HAPOT KAN MGA HOBEN

Importante Daw na Magin Sikat Ka Online?

An tin-edyer na si Elaine nagsabi: “Pag nahihiling ko na kadakul followers online an mga kaeskuwela ko, naiisip ko, ‘Wow—sikat palan sinda!’ Sa totoo lang, medyo naaara ako.”

Namatian mo na man daw iyan? Kun iyo, matatabangan ka kan artikulong ini na malikayan an bakong marahay na epekto kan paghihinguwa na magin sikat online.

Ano an mga peligro?

Sa Talinhaga 22:1, sinasabi kan Bibliya na “an marahay na pangaran iyo an dapat pilion kisa sa dakulang kayamanan.” Kaya, okey lang na mawuton ta na magkaigwa nin marahay na reputasyon—na magustuhan pa ngani kita kan iba.

Pero kun minsan, puwede iyan na magresulta sa grabeng pagmawot na magin sikat. Peligroso daw iyan? Iyo daa, an sabi kan 16 anyos na si Onya:

“May mga nahihiling ako na naggigibo nin delikadong mga bagay—arog kan paglukso hali sa second floor sa eskuwelahan mi—para sana magin sikat.”

Para makua an atensiyon kan ibang tin-edyer, may mga nagbi-video pa ngani kan delikadong stunt ninda, tapos ipo-post iyan online. Halimbawa, may mga tin-edyer na nag-upload nin mga video ninda mantang nagkakakan nin sabon na panglaba—na may nakakahilong kemikal—sarong bagay na dai dapat gibuhon!

Sinasabi kan Bibliya: “Dai kamo maggibo nin anoman . . . tanganing maghambog.”—Filipos 2:3, An Marahay na Bareta Biblia (Bikol Popular Version).

Pag-isipan:

Importante daw na magin sikat ka online?
Isasapeligro mo daw an saimong salud o buhay para makua an atensiyon asin pag-uyon kan iba?

An sinasabi kan ibang tin-edyer

“Nagigin peligroso an pagmawot na magin sikat pag handang gibuhon kan saro an maski ano, iyan man sa pagtaram, pagbado, o pag-akto sa kakaibang paagi—dawa sa online—para magin sikat sinda. Bakong sulit kun ikokompromiso mo an saimong mga paniniwala saka mga prinsipyo para lang magin sikat.”—Leianna.

“Sikat, pero dai man talaga”

Bako man lang pirming paggibo nin mga delikadong bagay an ginigibo kan iba para magin sikat. Sinabi kan 22 anyos na si Erica kun ano pa an ginigibo kan iba:

“May mga tawo na nagpo-post kan gabos na nangyayari sa buhay ninda para ipahiling sa iba na dakulon man ngaya sindang amigo na nakakaibanan. Kaya an paghiling sainda kan iba sikat, pero dai man talaga.”

Sinabi kan 15 anyos na si Cara na may mga tawo na nandadaya para ipahiling na sikat man daa sinda:

“May mga tawo na nagpo-post nin ritrato na garo nasa party sinda, pero an totoo nasa harong man lang sinda.”

Sinabi kan 22 anyos na si Matthew na nagibo na niya iyan:

“Nag-post ako nin ritrato tapos an piglaag kong location Mount Everest, dawa dai pa lamang ako nakaabot sa Asia!”

Sinasabi kan Bibliya: “Mawot niyamo na gumawi kami nin sadiyosan sa gabos na bagay.”—Hebreo 13:18.

Pag-isipan:

Pag naggagamit ka nin social media, nandadaya ka daw para sana magin sikat?
Ipinapahiling daw kan mga ritrato saka comment na pigpo-post mo kun siisay ka talaga asin kun ano an mga pinapaniwalaan mo?

An sinasabi kan ibang tin-edyer

“May mga tawo na gigibuhon maski ano para makakua nin dakul na likes. Pero gusto mo daw na mabisto ka kan iba dahil sa bakong tamang pagtaram asin pagbado o sa pagpasikat kan mga bagay na igwa ka? O mas gusto mong mabisto ka dahil sa marahay mong ugali asin sa tunay mong pagmalasakit sa iba? Nakakaugma pag gusto ka kan iba, pero siguraduhon mong ikaka-proud mo an dahilan ninda.”—Hannah.

Importante daw an mga followers asin mga likes?

Dakul na tawo an naniniwala na para magin sikat online, kaipuhan na dakulon nanggad an bilang kan saimong mga followers saka mga likes. Si Matthew na sinambit kasubago, inako na arog man kaiyan an iniisip niya dati:

“Hinahapot ko an mga tawo, ‘Pira an followers mo?’ o ‘Pira an pinakadakul na likes na naako mo?’ Para magdakul an mga followers ko, pigpa-follow ko dawa an mga tawong dai ko bisto, ta ’baad i-follow man ninda ako. Nagkaigwa ako nin grabeng pagmawot na magin sikat, asin lalo pang pinagrabe iyan kan social media.”

Collage: 1. Sarong tin-edyer na babayi na nakangirit asin pighihiling kun pira an bilang kan mga likes sa saiyang social media page. 2. An iyo man sanang tin-edyer na babayi na kapot an sarong mangko nin candy mantang nagkakakan. 3. An tin-edyer na babayi na nakakapot sa saiyang tulak asin garo malain an pagmati. — An pagigin sikat online garo junk food, sa inot mai-enjoy mo iyan, pero dai ka man talaga mababasog

Naobserbaran kan 25 anyos na si Maria na may mga tawo na hinihiling an halaga ninda base sa bilang kan mga followers ninda asin kan likes na naaako ninda:

“Kun nag-selfie an sarong babayi tapos dikit lang an nag-like kaiyan, iisipon niya na bako siyang magayon. Siyempre, salang mag-isip nin arog kaiyan, pero iyan man an iisipon kan dakul na tawo na nasa arog kaiyan na sitwasyon. Garo man sana sinda mismo an nangbu-bully sa sadiri ninda.”

Sinasabi kan Bibliya: “Dai kita magin mapagpaimportante sa sadiri, na nagpupukaw nin kurumpetensiyahan sa lambang saro, na nag-uururihan sa lambang saro.”—Galacia 5:26.

Pag-isipan:

Kun naggagamit ka nin social media, naririsa mo daw na ikinukumparar mo na an sadiri mo sa iba?
Mas importante daw saimo an bilang kan mga followers kisa sa pagkaigwa nin tunay na mga amigo na nagmamalasakit sa saimo?

An sinasabi kan ibang tin-edyer

“Para magin sikat online, dapat na pahangaon mo an iba, asin para magibo iyan ’baad kaipuhan mong magin arog ninda. Huli kaiyan, ’baad magparapokus ka na sa kun ano an paghiling saimo kan iba asin sa kun paano ka ninda magugustuhan. Normal sana na gusto tang magustuhan kita kan iba, pero an pagparapokus para magin sikat puwedeng magresulta na iyo na sana iyan pirmi an laog kan isip mo.”—Joshua.

Mag-ingat sa “sagin man ngayang mapakumbaba”

Naririsa mo daw na may mga tawo na sagin man ngayang nagrereklamo, pero an totoo, gusto man lang nindang ipaghambog an mga nagibo ninda?

“Puon kan magkaigwa ako nin bagong kotse, dai na nagpundo an mga tawo na gustong makisakay!”
“Nakakasuya, gabos na lang nagsasabi na bagay daa sako na nagniwang ako!”

May mga tawo na inaagi sa reklamo an paghambog ninda para sagin man ngayang mahiling kan iba na mapakumbaba sinda.

Patanid: An arog kaiyan na paghambog sa parati bakong marahay an resulta, huling naririsa kan mga tawo kun ano talaga an nasa buot mo. Asin huling an sagin man ngayang mapakumbaba bakong sinsero, sa parati mas nasusuya diyan an mga tawo kisa sa direktang paghambog.

Sa sunod na pag-post mo nin comment o ritrato sa social media, mag-ingat sa sagin man ngayang pagpapakumbaba. Sunudon an madunong na sadol kan Bibliya: “Pabayaing an iba an mag-umaw sa saimo, asin bako an sadiri mong nguso.”—Talinhaga 27:2.