Kun Paano Malalabanan an Pandemic Fatigue

Napapagal ka na daw huli sa mga kaipuhan mong gibuhon ngunyan na may COVID-19? Kun iyo, dai ka nagsosolo. Sa laog nin nagkapirang bulan, kinaipuhan kan mga tawo sa bilog na kinaban na mag-adjust sa buhay ngunyan na may pandemya. Dakul an “naggibo nin dakulang mga pagsasakripisyo para makontrol an paglakop kan COVID-19,” an sabi ni Dr. Hans Kluge, na Regional Director kan World Health Organization para sa Europa. “Sa arog kaining mga sitwasyon madali saka natural sanang mawaran nin interes saka nin gana sa mga bagay-bagay, na makamati nin kapagalan.”

Kun napapagal ka na o nakakamati kan inaapod na pandemic fatigue, dai pangluyahan nin buot. Dakul an natatabangan kan Bibliya para makaya an buhay sa nakaka-stress na panahon na ini. Matatabangan ka man kaiyan.

Ano an pandemic fatigue?

Bako man na hilang an pandemic fatigue kundi sarong termino na ginagamit para iladawan an natural na reaksiyon nin mga tawo dahil sa nabago kan pandemya an buhay ninda asin dai ninda aram an mangyayari sa puturo. Magkakaiba an reaksiyon nin lambang tawo, pero kaiba sa komun na mga senyales nin pandemic fatigue an:

Kawaran nin gana sa ano man na aktibidad
Pagbabago sa pagkakan asin pagturog
Madaling mauyam
Pagka-stress sa mga trabahong pasil sana man saimo ka’dto
Dai makapokus
Kawaran nin paglaom

Taano ta seryosong bagay an pandemic fatigue?

Puwedeng magin peligrosong marhay sato saka sa iba an pandemic fatigue. Kun dai ta iyan lalabanan, tibaad luway-luway na kitang mawaran nin gana na sunudon an mga safety protocol kontra COVID-19. Sa paglihis nin panahon, tibaad magin kampante na kita, maski padagos pa man giraray na naglalakop an virus saka dakul an nagagadan. Dahil pagal na kita sa pagparasunod sa mga restriksiyon, tibaad gusto tang magin mas buwelo, na puwedeng magsapeligro sato sako sa iba.

Sa nakaka-stress na mga panahon na ini, naeeksperyensiyahan kan dakul an sinasabi kan Bibliya: “Kun pangluyahan ka nin buot sa aldaw nin kasakitan, an saimong kusog magigin diit na lang.” (Talinhaga 24:10, NWT) Nagtatao an Bibliya nin mga prinsipyo na makakatabang sato na makayanan an nakakapangluyang mga sitwasyon, kaiba na an pandemyang ini.

Anong mga prinsipyo sa Bibliya an makakatabang saimo na malabanan an pandemic fatigue?

Magsunod sa physical distancing—pero magin close pa man giraray sa mga amigo mo

An sinasabi kan Bibliya: ‘An katuod minadamay sa oras nin kasakitan.’—Talinhaga 17:17, An Marahay na Bareta Biblia.

Kun taano ta mahalaga iyan: Pinapakusog kita kan tunay na mga amigo. (1 Tesalonica 5:11) Sa kabaliktaran, puwede kitang magkahilang pag haloy na panahon kitang nakasuway sa iba.—Talinhaga 18:1.

Purbaran ini: Padagos na makikomunikar sa mga amigo mo paagi sa pag-video chat, pag-apod sa cellphone, o pag-e-mail saka pag-text. Makipag-ulay sainda pag bakong magayon an aldaw mo, saka regular na kumustahon sinda. Pag-iristoryahan nindo kun ano an nakakatabang saindo sa panahon na ini na may pandemya. Maghanap nin mga paagi na makapahiling ka nin karahayan o kabuutan sa amigo mo. Paagi kaiyan, pareho kamong magigin maugma.

An sinasabi kan iba

“Nakikipag-videoconference ako sa mga amiga ko. Kun minsan, sa sarong amiga lang; sa ibang pagkakataon, su grupo na man kami tapos nagkakawat kami o kaya nag-uurulay. Totoo na iba pa man giraray talaga pag personal kamong nagkakahirilingan, pero nakakatabang talaga iyan. Nagin dipisil an buhay dahil sa pandemya, kaya mahalaga na makipag-ulay sa mga amiga mo tapos masabi mo sainda an talagang namamatian mo. Bako iyan madali, pero gabos kita kaipuhan nin tabang.”—Megan, Canada.

“Pungawon na kami sa pamilya saka mga amigo mi, pero nakaisip kami nin mga paagi para maipamati mi sainda na namumutan mi sinda. Bilang pamilya, naggibo kami nin mga kard saka simpleng mga regalo para sa mga amigo mi tapos iniibanan mi iyan nin nakakapakusog na mga teksto para maaraman nindang dai mi sinda nalilingawan. Nakapaugma talaga iyan na marhay samo! An pagtao nin panahon para gumibo nin marahay sa iba nakakatabang samo na malingawan an mga problema saka mga ikinakahadit mi.”—Emma kaiba an agom niyang si Nathan saka an mga aki nindang si Eli saka Hope, Estados Unidos.

Gamiton nin tama an oras mo

An sinasabi kan Bibliya: “[Gamiton] sa pinakamarahay an saindong panahon.”—Efeso 5:16.

Kun taano ta mahalaga iyan: Kun gagamiton mo sa tamang paagi an oras mo, makakatabang iyan na pirmi kang magin positibo saka dai magparahadit.—Lucas 12:25.

Purbaran ini: Imbes na magpokus sa kun ano an dai mo na magigibo, mag-isip nin mga bagay na magigibo mo sa panahon na ini. Halimbawa, may naiisip ka daw na mga project na may panahon ka nang magibo ngunyan o may mga puwede ka daw na magin hobby ngunyan? Makakatao ka na daw ngunyan nin mas dakul na panahon sa pamilya mo?

An sinasabi kan iba

“Dakul kaming nagibong project sa harong—nagtanom nin mga gulay saka mga herb, mga art project, saka nag-decorate kami.”—Evan kaiba an agom niyang si Samantha saka an mga aki nindang si Eli saka Adam, South Africa.

“Sa 30 taon ming pag-ibanan ni agom, ngunyan lang kami nagkaigwa nin arog kaini kadakul na panahon na magkaibanan. Nakapararom iyan sa pagkamuot mi sa lambang saro dahil mas nasabutan mi an mga kaluyahan saka mga kakusugan kan lambang saro. Mas aram mi na kun paano kami magtitinabangan pag magkaigwa nin mga problema.”—Ivan kaiba an agom niyang si Eve, Italy.

Gumibo nin iskedyul asin sunudon iyan

An sinasabi kan Bibliya: “Gibuhon nindo an gabos na bagay sa . . . aregladong paagi.”—1 Corinto 14:40.

Kun taano ta mahalaga iyan: Mas maugma saka kontento an mga tawong may pigsusunod na iskedyul.

Purbaran ini: Gumibo nin iskedyul uyon sa sitwasyon mo. Mag-set nin oras para sa mga assignment, trabaho, saka sa mga gibuhon sa harong pati man para sa pagsamba sa Diyos. Iiba sa iskedyul an mga aktibidad na makakatabang saimo, arog kan pagtao nin panahon sa pamilya, mga aktibidad sa luwas nin harong, saka exercise. Regular na rebyuhon an iskedyul mo, tapos baguhon iyan kun kaipuhan.

An sinasabi kan iba

“Dawa kan magkapandemya na, ipinadagos ko man giraray an haros gabos sa rutina ko. Sinalidahan ko nin exercise an ibang mga ginigibo ko kaidto, pero nagmamata pa man giraray ako sa aga sa parehong oras. Nakatabang an rutina ko na dai pagparaisipon an pandemya saka mas makapokus sa pamilya saka mga amigo ko.”—Kgaogelo, South Africa.

“Gustong-gusto kong magluto nin pamahawan saka magkape arog kan dati ko nang ginigibo. Tapos naghahanda na ako na garo baga mahali ako sa harong. Pag ginigibo ko iyan, mas marahay an pagmati ko saka mas buhay na buhay ako sa bilog na aldaw.”—Carmel, France.

Mag-adjust sa kamugtakan nin panahon

An sinasabi kan Bibliya: “An saro na alisto an isip nahihiling an peligro asin minatago.”—Talinhaga 22:3, NWT.

Kun taano ta mahalaga iyan: Depende sa kun sain ka nakaistar, an mga pagbabago sa kamugtakan nin panahon puwedeng makabawas sa oportunidad mong makahangos nin preskong duros sa luwas asin masaldangan, mga bagay na marahay sa hawak saka sa isip mo.

Purbaran ini: Kun paparani na an tiglipot, puwede mong baguhon an pagkaayos kan sala o kan pigtatrabahuhan mo para mas maglaog an saldang. Mag-isip nin mga puwede mong gibuhon sa luwas maski malipot an panahon. Kun posible, bumakal nin mga badong pantiglipot para mas makaluwas ka.

Kun madali na an tig-init, sa parati nasa luwas an mga tawo kaya kaipuhan mong mag-ingat. Planuhon an mga dudumanan mo, tapos pilion an mga oras na dai mo makakasabay an dakul na tawo.

An sinasabi kan iba

“Mauran sa lugar mi, kaya kaipuhan na flexible an rutina ko. Pag nagpahiling an saldang, minaluwas tulos ako. Maski an paglakaw o pagbisikleta sana nin diit nakakatabang talaga para magrahay an mood ko.”—Sameena, France.

“Kan tig-init, mas madali ta dakul an puwede mong magibo sa luwas, pero ngunyan na tiglipot na, naggigibo ako nin lista kan mga puwede kong gibuhon sa laog kan harong.”—Tiffany, Canada.

Magsunod pa man giraray sa mga safety protocol kan COVID-19

An sinasabi kan Bibliya: “An sarong mangmang dai nag-iingat asin sobra an kumpiyansa.”—Talinhaga 14:16, NWT.

Kun taano ta mahalaga iyan: Nakakagadan an COVID-19, kun mapundo kita sa pag-ingat, puwede kitang maulakitan.

Purbaran ini: Regular na i-check an mga protocol kan gobyerno dangan pag-isipan kun pigsusunod mo pa man giraray iyan. Isaisip an magigin epekto kan mga ginigibo mo sa saimo, sa pamilya mo, saka sa iba.

An sinasabi kan iba

“Ginigibo ko an magigibo ko para dai maglakop an virus. May mga nagbabaliwala sa mga regulasyon, pero ako nagpopokus ako sa kun ano an magigibo ko para maingatan an sadiri saka an pamilya ko.”—Daryn, South Africa.

Pakusugon an relasyon mo sa Diyos

An sinasabi kan Bibliya: “Rumani kamo sa Diyos, asin marani siya sa saindo.”—Santiago 4:8.

Kun taano ta mahalaga iyan: Matatabangan ka nin Diyos na makayanan an ano man na kadipisilan.—Isaias 41:13.

Purbaran ini: Basahon an Tataramon nin Diyos, an Bibliya, aroaldaw. Puwede mong punan iyan gamit an mga plano sa pagbasa sa Bibliya na ini.

Kontakon an mga Saksi ni Jehova asin aramon kun paano ka makakaiba sa pag-adal ninda nin Bibliya ngunyan na igwa nin COVID-19 na pandemya. Halimbawa, sa bilog na kinaban naggagamit sinda nin videoconferencing para sa mga pagtiripon ninda, taunan na paggirumdom sa kagadanan ni Jesus, asin kumbensiyon.

Mga teksto na makakatabang pag nakakamati ka nin pandemic fatigue

Isaias 30:15, NWT: “An saindong kusog yaon sa pagdanay na kalmado asin pagpahiling nin tiwala.”

Kahulugan: An pagtitiwala sa sadol nin Diyos makakatabang sato na magin kalmado dawa dipisil an mga panahon.

Talinhaga 15:15, NWT: “An gabos na aldaw kan saro na nasasakitan bakong marahay, pero an saro na may maugmang puso igwang dagos-dagos na kapiyestahan.”

Kahulugan: An pagpokus sa positibong mga bagay makakatabang sato na magin maugma dawa sa dipisil na mga panahon.

Talinhaga 14:15, An Marahay na Bareta Biblia: “Naniniwala an mangmang sa gabos niyang nadadangog, alagad minamaanan kan [madunong] an saiyang linalakawan.”

Kahulugan: Magsunod sa mga safety protocol, dai tulos magtubod sa mga nagsasabing dai iyan kaipuhan.

Isaias 33:24: ‘Dai magsasabi an nag-iirok: “Naghihilang ako.”’

Kahulugan: Nanunuga an Diyos na hahalion niya an gabos na hilang.