Nagigirumduman Mo Daw?
Binasa mo daw na marhay an mga isyu kan An Torrengbantayan sa taon na ini? Kun iyo, hilinga kun masisimbag mo an minasunod na mga hapot:
Ano an nagpapahiro sa sato na tawan nin kamurawayan si Jehova?
Ginigibo niyato iyan huling igwa kita nin hararom na paggalang ki Jehova saka namumutan ta siyang marhay. Pinapamuraway man niyato siya huling gusto tang mamidbid siya kan iba.—w25.01, p. 3.
Kun may nakakulog kan buot niyato, paano kita magigin mas mapagpatawad?
Dai ta man basta binabaliwala na sana an satong namamatian; alagad, kun hahalion ta an satong kaanggutan saka kulog nin buot, maililikay ta an satong sadiri na madanyaran nin paghinanakit.—w25.02, p. 15-16.
Taano ta marahay na arugan an disipulong si Marcos para sa mga hoben na brother?
Andam na inako ni Marcos an sarong asignasyon na maglingkod. Dawa ngani posibleng marhay na nakulgan asin nadisganar siya sa sarong pangyayari, dai nagpundo si Marcos. Hininguwa niyang magin mas dayupot pa ki Pablo saka sa iba pang maygurang.—w25.04, p. 27.
Ano an buot sabihon ni Jesus kan mamibi siya: “Ipinamidbid ko sa sainda an saimong pangaran”? (Juan 17:26)
Dati nang aram kan mga disipulo niya an pangaran nin Diyos. Pero ipinamidbid ni Jesus sa sainda an Persona sa likod kan pangaran, kaiba na an Saiyang mga katuyuhan, mga gibo, asin mga kuwalidad.—w25.05, p. 20-21.
Kun mapakumbaba kita, ano an dapat tang akuon?
Inaako ta na may mga bagay na dai ta aram. Halimbawa, dai ta aram kun nuarin maabot an katapusan o kun sa anong paagi tibaad humiro si Jehova sa panahon na iyan. Dai ta man aram kun ano an mangyayari sa aga o gurano kita kamidbid ni Jehova.—w25.06, p. 15-18.
Ano an makakatabang sa sato para makinabang sa sarong artikulo o sa sarong pampublikong pahayag?
Puwede tang haputon an satong sadiri: ‘Anong patunay an ginagamit digdi tanganing kumbinsiron an mga nagbabasa o nagdadangog? Igwa daw diyan nin epektibong ilustrasyon na magagamit ko pag nagtutukdo ako? Siisay an puwedeng magkainteres sa temang ini?’—w25.07, p. 19.
Ano an manunudan ta sa pagpapatawad nin Diyos sa kun paano niya trinatar si David?
Dawa nakakomiter si David nin magabat na mga kasalan, kan udok siyang nagsulsol, pinatawad siya ni Jehova. (1 Ha. 9:4, 5) Pag an Diyos nagpapatawad, dai na niya piggigirumdom an mga nagibong kasalan asin dai niya iyan gagamiton laban sa nagkasala.—w25.08, p. 17.
Kun an tinutukduan mo sa Bibliya nadidipisilan sa sarong punto, ano an puwede mong gibuhon?
Kun nadidipisilan pa man giraray siya sa sarong punto dawa hininguwa mo nang itukdo iyan na marhay sa saiya gamit an Bibliya, laktawan nguna asin balikan na lang iyan.—w25.09, p. 24.
Sinasabi kan Bibliya na an kasalan may “mapandayang kapangyarihan.” (Heb. 3:13) Sa paanong paagi?
An kasalan puwede kitang tentaran na magkomiter nin salang mga gibo. Puwede man kitang dayaon kaiyan na magkaigwa nin dai mahali-haling mga pagduda, arog kan kun baga namumutan talaga kita nin Diyos.—w25.10, p. 16.
Ano an tulong paagi na makakatabang na magin mas makahulugan an saimong personal na mga pamibi?
(1) Puwede mong hurop-hurupon an mga kuwalidad ni Jehova. (2) Puwede mo man na isip-isipon kun anong mga kadipisilan an napapaatubang sa saimo asin sambiton iyan, halimbawa kun nasasakitan ka ngayang magpatawad. (3) Dai maghidali pag namimibi. Makakatabang ini na mas maipahayag mo an saimong kauruiraruming mga iniisip.—w25.10, p. 19-20.
Paano niyato matatabangan an mga may edad na?
Puwede niyatong bisitahon o apudan an mga may edad na, ibanan sa pagpa-check up, o partneran sinda sa manlain-lain na porma nin ministeryo.—w25.11, p. 6-7.
Anong mahalagang mga bagay an dapat na pag-isipan kan Kristiyanong magkatrato tanganing magkaigwa sinda nin onorableng kasal?
Magsunod sa kinakaipuhan na legal na mga kahagadan. Siyertuhon na mababanaag an bunga kan espiritu nin Diyos sa panahon nin seremonya saka sa resepsiyon kan kasal. Magin mabini sa pagbado, asin siguraduhon na likayan an bakong maka-Kasuratan na mga kostumbre o kaugalian. Makikomunikar na marhay mantang nagpaplano kan kasal.—w25.12, p. 21-24.