Pambabadil sa Eskuwelahan—Ano an Sinasabi kan Bibliya?

Kan Mayo 24, 2022, sarong makaturutristeng trahedya an nangyari sa sadit na banwaan nin Uvalde, Texas, U.S.A. Sigun sa The New York Times, “sarong lalaking may badil an guminadan nin 19 aki saka duwang maestra . . . sa Robb Elementary School.”

Makamumundo, bako nang bihira an arog kaiyan na makatatakot na pangyayari. Ibinareta kan USA Today na sa Estados Unidos sana, “nagkaigwa nin 249 pambabadil sa laog nin eskuwelahan kan nakaaging taon—mas dakul kisa sa iba pang taon puon kan 1970.”

Taano ta nangyayari an mga karatan na ini? Paano ta makakayanan an arog kaiyan na maraot na mga pangyayari? Igwa lamang daw nin paglaom na mawawara pa an kadahasan? Sinisimbag iyan kan Bibliya.

Taano ta mas naggagrabe an kadahasan sa kinaban?

•  Ilinaladawan kan Bibliya an panahon niyato bilang an “huring mga aldaw” kun sain dakul na tawo an “mayong natural na kapadangatan” saka “maringis,” na magibo nin brutal asin madahas na mga gibo. An mga tawo na arog kaiyan an mga ugali “lalo pang magigin maraot.” (2 Timoteo 3:1-5, 13) Para mas makanuod pa, basahon an artikulong “Inihula Ba ng Bibliya na Magiging Ganito ang Ugali ng mga Tao sa Ngayon?”

Dakul na tawo an napapaisip, ‘Taano ta dai pinupugulan na mangyari kan Diyos an makaturutristeng mga trahedya arog kan pambabadil sa eskuwelahan?’ Para maaraman an simbag kan Bibliya, basahon an artikulong “Taano ta May Nangyayaring Maraot sa Marahay na mga Tawo?”

Paano ta makakayanan an arog kaiyan na maraot na mga pangyayari?

•  “An gabos na bagay na isinurat kaidto isinurat para sa pagtukdo sa sato, tanganing . . . paagi sa karangahan hali sa Kasuratan magkaigwa kita nin paglaom.”—Roma 15:4.

Matatabangan ka kan mga prinsipyo sa Bibliya na makayanan an kadahasan sa kinaban na ini. Para sa dagdag na impormasyon, basahon an magasin na Gumising! na may titulong “Magwawakas Pa Kaya ang Karahasan?”

Para sa mga suhestiyon kun paano matatabangan kan mga magurang an saindang mga aki pag nakahiling an mga ini nin makatatakot na mga bareta, basahon an artikulong “Ang Masasamang Balita at ang Iyong mga Anak.”

Mawawara pa daw an kadahasan?

•  “Sa pang-aapi asin sa kadahasan ililigtas niya sinda.”—Salmo 72:14.

•  “Pupulpugon ninda an saindang mga espada tanganing magin mga tarom nin arado asin an saindang mga garod tanganing magin mga pantakras na kagot. An nasyon dai na mabingat nin espada laban sa nasyon, ni mag-aadal pa man sinda nin pakikigiyera.”—Mikas 4:3.

Gigibuhon kan Diyos an dai kayang gibuhon kan mga tawo. Rarauton kan saiyang gobyernong Kahadian sa langit an gabos na armas asin hahalion an gabos na kadahasan. Para mas maaraman pa kun ano an gigibuhon kan Kahadian nin Diyos, basahon an artikulong “‘Mamamayani ang Kapayapaan’ sa Ilalim ng Kaharian ng Diyos.”