minaabot sa satong buhay.

¹⁶ Arog kan pinag-ulayan ta, dakulon kitang dahilan na magdanay na nakaangkla mantang inaatubang ta an mga pagbalo. Aram niyato na namumutan kita ni Jehova asin tatabangan niya kita. Iyan an itinutukdo kan Bibliya. Kun mangyari man na pagdudahan ta an pagkamuot niya, puwede tang hurop-hurupon kun ano an aram tang tama imbes na an namamatian tang tama. Lugod na magdanay kitang may kumpiyansa sa basado sa Bibliyang katotoohan na an maimbod na pagkamuot ni Jehova nagdadanay sagkod lamang.