Kadahasan sa Pulitika—Ano an Sinasabi kan Bibliya?

Nagigin mas parati an mga nangyayaring kadahasan laban sa mga opisyal kan gobyerno.

Taano ta dakulon nin nangyayaring kadahasan sa pulitika? Matatapos pa daw iyan? Ano an sinasabi kan Bibliya?

Pagkabaranga sa pulitika, ihinula

Ihinula kan Bibliya na sa satong panahon, na inaapod na “huring mga aldaw,” dakul na tawo an magkakaigwa nin mga ugali na nagigin dahilan nin kadahasan asin dai pagkauruyon.

• “Sa huring mga aldaw maabot an delikado asin masakit na mga panahon. Huli ta an mga tawo magigin . . . dai tataong magpasalamat, bakong maimbod, . . . habo nin ano man na kasunduan, . . . maringis, . . . traydor, matagas an payo, orgulyoso.”—2 Timoteo 3:1-4.

Ihinula man kan Bibliya na magigin komun sa peryodong ini nin panahon an mga rebelyon, kariribukan sa pulitika, asin mga kaagid kaiyan. (Lucas 21:9, nota sa ibaba) Alagad, an kadahasan asin pagkabaranga sa pulitika dai magdadanay sagkod lamang.

An katapusan kan kadahasan sa pulitika

Sinasabi kan Bibliya na an gabos na gobyerno nin tawo sasalidahan nin Diyos kan saiyang langitnon na gobyerno.

• “An Diyos nin langit maestablisar nin sarong kahadian . . . . Rurunuton kaini asin tatapuson an gabos na [iba pang] kahadian na iyan, asin ini sana an magdadanay sagkod lamang.”—Daniel 2:44.

Paagi sa Kahadian nin Diyos, tunay nanggad na magkakasararo an mga tawo asin magkakaigwa nin katuninungan sa bilog na kinaban.

• An Tagapamahala kaiyan, si Cristo Jesus, inaapod na “Prinsipe nin Katuninungan,” asin sisiguraduhon niyang an “katuninungan dai magkakaigwa nin katapusan.”—Isaias 9:6, 7.

• Dawa ngunyan, an mga sakop kaiyan nakakanuod kun paano mamuhay nin may katuninungan. Bilang resulta, ini an sabi kan Bibliya: “Pupulpugon ninda an saindang mga espada tanganing magin mga tarom nin arado asin an saindang mga garod tanganing magin mga pantakras na kagot. An nasyon dai na mabingat nin espada laban sa nasyon, ni mag-aadal pa man sinda nin pakikigiyera.”—Isaias 2:3, 4.

Para makanuod pa, basahon an artikulong “Ano an Gigibuhon kan Kahadian nin Diyos?” asin hilingon an videong Ano an Kahadian nin Diyos?