Marauton na Kamugtakan nin Panahon—Makakatabang Daw Saimo an Bibliya na Makayanan Iyan?

Saro ka daw sa minilyon na naapektaran nin marauton na kamugtakan nin panahon? Manlain-lain an peligrosong kamugtakan nin panahon saka an mga danyos kaiyan. An mga bagyo saka buhawi sa parati nagkakawsa nin mga storm surge, pagbaha, o mga danyos huli sa makusog na duros. Dahil sa makusog na pag-uran, puwedeng magkaigwa nin pagrasay nin daga asin nin mga kikilat na nagigin dahilan nin mga wildfire. An mga tigmara, heat wave, saka grabeng pag-uran nin niyebe na may makusog na duros puwede man na magkawsa nin grabeng danyos.

Sa dakul na lugar sa kinaban, lalong nagigin parati asin naggagrabe an mapandestrosong mga kamugtakan nin panahon. Sinabi kan International Federation of Red Cross and Red Crescent Societies: “An bilang nin mga tawong naaapektaran nin mga kalamidad padagos man na naglalangkaw, mantang padakul nin padakul an pagbaha, mga bagyo, saka tigmara na nakakadanyar sa buhay, istaran, asin kabuhayan nin minilyon na tawo sa kada taon.”

Pag nangyayari iyan, an mga tawo nasasakitan bako lang sa pisikal kundi pati man sa emosyon. Tibaad ma-trauma sinda dahil sa pagkawara nin mga pagsadiri, harong, o pagkagadan pa ngani nin mahal sa buhay.

Kun nagsasakit ka dahil sa mga epekto nin marauton na kamugtakan nin panahon, makakatabang saimo an Bibliya na makayanan iyan. Nagtatao iyan nin karangahan, paglaom, asin praktikal na mga sadol, na nakatabang sa dakulon na biktima nin mga kalamidad na konektado sa kamugtakan nin panahon. (Roma 15:4) Sinisimbag man kaiyan an sarong mahalagang hapot na haloy nang nasa isip kan dakul: Taano ta tinugutan ini nin Diyos na mangyari—pinapadusahan niya daw ako?

An marauton na mga kamugtakan nin panahon ngunyan bakong padusa hali sa Diyos

Itinutukdo kan Bibliya na bako an Diyos an dahilan kan pagsakit nin mga tawo. Inaasigurar kita kaiyan na “an Diyos dai puwedeng baluon paagi sa maraot na mga bagay, asin siya mismo, dai niya binabalo an siisay man paagi sa maraot na mga bagay.” (Santiago 1:13) Nangangahulugan iyan na bako siya an nasa likod kan marauton na mga kamugtakan nin panahon na naeeksperyensiyahan nin mga tawo ngunyan.

Totoo na may mababasa kita sa Bibliya na mga pangyayari na diyan ginamit nin Diyos an mga puwersa nin naturalesa tanganing padusahan an maraot na mga tawo. Pero an mga pangyayaring iyan bako man arog kan mapandestrosong mga kamugtakan nin panahon ngunyan, na dai ta aram kun nuarin maabot asin dai nin pinipili—marahay na tawo man o maraot. Sa kabaliktaran, ipinapahiling kan Bibliya na an Diyos pirming pinoprotektaran an mga daing sála, nagtatao nin patiinot na patanid, asin ipinapaliwanag kun taano ta gigibuhon niya an sarong bagay. Halimbawa, ipinaliwanag nin Diyos kun taano ta mapaabot Siya nin pangglobong Baha kan panahon ni Noe. Nagtao man Siya nin patiinot na patanid bago Niya gibuhon iyan, asin prinotektaran Niya si Noe saka an pamilya kaini.—Genesis 6:13; 2 Pedro 2:5.

Para sa urog pang impormasyon manungod sa kun paano ta naaraman na an natural na mga kalamidad bakong padusa hali sa Diyos, hilingon an artikulong “Ano an Sinasabi kan Bibliya Manungod sa Natural na mga Kalamidad?”

Nagmamakulog an Diyos sa mga biktima nin marauton na kamugtakan nin panahon

Ipinapahiling kan Bibliya na an Diyos na Jehovaa mapagmalasakit saka may empatiya. Pag-isipan an minasunod na nakakarangang mga teksto.

• Isaias 63:9: “Sa panahon kan gabos nindang kasakitan, [an Diyos] nasasakitan man.”

  Kahulugan: Makulugon para ki Jehova pag nagsasakit an mga tawo.

• 1 Pedro 5:7: “Nagmamakulog siya sa saindo.”

  Kahulugan: Iniisip ni Jehova an kapakanan mo.

An pagmakulog saka empatiya ni Jehova nagpapahiro saiya na umaksiyon. Nagtatao siya nin karangahan paagi sa praktikal na mga sadol sa Bibliya asin sa masasarigan na paglaom na yaon diyan para sa sarong puturo na mayo na nin mga kalamidad na konektado sa kamugtakan nin panahon.—2 Corinto 1:3, 4.

Pag mayo na nin marauton na mga kamugtakan nin panahon

Sinasabi kan Bibliya na nanunuga si Jehova na ‘magkakaigwa kamo nin magayon na puturo asin paglaom.’ (Jeremias 29:11) Katuyuhan niya na ikaugma nin mga tawo an buhay sa paraisong daga, bako na mabuhay sinda sa takot dahil sa kamugtakan nin panahon diyan.—Genesis 1:28; 2:15; Isaias 32:18.

Para mangyari an magayunon na puturong iyan, gagamiton nin Diyos an saiyang Kahadian, sarong gobyerno sa langit na si Jesus an Hadi. (Mateo 6:10) Si Jesus igwa kan kadunungan asin kapangyarihan na kaipuhan para ulangon an maraot na mga kamugtakan nin panahon. Kan si Jesus yaon digdi sa daga, ipinahiling niya an saiyang kapangyarihan na kontrulon an kamugtakan nin panahon. (Marcos 4:37-41) Mamamahala siya nin may pakasabot asin kadunungan, na tinutukduan an mga tawo kun paano aatamanon an kapalibutan asin na mamuhay sa paaging dai nadadanyaran iyan. (Isaias 11:2) Sa irarom kan panginginot ni Jesus, an mga tawo dai na nuarin man madadanyaran nin marauton na kamugtakan nin panahon.

Tibaad maisip mo, ‘Nuarin daw gagamiton ni Jesus an saiyang kapangyarihan na kontrulon an kamugtakan nin panahon?’ Para masimbag iyan, hilingon an artikulong “Nuarin Mamamahala sa Daga an Kahadian nin Diyos?”

Pag-atubang sa marauton na kamugtakan nin panahon ngunyan

Makakatabang sa saimo an mga sadol kan Bibliya bago, durante, asin pagkatapos nin marauton na kamugtakan nin panahon.

• 

  Bago: Magin andam na humiro tulos.

  Kun ano an sinasabi kan Bibliya: “An saro na alisto an isip nahihiling an peligro asin minatago, pero an daing eksperyensiya minadiretso sana asin sinasapar an mga konsekwensiya.”—Talinhaga 22:3.

  Kahulugan: Antisiparon an posibleng mga peligro para makahiro ka tulos asin maprotektaran an saimong pamilya.

  Eksperyensiya: “Kan aldaw na magdulag kami sa wildfire, andam kami. Igwa kami nin mga go bag. Igwa kaming darang mga bulong asin mga bado. Nagkakatararanta an mga tawo sa palibot mi; dai ninda aram kun ano an gigibuhon. Pero kami, igwa kami kan gabos na kinakaipuhan mi, asin dahil diyan nagpapasalamat akong marhay!”—Tamara, California, U.S.A.

• 

  Durante: Magpokus sa kun ano an pinakamahalaga.

  Kun ano an sinasabi kan Bibliya: “Maski kadakul kan pagsadiri nin sarong tawo, dai siya kaiyan matatawan nin buhay.”—Lucas 12:15.

  Kahulugan: Mas mahalaga an buhay kisa sa mga pagsadiri.

  Eksperyensiya: “Kan rauton kan Bagyong Lawinb an samong harong, dai ako makapag-isip na marhay kun anong gigibuhon. Pero saro sa ginibo ko iyo an mamibi nin udok sa Diyos na Jehova. Napag-isip-isip ko na materyal na mga bagay man sana an nawara sa samo, bako an samong buhay.”—Leslie, Pilipinas.

• 

  Pagkatapos: Atubangon an problema nin pasaro-sarong aldaw.

  Kun ano an sinasabi kan Bibliya: “Dai kamo nuarin man maghadit manungod sa masunod na aldaw, huli ta an masunod na aldaw magkakaigwa kan sadiri kaiyan na mga kahaditan.”—Mateo 6:34.

  Kahulugan: Dai magparahadit na marhay manungod sa maabot na mga problema.

  Eksperyensiya: “Kan bahaon an harong ko dahil sa Bagyong Irma, dakulon akong dapat pagdesisyunan, saka na-stress akong marhay. Hininguwa kong sunudon an sadol kan Bibliya na atubangon an problema nin pasaro-sarong aldaw. Nahiling ko na sa tabang ni Jehova matatagalan ko palan an mga bagay na iniisip kong dai ko kaya.”—Sally, Florida, U.S.A.

Para sa dagdag pang tips, hilingon an artikulong “Kapag May Sakuna—Mga Hakbang na Makapagliligtas ng Buhay.”